Tuma e Profetanan Komo Ehèmpel: Ámos
1. Dikon e ehèmpel di Ámos por ta un animashon pa nos?
1 Bo a yega di sinti ku bo no ta kapasitá pa prediká pasobra bo no tin muchu skol i ta bini di un famia pober? Si ta asina, e ehèmpel di Ámos por ta un animashon pa bo. Ámos tabata un simpel wardadó di karné i a traha den kunuku durante sierto temporada so. Ma Yehova a dun’é poder pa proklamá un mensahe importante. (Ámos 1:1; 7:14, 15) Den nos tempu tambe Yehova ta usa hende humilde i di poko rekurso. (1 Kor. 1:27-29) Ki lès mas nos por siña di profeta Ámos ku por yuda nos den nos sirbishi?
2. Dikon nos por para firme ora nos ta enfrentá oposishon den sirbishi?
2 Para Firme Apesar di Oposishon: Amasias tabata un saserdote ku a adorá bisé i tabata pertenesé na Israel su reino di dies tribu di nort. Ora el a tende Ámos profetisá, el a bis’é, na moda di papia: ‘Bai bo kas! Laga nos na pas! Nos tin nos mes religion kaba!’ (Ámos 7:12, 13) Amasias a pidi Rei Jeroboam pa prohibí Ámos di kumpli ku su asignashon. I pa logra esei, el a trose e palabranan di e profeta. (Ámos 7:7-11) Pero Ámos no a laga Amasias intimid’é. Awe, algun miembro di klero ta buska apoyo polítiko den nan esfuerso pa persiguí Yehova su pueblo. Sinembargo, Yehova ta sigurá nos ku ningun arma ku wòrdu formá kontra nos lo no tin éksito duradero.—Isa. 54:17.
3. Menshoná dos aspekto di e mensahe ku nos ta proklamá awe.
3 Proklamá Dios Su Huisio i Su Bendishonnan pa Futuro: Aunke Ámos a profetisá huisio kontra e reino di dies tribu di Israel, el a bisa na final di e buki bíbliko ku ta karga su nòmber ku Yehova lo restorá Israel i bendishon’é rikamente. (Ámos 9:13-15) Nos tambe ta papia di Dios su binidero “dia di huisio,” pero esaki ta djis un parti di e ‘bon notisia di Reino’ ku nos mester proklamá. (2 Ped. 3:7; Mat. 24:14) Ora Yehova destruí e malbadonan na Armagedon, esaki lo habri kaminda pa un paradeis terenal.—Sal. 37:34.
4. Dikon nos ta sigur ku nos por kumpli ku Yehova su boluntat?
4 Sin duda, e echo ku nos ta prediká e mensahe di Reino den un mundu yen di opositor ta pone nos dedikashon na Yehova i nos determinashon pa hasi su boluntat na prueba. (Huan 15:19) Ma nos ta sigur ku Yehova lo sigui kapasitá nos pa nos por kumpli ku su boluntat meskos ku el a hasi ku Ámos.—2 Kor. 3:5.