“Reuní e Pueblo”
1. Den ki sentido kongresonan di distrito i internashonal ta meskos ku e reunion importante ku e israelitanan tabatin despues ku nan a sali for di Egipto?
1 Djis despues ku e israelitanan a sali for di Egipto, Yehova a manda Moises pa “reuní e pueblo” na Seru Sinaí pa nan skucha Su palabranan, haña temor di Dje i siña nan yunan kana den Su kamindanan. (Deu. 4:10-13) E okashon memorabel akí sin duda a fortalesé nan fe. Den e próksimo lunanan, Yehova su pueblo tambe lo reuní na nan kongresonan di distrito i internashonal pa Yehova siña nan. Kiko nos tin ku hasi pa nos benefisiá plenamente di e okashon akí?
2. Kiko nos tin ku hasi pa nos “ta kla” pa nos kongreso?
2 Bo Mester “Ta Kla”: Yehova a bisa e israelitanan ku nan mester ‘tabata kla’ pa e reunion ei na Seru Sinaí. (Eks. 19:10, 11) Awe tambe, tur hende ku lo asistí na e kongresonan mester prepará, pues, no solamente esnan ku ta partisipá den e programa. Por ehèmpel, hopi ruman ku ta traha tin ku pidi dia liber. Kisas bo ta den e mesun situashon ku Nehemías, kopero di Rei Artaherhes. Nehemías tabata ke tuma liber pa e por a bai Herúsalèm i yuda ku rekonstrukshon di e murayanan, pero e tabata sa ku e rei kisas lo no a dun’é liber. P’esei, Nehemías a hasi un orashon, pensa bon kiko e tabata bai bisa anto ku kurashi el a hasi su petishon. E rei a dun’é liber i asta a apoyá e proyekto di konstrukshon. (Neh. 2:1-9) Aparte di pidi bo doño di trabou dia liber, bo a regla asuntu di transporte i, si mester, lugá di keda kaba? Si bo mester di yudansa, e ansianonan lo ta kla pa duna un man den esei. Perkurá pa bo ta trempan na tur seshon i pa bo ta kla pa “presta mas atenshon ku di kustumber” na e palabranan ku lo bo skucha.—Heb. 2:1.
3. Kiko lo yuda nos prepará nos kurason pa kongreso?
3 Pa nos por “ta kla,” ta importante tambe pa nos prepará nos kurason pa skucha i siña. (Èsd. 7:10, NW) For di adelantá lo pone e programa di kongreso riba nos website jw.org, ku e temanan di tur diskurso huntu ku un òf dos teksto klave. Lo ta bon pa nos trata e informashon akí den nos Adorashon Komo Famia durante e simannan promé ku e kongreso ku nos ta asigná na dje. Algun publikadó ta prent e programa i us’é pa hasi anotashon kòrtiku durante e kongreso.
4. Kon mayornan por usa e kongreso pa nan siña nan yunan?
4 ‘Siña Bo Yunan’: Un di e motibunan pakiko Yehova a bisa e pueblo di Israel pa reuní na Seru Sinaí tabata pa e mayornan “siña nan yunan.” (Deu. 4:10) Mayornan tin e mesun bunita oportunidat akí na kongreso. Pa logra esaki, mayornan tin ku laga nan yunan sinta banda di nan durante e seshonnan i yuda nan presta atenshon. Asina, kada miembro di e famia por konta kiko el a siña di e programa na fin di kada dia òf despues, durante nan Adorashon Komo Famia.
5. Kon nos lo benefisiá ora nos asistí na nos binidero kongreso?
5 E kongreso históriko na Seru Sinaí a yuda e israelitanan balorá nan privilegio sin igual di ta e pueblo di Dios. (Deu. 4:7, 8) E meta di nos binidero kongreso ta pa motivá nos den mesun direkshon. Pa tres dia nos lo por ta den nos paradeis spiritual refreskante i disfrutá di kompania edifikante, leu for di e mundu kruel di Satanas ku ta manera un desierto. (Isa. 35:7-9) Segun ku e dia di Yehova ta yega serka, laga nos no pèrdè e oportunidat akí di reuní huntu pa animá otro.—Heb. 10:24, 25.