Demostrá Amabilidat i Bondat na Otronan

WAK kiko a atraé tantu Lisaa komo Anne na e bèrdat. Lisa a bisa: “E rumannan tabata hopi amabel i esei a impreshoná mi.” Anto Anne a bisa algu kasi meskos. El a bisa: “M’a ègt gusta kon amabel e Testigunan tabata. Na promé instante, eigenlijk m’a gusta esei mas ku loke mi tabata siñando for di nan.” Aunke e dos rumannan ei aworakí ta disfrutá di lesa Beibel i di meditá riba dje, ta e amabilidat i bondat di e rumannan a hunga un ròl hopi importante.

Kon nos por demostrá amabilidat na un manera ku e por tin un efekto positivo riba otro hende? Wèl, den e artíkulo akí nos lo mira dos manera: ku nos palabra i ku nos akshonnan. Djei, nos lo mira ku ken nos mester ta amabel.

PAPIA NA UN MANERA AMABEL I KARIÑOSO

E bon esposa ku Proverbionan 31 ta deskribí ta papia na un manera amabel. (Pro. 31:26) E ta demostrá kariño i amabilidat den su abla. Pero, esposo- i tatanan tambe mester siña papia na un manera kariñoso i amabel. Mayoria di mayor sa ku si nan papia brutu òf skèrpi ku nan yunan, esei lo tin un mal efekto i nan yunan por laga nan pasa bèrgwensa. Pues, pa mayornan haña mihó resultado lo ta bon pa nan hasi esfuerso pa papia na un manera amabel.

Sea ku bo tin yu òf nò, kon bo por papia na un manera amabel? Proverbionan 31:26 ta yuda nos. E ta bisa ku e bon esposa “ta habri su boka ku sabiduria.” Esei ta enserá skohe bo palabranan bon i skohe kon bo ta bisa nan. Generalmente ta bon pa puntra bo mes: ‘E kos ku mi t’ei bisa lo yuda e situashon òf hasié pió?’ (Pro. 15:1) Pues, ta sabí pa bo pensa promé ku bo papia.

Proverbionan 12:18 ta bisa: “Tin hende ta papia sin pensa, manera hinká di spada.” Ora nos kòrda ku nos palabranan i tono tin efekto riba hende, nos lo kontrolá e manera ku nos ta ekspresá nos mes. P’esei, si nos ke ta amabel, nos lo evitá di usa palabranan fo’i sla i un tono brutu. (Efe. 4:31, 32) Nos lo evitá pensamentu i abla negativo i kuminsá usa palabranan amabel i un tono kariñoso. Yehova a pone e mihó ehèmpel den esei. Ora ku su sirbidó Elías tabatin miedu, e angel ku tabata representá Yehova a papia ku “un stèm suave i trankil.” (1 Rei. 19:12) Pero, no ta ku nos palabranan so nos por ta amabel, nos por demostrá e kualidat ei tambe ku nos akshonnan. Kon asina?

NOS AKSHONNAN POR MOTIVÁ OTRONAN

Ora nos ta imitá Yehova, esei ta enserá ku nos abla i akshonnan ta amabel. (Efe. 4:32; 5:1, 2) Lisa, menshoná anteriormente a splika kon amabel e Testigunan tabata kuné. El a bisa: “Diripiente un dia henter nos famia mester a muda. Dos pareha Testigu a pidi liber di trabou pa yuda nos. E tempu ei, ni studia mi no tabata studia ainda.” E bondat i amabilidat di e rumannan ei a duna Lisa gana di sa mas tokante e bèrdat.

Anne, menshoná mas promé tambe a apresiá ku e Testigunan tabata amabel kuné. El a bisa: “Debí ku mundu ta asina malu, m’a pèrdè konfiansa den hende. P’esei ora m’a topa e Testigunan, mi no a konfia nan. Mi tabata puntra mi mes: ‘Dikon nan ta asina lief ku mi; ki intenshon nan tin?’ Pero e Testigu ku tabata studia mi di bèrdat tabata amabel i esei a duna mi konfiansa den dje.” Kiko tabata e resultado? Anne a sigui bisa: “Ku tempu, m’a kuminsá presta mas atenshon na e kosnan ku mi tabata siña.”

