Plania for di Awor pa Sali Mas den Sirbishi
1. Ki oportunidat nos tin den e temporada di Memorial i kon nos por mustra esei?
1 Tur aña di nobo e temporada di Memorial ta duna nos oportunidat pa ekspresá nos profundo ‘gradisimentu na Yehova.’ (Sal. 109:30) Pero kon nos por mustra e apresio akí na Esun ku a perkurá e reskate? Wèl un manera pa hasi esei ta di sali mas den sirbishi durante e luna di mart benidero. Bo por kuminsá plania for di awor pa esaki.—Pro. 21:5.
2. Kon abo i otro ruman a sinti aña pasá ora a anunsiá e posibilidat di traha pionero ousiliar den aprel a base di 30 ora?
2 Traha Pionero Ousiliar: Aña pasá, rumannan rònt mundu tabata hopi kontentu ora nan a tende ku tin e oportunidat pa traha pionero ousiliar den aprel a base di 30 ora. Un ruman hòmber a skirbi: “Mi ta bai skol sekundario ainda i mi no por a logra traha pionero regular. Ma mi ta bai yena e formulario pa traha 30 ora den aprel i hasi esfuerso pa yega 50.” Un ruman muhé ku ta traha henter siman a skirbi: “Trinta ora, esei sí mi por yega!” Ora un ruman muhé di 80’i piku aña, kende ántes tabata pionero, a tende e anunsio akí, el a bisa: “Ta riba esaki mi tabata warda! Yehova sa ku e mihó añanan di mi bida tabata den e trabou di pionero.” Otro rumannan ku no por a traha pionero ousiliar a pone meta pa oumentá nan oranan.
3. Ki motibu nos tin pa traha pionero ousiliar durante mart, aprel i mei?
3 Mart lo ta un ekselente luna pa traha pionero ousiliar, pasobra lo tin oportunidat atrobe pa traha sea 30 òf 50 ora. Ademas, riba djasabra 17 di mart nos lo kuminsá ku nos kampaña spesial di invitá hende pa Memorial dia 5 di aprel. Hopi ruman lo sinti asina un goso di por oumentá nan sirbishi ku nan lo ke traha pionero ousiliar den aprel i mei tambe, kumpliendo ku e rekisito di 50 ora.
4. Kiko nos por hasi pa sali mas den sirbishi i ku ki resultado?
4 Kisas boso por usa e próksimo anochi di Adorashon Komo Famia pa plania kon kada miembro di famia por sali mas den sirbishi durante e temporada di Memorial. (Pro. 15:22) Pidi Yehova den orashon pa bendishoná bo esfuersonan. (1 Huan 3:22) Ora bo sali mas den sirbishi, no solamente bo ta alabá Yehova mas sino tambe bo ta oumentá bo goso.—2 Kor. 9:6.