Imitá Nan Fe
1. Kua buki nos lo studia for di e siman di 19 di òktober na e Estudio di Beibel di Kongregashon?
1 For di e siman di 19 di òktober 2015, nos lo kuminsá studia e buki Imitá Nan Fe na e Estudio di Beibel di Kongregashon. E publikashon akí ta trata relatonan bíbliko di 14 hòmber i muhé di fe. Ora nos lesa e buki akí, e personahenan, ku tur e problema- i desafionan ku nan a enfrentá pa keda leal na Yehova ta bira mas real pa nos. Ademas, nos ta siña lèsnan práktiko pa nos bida.—Heb. 6:12.
2. Menshoná algun rasgo di e buki Imitá Nan Fe.
2 Algun Rasgo di e Buki: E buki tin mapa i liña di sekuensia di susesonan pa yuda nos mira na ki tempu i na unda kada personahe a biba. Kada kapítulo tin un sekshon “Meditá Riba Esaki . . . ” E sekshon akí ta yuda nos meditá riba e relato i pone e lèsnan ku nos a siña na práktika. Ademas, e buki tin yen di plachi kolorido i hopi detayá ku ta hasi e relato mas real pa nos.
3. Kon nos por saka benefisio ora di studia e buki akí?
3 Kon Nos Por Saka Benefisio?: E karta di e Kuerpo Gobernante na komienso di e buki ta animá nos ku e palabranan akí: “Usa boso imaginashon; usa tur boso sentidonan. Trata di sinti loke e personahenan ei a sinti, di mira loke nan a mira. Kompará e manera ku nan a reakshoná den sierto situashon ku e manera ku boso lo a reakshoná.” Klaru ku usa nos imaginashon no ke men ku nos ta bai spekulá; mas bien nos tin ku visualisá loke e relato inspirá ta bisa i pone nos mes den sapatu di e personahenan. Esaki ta eksigí tempu i esfuerso. (Neh. 8:8) Si e lès di un siman ta kuminsá meimei di un kapítulo, e ruman ku ta dirigí lo duna un resumen di e lès di e siman ku a pasa den ménos ku ún minüt. Si e sekshon “Meditá Riba Esaki . . . ” no ta asigná den e lès, e ruman por hasi un òf dos pregunta komo repaso.
4. Dikon ta importante pa nos studia e buki Imitá Nan Fe?
4 Nos ta biba den un mundu ku tur dia di nobo ta purba di debilitá nos fe di un manera òf otro. Tantu e buki akí komo e seri Imitá Nan Fe ku ta ser publiká den E Toren di Vigilansia ta un regalo for di Yehova ku ta yuda nos hasi nos fe fuerte. (Sant. 1:17) Laga nos ta presente tur siman na e Estudio di Beibel di Kongregashon i partisipá ku nos komentarionan pa asina nos saka pleno probecho!