Ripará ku e bondat i trato amabel di e Testigunan a impreshoná Lisa i Anne. Sí, ta eseinan a atraé nan na e bèrdat.

IMITÁ DIOS SU AMABILIDAT I BONDAT DEN BO TRATO KU OTRONAN

Debí na kultura òf personalidat, ta masha fásil pa algun hende smail òf usa palabranan amabel. No tin nada malu den esei. Pero, si esei ta nan úniko motibu, e ora ei nan no ta imitando Dios su amabilidat.—Kompará ku Echonan 28:2.

Berdadero amabilidat i bondat ta parti di e fruta di Dios su spiritu santu. (Gal. 5:22, 23) Pues, pa nos demostrá e kualidatnan ei, nos tin ku laga Dios su spiritu santu influensiá nos pensamentu- i akshonnan. Ora nos hasi esei, nos ta imitá Yehova i Hesus. Klaru, meskos ku Hesus, di kurason nos ta interesá den hende. Pues, loke ta motivá nos pa ta amabel ta tantu nos amor pa Yehova komo nos amor pa hende.

KEN NOS MESTER TRATA KU BONDAT?

Generalmente ta fásil pa ta bondadoso ku un hende ku bo konosé òf ku ta trata bo bon. (2 Sám. 2:6) I un manera ku bo ta hasi esei ta di yama nan danki. (Kol. 3:15) Pero kiko awor si bo ta sinti ku un hende no meresé pa bo ta bondadoso kuné?

Pensa riba esaki: Yehova ta mustra bondat asta na hende ku no meresé esei. Anto no tin niun persona ku ta hasi esei mihó kuné. Hopi biaha e Skritura Griego Kristian ta usa e ekspreshon “bondat inmeresí.” Kon Yehova ta mustra bondat?

Yehova ta mustra bondat na tur hende. E semper ta duna nan loke nan tin mester pa biba. (Mat. 5:45) De echo, asta promé ku nos tabata konosé Yehova, ya el a mustra nos bondat. (Efe. 2:4, 5, 8) Entre otro, el a duna humanidat lo mihó ku e tabatin, esta, su Yu unigénito. Apòstel Pablo a skirbi ku debí na “e rikesa di Dios su bondat inmeresí,” nos por benefisiá di e reskate ei. (Efe. 1:7) Ademas, ora nos peka i hasi Yehova tristu, tòg e ta sigui guia i siña nos. Su instrukshon i palabranan ta manera gota suave di awa. (Deu. 32:2) Nunka nos lo por paga Yehova bèk pa tur e bondat ku e ta mustra na nos. Anto e bèrdat ta ku sin Yehova su bondat inmeresí, nos lo no tin un speransa pa futuro.—Kompará ku 1 Pedro 1:13.

Sin duda, e manera ku Yehova ta mustrá bondat ta hopi bunita. I esei ta motivá nos pa, na lugá di mustra bondat na sierto hende so, nos mustra bondat tur dia na tur hende. (1 Tes. 5:15) Ora nos ta bondadoso, nos lo ta manera un kandela sendí kantu di laman riba un anochi friu. Nos famia, e rumannan den kongregashon, nos koleganan, kompañeronan di skol i bisiñanan lo gusta ta rònt di nos.

Tin un hende den bo famia òf den bo kongregashon ku por benefisiá di bo amabilidat i bondat? Kisas tin un ruman den bo kongregashon ku mester di yudansa rònt di kas, den kurá òf ku algu ku e tin kustumber di hasi, manera bai hasi kompra. Ademas di esei, bo por mustra bondat den sirbishi tambe. Kon asina? Wèl, si tin un hende ku mester di yudansa, abo por dun’é un man.

P’esei, imitá Yehova i laga nos palabranan i akshonnan semper ta amabel i bondadoso.