Bo Nòmber Ta den “e Buki di Bida”?

1. Segun Malakías 3:16, kua buki Yehova ta skirbiendo, i kiko tin aden?

YEHOVA tin un buki spesial ku e tin míles di aña ta skirbi aden. Den e buki ei tin un lista di nòmber di tur e sirbidónan fiel, kuminsando for di Abel.b (Luk. 11:50, 51) Komo ku Yehova tin hopi tempu ta skirbi aden, tin miónes di nòmber den dje. Den Beibel, e buki ei ta ser yamá “buki di memoria” i “buki di bida.” Pero, den e artíkulo akí nos lo referí na dje komo “buki di bida.”—Lesa Malakías 3:16; Rev. 3:5; 17:8.

2. Ken su nòmber ta skirbí den e buki di bida, i kiko bo mester hasi pa bo nòmber ta den dje?

² E buki di bida tin nòmber di tur hende ku ta adorá Yehova ku rèspèt profundo i ku ta stima su nòmber. Nan tur tin speransa di risibí bida eterno. Pa bo nòmber ta skirbí den e buki ei, bo mester tin un amistat será ku Yehova i bo mester tin fe den e sakrifisio di su Yu, Hesukristu. (Huan 3:16, 36) Nos tur ke pa nos nòmber ta den e buki ei.

3-4. (a) Si nos nòmber ta den e buki di bida, outomátikamente nos lo biba pa semper? Splika. (b) Kiko nos lo trata den e artíkulo akí i esun siguiente?

³ Si nos nòmber ta den e buki di bida, esei ta nifiká ku outomátikamente nos lo haña bida eterno? Nos ta haña kontesta pa e pregunta ei den loke Yehova a bisa Moises na Éksodo 32:33. Ei, Yehova a bisa: “Esun ku a peka kontra mi, esei lo mi kita for di mi buki.” Pues, Yehova por kita òf veeg nòmber ku tin skirbí den e buki, ta komo si fuera el a skirbi nan ku pòtlot. (Rev. 3:5) P’esei, nos mester hasi esfuerso pa nos nòmber keda den dje te na momento ku, na moda di papia, Yehova skirbié pa semper ku pèn.

⁴ Kisas esei ta lanta algun pregunta. Por ehèmpel, kiko Beibel ta bisa tokante esnan kende nan nòmber ta skirbí den e buki di bida i di esnan kende nan nòmber no ta skirbí den dje? Na ki momento esnan ku tin nan nòmber skirbí den e buki lo haña bida eterno? Kiko di esnan ku a muri sin haña chèns di konosé Yehova? Yehova lo por skirbi nan nòmber ainda den e buki di bida? Nos lo haña kontesta pa e preguntanan ei den e artíkulo akí i esun siguiente.

KEN SU NÒMBER TA SKIRBÍ DEN E BUKI?

5-6. (a) Segun Filipensenan 4:3, ken su nòmber ta skirbí den e buki di bida? (b) Na ki momento nan nòmber lo ser skirbí permanentemente den e buki di bida?

⁵ Ken su nòmber ta skirbí den e buki di bida? Pa kontestá e pregunta ei nos lo papia tokante sinku grupo di hende. Algun di e gruponan ei ta den e buki di bida, algun nò.

⁶ E promé grupo ta esnan skohí pa goberná ku Hesus den shelu. Nan nòmber ta skirbí den e buki di bida. Apòstel Pablo a bisa su “kompañeronan di trabou” na Filipo ku nòmber di esnan ungí, kende a ser invitá pa goberná ku Hesus, ta den e buki. (Lesa Filipensenan 4:3.) Pero, pa nan nòmber por keda den e buki ei, nan mester keda fiel. Ora kada un di nan risibí e seyo final, su nòmber lo ser skirbí permanentemente den e buki akí. Esaki por sosodé sea promé ku e muri òf promé ku tribulashon grandi kuminsá.—Rev. 7:3.

