Nos Kreador Stima Nos i Ta Interesá den Nos

1. NOS KREADOR TA LAGA SOLO SALI

Bo por imaginá bida riba tera sin solo? Solo ta perkurá energia pa mata, i mata, na nan turno, ta produsí blachi, flor, fruta, nechi i simia. Ademas, solo ta pone mata apsorbá awa for di tera via di nan rais i ta manda e awa ei na e blachinan. Despues, e awa ta evaporá i bai den aire.

Un plantashon di te masha bèrdè i bunita na barika di seru.

2. NOS KREADOR TA LAGA AWA KAI

Áwaseru ta un regalo presioso di Dios. Áwaseru ta yuda tera produsí kuminda pa nos por kome. Dios ta duna nos áwaseru for di shelu i tempu di bon kosecha, i asina e ta laga nos haña kuminda na abundansia i ta yena nos kurason ku alegria.

Un para riba un taki ta rèk pa kue un bèshi ku ta kai.

3. NOS KREADOR TA SÒRU PA NOS HAÑA KUMINDA I PAÑA

Hopi tata di famia ta preokupá pa haña sufisiente kuminda i paña pa nan famia. Tuma nota di loke e Palabra di Dios ta bisa: “Opservá e paranan di shelu bon; nan no ta sembra ni kosechá ni warda kuminda den mangasina. Tòg boso Tata selestial ta alimentá nan. Boso no ta bal mas ku nan?”—Mateo 6:25, 26.

“Siña un lès for di e manera ku e flornan di mondi ta krese; . . . ma mi ta bisa boso ku ni Rei Sálomon den tur su gloria no a bisti manera un di e flornan akí. Awor bon, si ta asina Dios ta bisti yerba di mondi, . . . kuantu mas lo e no bisti boso?”—Mateo 6:28-30.

Si Dios por perkurá kuminda i paña pa nos, siguramente lo e por yuda nos ku tur otro kos ku nos tin mester di dje. Si nos ta purba di hasi Dios su boluntat, e por bendishoná e esfuerso ku nos ta hasi pa planta pa asina nos por haña kuminda òf e por yuda nos haña un trabou di manera ku nos por kumpra loke nos tin mester.—Mateo 6:32, 33.

Ora nos pensa riba tur loke Dios ta perkurá pa nos, manera solo, áwaseru, para i flor, sin duda, nos ta mira ku nos tin bon motibu pa stima Dios. E siguiente artíkulo lo splika kon nos Kreador a komuniká ku hende.