Kunukunan Ta Blanku pa Kosechá

1. Kua trabou importante ta tumando lugá?

¹ Despues ku Hesus a prediká na un muhé samaritano, el a bisa su disipelnan: “Hisa boso kara wak i mira e kunukunan, pasobra nan ta blanku pa wòrdu kosechá.” (Juan 4:​35, 36 ) Un kosecha spiritual tabata na kaminda, i Hesus por a mira delantá ku e trabou akí lo tabatin un alkanse mundial. Desde su posishon den shelu, Hesus ta keda okupá ku e trabou di kosecha. (Mat. 28:​19, 20) Kiko ta indiká ku e trabou akí ta sigui intensifiká segun ku e ta alkansá su kulminashon?

2. Kiko ta mustra ku rònt mundu e trabou di kosecha ta intensifikando?

² Un Kosecha Mundial: Durante e aña di sirbishi 2009, e kantidat di publikadó rònt mundu a oumentá ku 3,2 porshento. Den e paisnan kaminda e trabou di prediká ta prohibí tabatin un oumento di 14 porshento. E kantidat di estudionan bíbliko raportá tur luna a surpasá 7.619.000⁠—⁠un kantidat ku ta mas grandi ku e máksimo di publikadó i kasi mei mion mas tantu ku e kantidat di estudionan raportá e aña anterior. Segun ku e trabou ta ekspandé rápidamente den hopi region, tin mas nesesidat pa misioneronan for di Galaad. Den hopi pais e teritorionan di otro idioma ta duna hopi fruta. Ta bisto ku Yehova ta pura e trabou durante e konklushon di e kosecha. (Isa. 60:⁠22) Bo tin un punto di bista positivo di e “kunukunan” den boso teritorio?

3. Kiko algun ruman por konkluí tokante nan kosecha lokal?

³ E Kosecha Lokal: Kisas algun ruman ta bisa: “Nos teritorio no ta masha produktivo.” Ta bèrdat ku sierto teritorionan no ta parse mes produktivo ku otronan òf no ta mes fruktífero ku nan tabata den pasado. P’esei algun Testigu kisas ta konkluí ku den e áreanan ei e kosecha ta kasi kla i ku loke a keda pa hasi ta rekohé e pokonan ku falta. Esei ta bèrdat?

4. Ki aktitut korekto nos mester kultivá pa ku nos ministerio, i dikon?

⁴ For di komienso te final, e tempu di kosecha ta un temporada di trabou intensivo. Ripará e sentido di urgensia den Hesus su siguiente palabranan: “E kosecha ta masha grandi, ma trahadó ta poko. P’esei, pidi e Señor di kosecha pa manda trahadó na Su kosecha.” (Mat. 9:​37, 38) Yehova, e Señor di kosecha, ta esun ku ta disidí ki ora i na unda kosechamentu ta tuma lugá. (Juan 6:⁠44; 1 Kor. 3:​6-⁠8) Ki asignashon nos tin? Beibel ta bisa: “Sembra bo simia mainta, i no keda sin hasi nada atardi.” (Ekl. 11:​4-⁠6) Sí, ora e kosecha ta alkansá su kulminashon no ta tempu pa nos baha man!

5. Dikon nos mester sigui prediká ku zelo den teritorio ku no ta parse produktivo?

⁵ Sigui Kosechá: Asta si nos a traha nos teritorio bes tras bes i ta parse ku e hendenan ta indiferente, nos tin bon motibu pa sigui prediká ku zelo i un sentido di urgensia. (2 Tim. 4:⁠2) Susesonan dramátiko den e mundu sa pone hende kambia nan aktitut i pensa seriamente riba futuro. Segun ku hóbennan ta bira mas grandi, nan ta sinti e nesesidat di tin siguridat i pas mental. Nos persistensia lo por impreshoná otro hende. Sí, hende ku no tabata skucha promé kisas por skucha ku tempu. Asta esnan ku intenshonalmente ta rechasá nos mensahe tin ku haña spièrtamentu.​—⁠Eze. 2:​4, 5; 3:⁠19.

6. Si nos teritorio ta difísil, kiko lo yuda nos keda ku zelo?

⁶ Si nos teritorio ta difísil, kiko por yuda nos keda ku zelo? Kisas nos por kombiná nos predikashon di kas pa kas ku otro rasgonan di sirbishi, manera prediká den teritorio di negoshi òf via telefòn. Tambe nos por varia nos presentashon pa asina nos tin maneranan nobo pa abordá hende. Nos lo por ahustá nos skèdjel di manera ku nos por sali den sirbishi atardi òf na oranan ku probablemente tin mas hende na kas. Podisé nos por hasi esfuerso pa siña un otro idioma pa nos por alkansá mas tantu hende ku e bon notisia. Kisas nos lo por amplia nos ministerio pa traha komo pionero regular. Òf nos por muda bai kaminda no tin hopi trahadó den e trabou di kosecha. Si nos tin e aktitut korekto pa ku e kosecha, nos lo hasi esfuerso diligente pa partisipá mas tantu posibel den e trabou importante akí.

7. Pa kuantu tempu mas nos mester sigui den e trabou di rekohementu?

⁷ E tempu ku kunukeronan tin pa rekohé e kosecha ta limitá, pues nan no ta floha òf bai mas sosegá miéntras ku nan no kaba ku e trabou. E kosecha spiritual ta rekerí e mesun sentido di urgensia. Pa kuantu tempu mas nos mester sigui den e trabou di rekohementu? Nos lo sigui durante “e konklushon dje sistema di kosnan” i te na “e fin.” (Mat. 24:⁠14; 28:⁠20, NW ) Meskos ku Yehova su Sirbidó prinsipal, nos ke kaba ku e trabou ku el a konfia na nos. (Juan 4:⁠34; 17:⁠4) P’esei, laga nos sigui efektuá nos ministerio ku zelo, goso i ku un aktitut positivo te na fin. (Mat. 24:⁠13) E trabou di kosecha no a kaba ainda!

[Komentario na página 2]

For di komienso te final, e tempu di kosecha ta un temporada di trabou intensivo