Satisfecho ku e Fruta di Tur Nos Trabou
1. Kiko por pone nos pèrdè un poko di nos entusiasmo?
1 Dios a krea hende ku e kapasidat di “mira e bon ku tin den tur su trabou.” (Ekl. 3:13) P’esei, ora nos sirbishi no duna e resultado ku nos ta deseá, nos por sinti nos mes desanimá i nos por pèrdè un poko di nos entusiasmo. Kiko por yuda nos keda ku un aktitut positivo?
2. Pakiko nos mester keda ku un ekspektativa realístiko?
2 Keda ku un Ekspektativa Realístiko: Aunke masha tiki hende a aseptá Hesus su mensahe, su predikashon sin duda tabatin éksito. (Huan 17:4) Den e ilustrashon di e sembradó, Hesus a profetisá ku mayoria di hende lo no aseptá e mensahe di Reino ku el a kompará ku simia. (Mat. 13:3-8, 18-22) Apesar di esei, nos esfuersonan diligente ta logra hopi.
3. Kon nos por “duna fruta,” asta si ta poko hende so aseptá e mensahe ku nos ta prediká?
3 Kon Nos Ta Duna Hopi Fruta? Segun e ilustrashon di e sembradó, hende ku aseptá e mensahe lo “duna fruta.” (Mat. 13:23) Ora un palu di trigu krese i madurá, e no ta produsí un otro palu di trigu, sino mas bien e ta produsí simia nobo. Asina tambe, e fruta ku un kristian ta produsí no nesesariamente ta un disipel nobo, sino e kantidat di simia di Reino ku e ta sembra kada bes ku e prediká. E “bon” ku nos ta logra ku nos sembramentu ta duna nos satisfakshon, sea ku hende skucha òf nò. Nos predikashon ta kontribuí na santifikashon di e nòmber di Yehova. (Isa. 43:10-12; Mat. 6:9) I ta un privilegio pa ta kompañero di trabou di Dios. (1 Kor. 3:9) Ademas, Yehova ta keda kontentu ora nos ofres’é “e fruta di nos lepnan.”—Heb. 13:15, 16.
4. Ki fruta nos por produsí sin ku nos mes sa?
4 Nos mester bisa tambe ku no ta semper nos ta mira e resultado di tur nos trabou. Kisas algun di e hendenan ku a skucha Hesus su mensahe no a bira su disipel miéntras e tabata riba tera ainda. Meskos por pasa ku e simia di Reino ku nos sembra den kurason di un persona. Kisas e simia ta tarda pa saka rais i krese, pero ku tempu e persona por bira un Testigu sin ku nos mes sa. Sin duda, nos ta logra hopi kos bon den sirbishi. P’esei, laga nos “sigui duna hopi fruta” i demostrá ku nos ta disipel di Hesus.—Huan 15:8.