7. Na ki momento nòmber di e multitut grandi di otro karné lo ser skirbí permanentemente den e buki di bida? (Revelashon 7:16, 17)

⁷ E di dos grupo ta e multitut grandi di otro karné. Nan nòmber ta skirbí aworakí den e buki di bida? Sí. Anto, nan nòmber lo t’ei ainda despues di Armagedon? Sí. (Rev. 7:14) Hesus a bisa ku e hendenan ei, ku ta manera karné, “lo haña bida eterno.” (Mat. 25:46) Pero, esei no ta bai tuma lugá mesora despues di Armagedon.Nan nòmber ta skirbí, na moda di papia, ku pòtlot den e buki di bida. Durante e Reinado di Mil Aña, Hesus “lo ta nan wardador, i lo e guia nan na fuentenan di awa di bida.” Pues, nòmber di esnan ku sigui Kristu su guia, keda fiel na Yehova i pasa e prueba final lo ser skirbí permanentemente den e buki di bida.—Lesa Revelashon 7:16, 17.

8. Ken su nòmber no ta den e buki di bida, i kiko lo pasa ku nan?

⁸ E di tres grupo ta esnan ku Beibel ta yama kabritu, kendenan lo ser destruí na Armagedon. Nan nòmber no ta den e buki di bida. Hesus a bisa ku nan “lo ser kòrtá kitá afó pa semper.” (Mat. 25:46, nota.) Bou di inspirashon, Pablo a bisa nos ku “esakinan lo sufri e kastigu hudisial di destrukshon eterno.” (2 Tes. 1:9; 2 Ped. 2:9) Meskos ta konta pa esnan ku durante historia deliberadamente a peka kontra spiritu santu. Nan tambe lo ser destruí pa semper i lo no haña bida eterno. Pues, nan lo no haña resurekshon. (Mat. 12:32; Mar. 3:28, 29; Heb. 6:4-6) Awor, laga nos analisá dos grupo di hende ku lo resusitá pa biba aki riba tera.

ESNAN KU LO SER RESUSITÁ

9. Kua dos grupo lo ser resusitá, i kiko ta e diferensia entre nan? (Echonan 24:15)

⁹ Beibel ta papia di dos grupo di hende ku lo ser resusitá i ku lo tin chèns di biba pa semper riba tera: esnan “hustu” i esnan “inhustu.” (Lesa Echonan 24:15.) Esnan “hustu” ta hende ku a sirbi Yehova fielmente ora nan tabata na bida. Di otro banda, esnan “inhustu” ta hende ku no a sirbi Yehova. Pero, nos por bisa ku nòmber di nan tur ta skirbí den e buki di bida, ya ku tur dos grupo lo ser resusitá? Pa kontestá e pregunta ei, laga nos ban trata kada grupo nan apart.

10. Dikon esnan “hustu” lo haña resurekshon, i ki privilegio algun di nan lo risibí? (Pa mas informashon tokante resurekshon riba tera, wak “Pregunta di Lektor” den e revista akí.)

¹⁰ E di kuater grupo ta esnan “hustu.” Promé ku nan a muri, nan nòmber tabata skirbí kaba den e buki di bida. Yehova a kita òf veeg nan nòmber for di e buki di bida ora nan a muri? Nò, pasobra den Yehova su mente ainda nan ta “bibu.” Yehova “no ta Dios di e mortonan, sino di e bibunan, pasobra p’e nan tur ta bibu.” (Luk. 20:38) Esei ke men ku ora esnan hustu ser resusitá, nan nòmber lo ta skirbí, na moda di papia, ainda ku pòtlot den e buki di bida. (Luk. 14:14) Algun di nan lo tin e privilegio di sirbi ‘komo prens na tur parti di tera.’—Sal. 45:16.

