Testigunan di Yehova—Organisá pa Kompartí e Bon Notisia
Pa mas ku shen aña kaba, Testigunan di Yehova ta prediká e bon notisia na un manera organisá. Den e kampaña di predikashon di mas grandi ku mundu a yega di konosé, nos ta presentá e mensahe akí den sientos di idioma i den mas ku 230 pais. (Mat. 24:14) Dikon e trabou akí ta nesesario? Kon e ta ser hasí riba eskala mundial? E DVD Testigunan di Yehova—Organisá pa Kompartí e Bon Notisia ta kontestá e preguntanan ei, ya ku e ta duna un bista djaserka di e vários fasetanan di nos aktividat ku ta tuma lugá rònt mundu. Despues di a wak e DVD, trata di kontestá e siguiente preguntanan.
Den ki manera e DVD akí a oumentá bo apresio pa (1) e esfuerso ku Yehova su organisashon ta hasiendo pa prediká e bon notisia? (2 Tim. 4:2) (2) e famia di Bètel rònt mundu? (3) e entrenamentu ku misionero- i superintendentenan ta risibí? (2 Tim. 2:2) (4) e importansia di kuminsá kada dia ku konsiderashon di un teksto di Beibel i e preparashon tur siman pa e reunionnan di kongregashon? (Echo. 17:11) (5) e benefisionan di asistí na nos reunionnan kristian? (Heb. 10:24, 25) (6) e bendishonnan ku bo lo haña ora e paradeis ser restorá riba tera? (Isa. 11:9) (7) e privilegio ku bo tin di partisipá den e trabou di kosecha ku ta tumando lugá?—Juan 4:35.
E DVD akí ta un medio ekselente pa yuda personanan interesá familiarisá nan mes ku e trabou ku Testigunan di Yehova ta hasi rònt mundu. (8) Na ki tempu ta apropiá pa mustra studiante di Beibel, famia i otronan e DVD akí? (9) Ki reakshon positivo bo a haña for di esnan ku bo a laga wak e DVD akí?
Segun ku nos ta meditá riba tur loke Yehova ta hasi, nos ta sinti nos motivá pa reakshoná meskos ku e salmista, kende a bisa: “O SEÑOR mi Dios, hopi ta e maravianan ku bo a hasi, i bo pensamentunan pa ku nos; no tin ningun ku ta di kompará ku bo.” (Sal. 40:5) Laga nos hasi bon uso di e DVD akí pa yuda otro hende kultivá un apresio pa Yehova i su organisashon!