Usa e Foyeto Bon Notisia pa Siña Hende
1. Kon e foyeto Bon Notisia ta hinká den otro?
1 Manera Nos Ministerio di Reino di yüli a trese padilanti, un hèrmènt básiko pa siña hende e bèrdat ta e foyeto Dios Tin Bon Notisia pa Nos! E tekstonan di Beibel menshoná den e foyeto no ta sitá ya asina e studiante por lesa nan dirèkt for di Beibel. Aunke ku mayoria di nos publikashonnan un persona por studia i siña e bèrdat riba su mes, ku e foyeto akí sí e mester di un maestro. P’esei, ora nos ofresé e persona e foyeto, nos mester mustr’é kon un estudio di Beibel ta bai pa asina e mira kon interesante ta pa siña e bon notisia ku tin den Beibel.—Mat. 13:44.
2. Kon nos por usa e foyeto Bon Notisia na e promé bishita?
2 Na e Promé Bishita: Bo por bisa: “Hopi hende ta puntra nan mes kiko ta bai para di e mundu akí. Bo ta kere ku kos lo drecha un dia? [Permití e persona kontestá.] Bo tabata sa ku Beibel tin bon notisia ku ta duna speransa? Wak algun pregunta ku Beibel ta kontestá.” Duna e persona un foyeto i pidié skohe for di e último página di e foyeto un pregunta ku ta interes’é. Despues usa e promé paragraf di e lès ku e skohe i demostr’é kon nos ta studia Beibel ku hende. Tambe bo por hasi e persona un pregunta basá riba un lès ku abo a skohe i mustr’é kon e foyeto ta yud’é haña e kontesta den Beibel. Si riba jw.org tin un vidio di e mesun tópiko, bo por inkluí esaki den bo presentashon.
3. Splika kon nos por dirigí un estudio for di e foyeto Bon Notisia.
3 Kon pa Dirigí e Estudio: (1) Lesa e pregunta numerá ku ta skirbí ku lèter diki pa hala e persona su atenshon na e punto prinsipal. (2) Lesa e paragraf. (3) Lesa e tekstonan di Beibel ku ta skirbí ku lèter skùin i usa otro preguntanan bon pensá pa yuda e persona mira kon Beibel ta kontestá e pregunta numerá. (4) Si tin mas ku un paragraf bou di e pregunta, ripití paso 2 i 3. Si tin un vidio di e mesun tópiko, bo por laga e persona wak e si bo no a hasié ainda. (5) Por último, pidi e persona kontestá e pregunta, asina bo tin sigur ku el a komprondé e informashon bon.
4. Kiko bo por hasi pa yuda bo usa e hèrmènt balioso akí ábilmente?
4 Familiarisá bo mes ku e hèrmènt balioso akí i us’é tur momento apropiá. Promé ku kada estudio, pensa riba e studiante i e mihó manera pa rasoná kuné, usando e tekstonan den e lès. (Pro. 15:28; Echo. 17:2, 3) Segun ku bo ta haña mas eksperensia i ta bira mas ábil den usa e foyeto, lo bo por haña ku e foyeto akí por bira un di bo hèrmèntnan faborito pa siña hende e bèrdat.