11. Kiko esnan “inhustu” mester siña promé ku Yehova skirbi nan nòmber den e buki di bida?

¹¹ Por último, nos tin e di sinku grupo: esnan “inhustu.” Nan no a hiba un bida hustu promé ku nan a muri kisas pasobra nan no tabata konosé Yehova su normanan. Pues, nan nòmber no ta skirbí den e buki di bida. Pero, Yehova lo resusitá nan pa asina duna nan chèns di tin nan nòmber skirbí den e buki di bida. Esnan “inhustu” lo bai tin mester di hopi yudansa. Promé ku nan a muri, algun di nan a hasi hopi kos malu i horibel. P’esei mes nan mester siña biba segun Yehova su normanan hustu. I pa logra esei, e Reino di Dios lo tin e programa di siñansa i entrenamentu di mas grandi den historia humano.

12. (a) Ken lo siña esnan inhustu? (b) Kiko lo pasa ku esnan ku nenga di apliká loke nan siña?

¹² Ken lo siña esnan inhustu? E multitut grandi i esnan hustu ku ser resusitá. Pa nòmber di esnan inhustu ser skirbí den e buki di bida, nan mester krea un amistat será ku Yehova i dediká nan mes na dje. For di shelu Hesus i e ungínan lo opservá atentamente pa wak kon esnan inhustu ta reakshoná riba loke nan ta siña. (Rev. 20:4) Lo no permití niun hende ku rechasá e yudansa ei keda na bida, ni maske nan tin 100 aña. (Isa. 65:20) Yehova i Hesus por lesa kurason i lo no permití niun hende hasi daño den e mundu nobo.—Isa. 11:9; 60:18; 65:25; Huan 2:25.

RESUREKSHON DI BIDA I DI HUISIO

13-14. (a) Ántes, kon nos tabata komprondé e palabranan di Hesus na Huan 5:29? (b) Kiko nos por bisa tokante su palabranan?

¹³ Hesus tambe a papia di esnan ku lo ser resusitá pa biba aki riba tera. Por ehèmpel, el a bisa: “Lo yega e ora ku tur esnan ku ta den graf lo tende su stèm i lo sali afó; esnan ku hasi loke ta bon pa un resurekshon di bida, esnan ku praktiká maldat pa un resurekshon di huisio.” (Huan 5:28, 29) Kiko Hesus tabata ke men?

¹⁴ Ántes, nos tabata komprondé ku Hesus su palabranan ta referí na loke e hendenan ei lo hasi despues ku nan wòrdu resusitá. Ku otro palabra, nos tabata komprondé ku algun lo ser resusitá i hasi loke ta bon miéntras ku otronan lo ser resusitá i praktiká maldat. Pero, ripará ku Hesus no a bisa ku esnan ku sali for di graf lo hasi loke ta bon òf lo praktiká maldat. Na e idioma original, Hesus a papia den pasado. El a papia tokante esnan ku a “hasi loke ta bon” i esnan ku a “praktiká maldat.” Pues, e teksto ta referí na loke nan a hasi promé ku nan a muri. Esei ta zona lógiko pasobra den e mundu nobo niun hende lo no haña chèns di praktiká maldat. Pues, esnan inhustu mester a praktiká e kosnan malu ei promé ku nan a muri. Pero, ta kiko Hesus tabata ke men ku “un resurekshon di bida” i ku “un resurekshon di huisio”?

15. Ken lo risibí “un resurekshon di bida,” i dikon?

¹⁵ Esnan hustu, esta, hende ku a hasi loke ta bon promé ku nan a muri, lo risibí “un resurekshon di bida” pasobra nan nòmber ya ta skirbí den e buki di bida. Esei ta nifiká ku e resurekshon di esnan ku a “hasi loke ta bon” menshoná na Huan 5:29 ta meskos ku e resurekshon di “hende hustu” menshoná na Echonan 24:15. Ta bèrdat ku Romanonan 6:7 ta bisa ku un hende “ku muri ta keda apsolvé di su piká.” Ku otro palabra, su pikánan ta keda di veeg. Pero, esei no ta e kaso di su registro di sirbishi fiel na Yehova. Pues, nòmber di esnan hustu lo t’ei ainda den e buki di bida despues ku nan ser resusitá. (Heb. 6:10) Ta klaru ku nan mester keda fiel pa nan nòmber keda den e buki di bida.

