Ta Masha Importante pa Nos Mustra Pasenshi den Nos Ministerio
1. Kon Yehova a mustra pasenshi ku humanidat?
1 Yehova Dios tin masha pasenshi den su trato ku humanidat. (Eks. 34:6; Sal. 106:41-45; 2 Ped. 3:9) Un ehèmpel notabel di Su pasenshi ta relashoná ku e trabou di prediká e Reino ku ta tuma lugá rònt mundu. Yehova a hasi hopi esfuerso pa yuda humanidat pa kasi 2.000 aña kaba, i ainda e ta sigui hala hende di kurason sinsero serka dje. (Juan 6:44) Kon nos por imitá Yehova su pasenshi den nos ministerio?
2. Kon nos por mustra pasenshi ora di traha nos teritorio?
2 Sirbishi di Kas pa Kas: Nos ta imitá Yehova su pasenshi ora nos ta prediká “sin stòp” den teritorio kaminda hende no a mustra interes ainda. (Echo. 5:42, NW ) Si nos tin pasenshi, nos lo perseverá den nos sirbishi apesar di apatia, bofon i oposishon. (Mar. 13:12, 13) Nos ta demostrá pasenshi tambe ora nos ta sigui hasi esfuerso pa muha e simianan di bèrdat asta ora ta difísil pa haña personanan interesá na kas.
3. Dikon nos mester tin pasenshi ora di hasi rebishita i kondusí estudio di Beibel?
3 Estudio di Beibel: Pa kultivá un mata bo mester tin pasenshi. Nos por kuida e mata, pero nos no por aselerá su kresementu. (Sant. 5:7) Di mesun manera, kresementu spiritual ta sosodé gradualmente i den fase. (Mar. 4:28) E personanan ku nos ta studia Beibel kuné por haña ku ta difísil pa bandoná siñansanan religioso falsu òf kustumbernan ku no ta bíbliko. P’esei nos no mester preshoná nos studiantenan pa hasi kambio ku e meta pa aselerá nan kresementu spiritual. Mas bien, nos mester tene pasenshi i permití sufisiente tempu pa e spiritu di Dios traha riba kurason di e studiante.—1 Kor. 3:6, 7.
4. Kon pasenshi ta yuda nos pa ta mas efikas ora di prediká na un famia ku no ta Testigu?
4 Famia Ku No Ta Testigu: Maske nos tin un deseo fuerte pa nos famianan ku no ta Testigu siña e bèrdat, nos ta warda ku pasenshi pa e momento oportuno pa kompartí nos fe ku nan, sin bombardiá nan ku demasiado informashon. (Ekl. 3:1, 7) Mientrastantu, nos ta laga nos echonan i nos bon kondukta duna testimonio pa nos, semper kla pa ekspresá nos fe ku suavedat i rèspèt profundo. (1 Ped. 3:1, 15) Sí, ta masha importante pa nos mustra pasenshi den nos sirbishi. E ora ei nos sirbishi lo ta mas efikas i esaki lo agradá nos Tata selestial.