Ken Awe Ta Hasi e Boluntat di Yehova?
1. Ki dia nos lo kuminsá studia e foyeto Ken Awe Ta Hasi e Boluntat di Yehova? i kon esaki lo benefisiá nos?
1 Entrante e siman di 28 di òktober, nos lo kuminsá studia e foyeto Ken Awe Ta Hasi e Boluntat di Yehova? na e Estudio di Beibel di Kongregashon. E foyeto nobo akí, ku nos a haña na e Kongreso di Distrito “Protehá Bo Kurason!,” a ser prepará pa dirigí studiantenan di Beibel na e organisashon. Un análisis di e foyeto akí no solamente lo duna nos mas apresio pa e echo ku nos ta parti di Yehova su organisashon, sino tambe lo e yuda nos familiarisá nos mes ku e publikashon balioso akí ku ta bon pa usa den sirbishi.—Sal. 48:13.
2. Kon nos lo studia e foyeto den kongregashon?
2 Kon Nos Lo Studia e Foyeto? E ruman ku ta dirigí e estudio lo mester distribuí su tempu bon pa kada lès por haña su debido atenshon. Lo e introdusí kada un di e 28 lèsnan lesando e pregunta ku a la bes ta e tema di kada lès, i despues pidi e lesadó pa lesa e paragraf di introdukshon. Kaba, e ta hasi e presentenan un pregunta ku el a prepará pa e introdukshon. Siguientemente, e ta laga lesa kada sekshon ku ta kuminsá ku lèter diki i trata nan un pa un. Despues di lesa un sekshon, e ruman ku ta dirigí lo puntra e presentenan kon esaki ta kontestá e pregunta ku ta e tema di e lès. Tambe e rumannan por duna komentario riba e plachinan. Si tin tempu, por laga lesa e tekstonan klave. Promé ku pasa pa e siguiente lès, e ruman ku ta dirigí lo hasi un repaso usando e preguntanan ku tin na final di e página. Si tin e kuadro “Bo Ke Sa Mas?,” e mester laga e lesadó les’é i invitá e presentenan pa komentá kon un studiante di Beibel lo por benefisiá di e sugerensianan ei. Na final di e Estudio di Beibel di Kongregashon, si tempu permití, por usa e título di e lèsnan komo pregunta di repaso. Tene kuenta sí ku esaki no nesesariamente ta e prosedura ku nos mester sigui ora nos ta dirigí un estudio di Beibel.
3. Kiko nos mester hasi pa nos por benefisiá plenamente di e estudio di e foyeto akí?
3 Pa nos por benefisiá plenamente di e estudio di e foyeto akí, nos mester bini reunion bon prepará. Hasi esfuerso pa duna komentario. Durante e estudio, pensa kon e informashon lo por benefisiá studiantenan di Beibel. E análisis di e foyeto nobo akí lo ekipá nos pa yuda otro hende hasi e boluntat di Dios pa asina nan tambe por tin e speransa di biba pa semper.—1 Huan 2:17.