16. Kiko “resurekshon di huisio” ke men?

¹⁶ Kiko awor di esnan ku a praktiká maldat promé ku nan a muri? Wèl, aunke nan pikánan a ser di veeg, nan no tin un registro di sirbishi fiel na Yehova. P’esei, nan nòmber no ta skirbí den e buki di bida. Pues, nos por konkluí ku e resurekshon di esnan ku a “praktiká maldat” deskribí na Huan 5:29 ta meskos ku e resurekshon di hende “inhustu” na Echonan 24:15. Resurekshon di esnan “inhustu” ta “un resurekshon di huisio.”c E huisio ta nifiká ku Hesus lo husga òf evaluá nan. (Luk. 22:30) Lo tuma tempu pa husga si nan ta digno di tin nan nòmber den e buki di bida. Ta solamente si nan kambia nan mal kondukta di ántes i dediká nan bida na Yehova, nan nòmber lo ser skirbí den e buki di bida.

17-18. Kiko tur hende ku resusitá mester hasi, i kiko ta e “obranan” ku Revelashon 20:12 i 13 ta referí na dje?

¹⁷ Tur hende ku resusitá, sea ku nan tabata hustu òf inhustu promé ku nan a muri, mester obedesé e leinan ku tin den e bukinan nobo ku lo ser habrí durante e mil aña. Apòstel Huan a deskribí loke el a mira den un vishon: “Mi a mira e mortonan, grandi i chikitu, pará dilanti di e trono, i Dios a habri e bukinan. Ma el a habri un otro buki; esaki ta e buki di bida. I esun sintá riba e trono a husga e mortonan segun nan obranan, di akuerdo ku loke tabatin pará skirbí den e bukinan.”—Rev. 20:12, 13.

¹⁸ A base di ki “obranan” lo husga esnan ku ser resusitá? Akaso ta e obranan ku nan a hasi promé ku nan a muri? Nò. Kòrda ku ora nan a muri, nan a ser apsolvé di nan pikánan. E ora ei, “nan obranan” no por ta referí na loke nan a hasi promé ku nan a muri. E mester ta referí na e manera ku nan lo reakshoná na e siñansa i entrenamentu ku nan lo risibí den e mundu nobo. Asta hende fiel, manera Noe, Sámuèl, David i Daniel mester siña tokante Hesus i demostrá fe den su sakrifisio. Si hende fiel mes tin kos di siña, kuantu mas esnan inhustu!

19. Kiko lo pasa ku esnan ku rechasá e bunita oportunidat akí?

¹⁹ Kiko lo pasa ku esnan ku rechasá e bunita oportunidat akí? Revelashon 20:15 ta bisa: “Tur esnan ku nan nòmber no tabata skirbí den e buki di bida, el a benta den e lago di kandela.” Sí, nan lo ser destruí pa semper. Pues, ta masha importante pa nos perkurá pa nòmber ta skirbí den e buki di bida i pa e keda den dje!

20. Ki trabou emoshonante lo tuma lugá durante e Reinado di Mil Aña? (Wak e plachi riba portada.)

²⁰ E Reinado di Mil Aña lo ta ègt un tempu masha emoshonante. Durante e tempu ei lo tin e programa di siñansa i entrenamentu di mas grandi ku a yega di tuma lugá riba tera. Pero, tambe lo e ta un tempu ku esnan hustu i esnan inhustu mester demostrá ku nan ke obedesé Yehova su leinan. (Isa. 26:9; Echo. 17:31) Kon e programa di siñansa i entrenamentu lo ta? E siguiente artíkulo lo yuda nos komprondé esei.