Kantika Nobo pa Alabá Yehova!
1 Dia 4 di òktober 2014 tabatin e reunion anual di Watch Tower Bible and Tract Society of Pennsylvania. Na e okashon akí a anunsiá ku tin plan pa revisá nos buki di kantika. Sin duda esei tabata un notisia emoshonante. Tur esnan presente a ser rekordá ku kantika di alabansa ta importante den nos adorashon.—Sal. 96:2.
2 Pero dikon tin ku revisá e buki di kantika? Tin vários motibu. Pa di promé, awor nos tin mihó komprondementu di algun siñansa di Beibel i esei ta pone ku letra di algun kantika kisas tin ku kambia. (Pro. 4:18) Di dos, na ingles hopi ekspreshon den nos buki di kantika aktual ta basá riba e edishon anterior di e Tradukshon di Mundu Nobo. Pues, mester ahustá e letranan pa kuadra ku e palabranan di e edishon revisá. Ademas, komo ku lo mester kambia e buki di kantika konsiderablemente, a opta pa agregá algun kantika nobo tambe.
3 Afortunadamente nos no tin ku warda hopi pa kuminsá kanta e kantikanan nobo. Durante e siguiente lunanan lo publiká algun di e kantikanan nobo riba nos website, jw.org. Asina ku haña un kantika nobo lo hink’é den e programa di Reunion di Sirbishi ku e nota “kantika nobo.”
4 Yudansa pa Siña Kantika Nobo: Siña un kantika nobo tin biaha no ta bai un, dos, tres. Pero meskos ku e salmista nos ‘no ke keda ketu’; nos ke kanta na reunionnan di kongregashon ku henter nos kurason. (Sal. 30:12) Pa bo siña kanta un kantika nobo, hasi lo siguiente.
Regularmente skucha e grabashon musikal, ku lo bai tin riba jw.org. Mas bo skucha e melodia, mas fásil bo ta kòrd’é.
Studia e letra i purba di siñ’é for di kabes.
Kanta e kantika te ora bo por e bon.
Praktiká e kantikanan nobo durante boso Adorashon Komo Famia te ora boso por kanta nan di kurason.
5 Durante e binidero lunanan, ora tin un kantika nobo na final di e Reunion di Sirbishi, e kongregashon lo skucha e grabashon musikal promé. I despues lo kanta e kantika manera nos tin kustumber di hasi.
6 En realidat, kanta na nos reunionnan ta un okashon masha spesial ya ku e ta un manera ku nos por alabá Yehova huntu. P’esei, nos no mester krea e kustumber di lanta bai for di nos asiento ora anunsiá ku ta bai kanta.
7 Tin un manera mas ku nos por demostrá e debido balor na nos muzik. Na asamblea i kongreso, promé ku kada seshon kuminsá, ta toka un intermedio musikal. Dos biaha pa aña rumannan for di tur skina di mundu ta biaha bai Patterson, New York, riba nan mes gastu pa graba tur muzik ku nos ta usa den nos adorashon. Pues, ora e presidente di seshon pidi nos pa tuma asiento i skucha e orkesta musikal, nos mester hasi esei mesora. Esaki ta yuda nos dediká, esta, prepará nos kurason pa e informashon ku nos lo bai haña.—Èsd. 7:10.
8 Awe nos lo sera nos reunion ku un kantika nobo. A presentá e kantika akí na e reunion anual, i a komponé pa konmemorá e 100 aña di nasementu di e Reino.
9 Sin duda, e kantikanan nobo ta algun di e kosnan bon ku nos a haña for di Yehova. (Mat. 12:35a) Laga nos pone komo meta pa siña e kantikanan akí i kanta nan di kurason. Asina nos ta duna Dios e alabansa i onor ku e meresé!—Sal. 147:1.