Prepará un Bon Introdukshon
1. Dikon un bon introdukshon ta importante?
1 Meskos ku un bon aperitivo ta habri apetit pa e plato prinsipal, un bon introdukshon ta habri kaminda pa un kòmbersashon agradabel tokante Beibel. Un bon introdukshon por varia di largura i tópiko, pero meskos ku un kuminda sabroso, e ta rekerí pa nos pensa i prepará di antemano. (Pro. 15:28) Ki ora nos ta papia di un bon introdukshon?
2. Kon nos por prepará un introdukshon ku ta interesante?
2 Skohe Tópiko Interesante: Nos introdukshon tin ku lanta interes di e doño di kas, sino e por para e kòmbersashon. Pues, ora nos ta prepará, pensa ki tópiko lo interesá hende den e teritorio. Nan ta interesá den bon gobernashon, den un bida di famia felis òf den fin di guera? Generalmente hende gusta duna nan opinion; pues prepará un pregunta ku ta pone nan pensa. Nos por usa un di e introdukshonnan ku tin den Nos Ministerio di Reino i adapt’é na nos teritorio. Pues, pakiko no praktiká de bes en kuando algun introdukshon durante boso Adorashon Komo Famia?
3. Kon nos por ahustá nos introdukshon di akuerdo ku kustumber i kreensia di e hendenan den nos teritorio?
3 Tene Kuenta ku Kustumber i Kreensia: Na algun lugá, hende ke pa nos bisa mesora e motibu di nos bishita. Otro kaminda, un bishitante ku no puntra e doño di kas kon ta bai òf kisas no bisa ta ken e ta, tin mal manera. Na algun lugá, kaminda e hendenan ta mas religioso, nos por referí na Beibel den nos introdukshon sin ningun problema. (Echo. 2:14-17) Pero, kaminda hende no ta pertenesé na un religion kristian òf no ta kere mes den Dios, lo ta mas mihó pa papia di Beibel ora nos bai bèk serka nan i no na e promé bishita.—Echo. 17:22-31.
4. Kiko nos tin ku tene kuenta kuné ora nos ta prepará e promé palabranan di nos introdukshon?
4 Bo Promé Palabranan: Prepará bo promé palabranan bon. Por lo general, ta mihó usa frasenan kòrtiku i simpel. E manera ku bo ta bisa bo promé palabranan tambe ta importante. Mustra entusiasmo. Pone un sonrisa amigabel riba bo kara ku ta reflehá bo interes den e doño di kas. Si nos sigui e sugerensianan akí, nos lo prepará introdukshonnan apetitoso ku ta animá hende den nos teritorio pa kome na “e mesa di Yehova.”—1 Kor. 10:21.