Yehova Su Man Nunka Ta Kòrtiku

1. Kon Moises a demostrá konfiansa den Yehova ora el a guia e israelitanan for di Egipto?

E BUKI di Hebreonan ta menshoná hopi hende ku tabatin fe den Yehova. Moises tabata un di nan, i e tabatin un fe impreshonante. (Heb. 3:​2-5; 11:​23-25) El a mustra fe ora e mester a guia e pueblo di Israel for di Egipto. E no a laga Fárao ni su ehérsito spant’é. El a konfia kompletamente den Yehova i a guia e pueblo dor di Laman Kòrá i despues den e desierto. (Heb. 11:​27-29) Moises a sigui konfia den su Dios asta ora mayoria di e israelitanan a kuminsá duda si Yehova lo por a sòru pa nan. Anto Yehova no a laga Moises na kaya pasobra Yehova a duna e israelitanan kuminda i awa. Asina nan a logra sobrebibí den e desierto, unda kasi no tabatin nada.a—Éks. 15:​22-25; Sal. 78:​23-25.

2. Dikon Yehova a puntra Moises: “Akaso ami, Yehova, no tin poder pa kumpli ku loke mi a bisa”? (Numbernan 11:​21-23)

² Despues di mas o ménos un aña ku Yehova a libra e pueblo di Israel for di Egipto, Yehova a primintí di duna nan karni. Apesar ku Moises tabatin fe fuerte, el a duda si Yehova lo por a kumpli ku Su promesa. Tabatin miónes di hende i kasi no tabatin kuminda den e desierto. Ta unda Yehova lo saka sufisiente karni pa nan tur kome? Komo kontesta, Yehova a puntra Moises: “Akaso ami, Yehova, no tin poder pa kumpli ku loke mi a bisa?” Ku otro palabra Yehova a puntr’é: “Akaso man di Yehova ta muchu kòrtiku?”—Lesa Numbernan 11:​21-23; di dos nota.

3. Dikon loke Moises i e israelitanan a pasa aden mester interesá nos?

³ Hopi di nos sa preokupá si Yehova lo por duna nos i nos famia loke nos mester. Sea ku esei ta bo preokupashon òf nò, ta importante pa bo analisá loke Yehova a puntra Moises. Den e artíkulo akí nos lo mira dikon Moises i e israelitanan a duda den loke Yehova por a hasi pa nan. Tambe nos lo wak algun prinsipio di Beibel ku lo yuda nos haña mas konfiansa ku semper Yehova lo yuda nos.

SIÑA FOR DI MOISES I E ISRAELITANAN

4. Kiko a pone ku e israelitanan a kuminsá duda ku Yehova por a pèrkurá pa nan?

⁴ Kiko a hiba ku e israelitanan a kuminsá duda den Yehova? E nashon di Israel i “un multitut grandi di tur sorto di hende” ku no tabata israelita ya tabatin un tempu ta kana den e desierto rumbo pa e pais ku Yehova a primintí di duna su pueblo. (Éks. 12:38; Deu. 8:15) E hendenan ku no tabata israelita a fada di kome mana i a kuminsá keha. I no a tarda ku e israelitanan tambe a kuminsá keha. (Num. 11:​4-6) E pueblo a kuminsá yora pa e kuminda ku nan tabatin na Egipto. Moises a sintié asina preshoná ku el a kuminsá pensa ku t’e mes mester a buska karni pa nan, pero e no tabata sa na unda.—Num. 11:​13, 14.

5-6. Kiko a influensiá e israelitanan, i kiko nos por siña for di esei?

⁵ E hendenan ku no tabata israelita tabata malagradesí i parse ku ta nan aktitut a influensiá e pueblo di Israel. Meskos por pasa ku nos. E aktitut malagradesí di hende rònt di nos por influensiá nos i pone nos pèrdè apresio pa loke Yehova ta hasi pa nos. Nos por kuminsá pensa riba loke nos tabatin ántes òf bira yalurs riba loke otro hende tin. Pero nos lo ta hopi mas felis si nos siña pa ta satisfecho ku loke nos tin.

⁶ E israelitanan mester a kòrda ku Yehova a sigurá nan ku lo e duna nan hopi mas ku loke nan tin mester ora nan yega nan destinashon, i no durante nan biahe den e desierto. Di mes manera, na lugá di focus riba e kosnan ku nos no tin awor, nos ke kòrda riba e kosnan ku Yehova a primintí di duna nos den e mundu nobo. Ademas, ta importante pa nos meditá riba tekstonan di Beibel ku lo yuda nos haña mas konfiansa den Yehova.

7. Dikon nos por tin sigur ku semper Yehova por yuda nos?

⁷ Pero awor, dikon Yehova a puntra Moises: “Akaso ami, Yehova, no tin poder pa kumpli ku loke mi a bisa?” Kisas Yehova kier a siña Moises dos kos: (1) Su poder no tin límite i (2) e por usa e poder ei tur kaminda, asta na un lugá aislá. “Ku su man fuerte i ku su brasa poderoso,” Yehova a demostrá su poder. (Sal. 136:​11, 12) Pues nos por tin sigur ku ora nos ta pasa den situashon difísil, Yehova por yuda nos sin importá unda nos ta.—Sal. 138:​6, 7.

8. Kiko lo yuda nos pa no hasi e mesun eror ku hopi di e israelitanan den desierto? (Wak e plachi.)

⁸ Ora Yehova a pèrkurá karni pa nan, el a duna nan mas ku sufisiente sloke pa nan kome. Pero e israelitanan no a yama Yehova danki pa esei. Mas bien hopi di nan tabata golos i a pasa un dia i mei ta piki un kantidat grandi di sloke. Yehova a rabia masha pisá mes ku esnan “ku a hasi kos di golos” i a kastigá nan. (Num. 11:​31-34) Loke nos ta siña for di esei ta ku nos mester tin kuidou pa nos no bira golos. Sea ku nos ta riku òf pober, nos mester hasi sigur ku nos ta montoná “tesoro den shelu.” Pa hasi esei, nos mester tin un amistat será ku Yehova i Hesus. (Mat. 6:​19, 20; Luk. 16:9) Si nos duna esei prioridat, nos por tin sigur ku Yehova semper lo pèrkurá pa nos.

9. Ki konfiansa nos mester tin?

⁹ Awe tambe Yehova ta kla pa yuda su pueblo. Ma esei no ke men ku nunka nos lo no haña problema finansiero ni ku nunka nos no por pasa hamber.b Pero nos por tin sigur ku Yehova hamas lo bandoná nos. Semper lo e duna nos e forsa nesesario pa dil ku kualke difikultat. Pues nos mester tin konfiansa ku Yehova lo sòru pa loke nos mester pa biba. Ban wak dos situashon den kua nos por mustra esei: (1) ora nos haña problema finansiero i (2) ora nos ta plania pa futuro.

PROBLEMA FINANSIERO

10. Ki problema finansiero nos por haña nos kuné?

¹⁰ Mas serka nos ta di e fin, mas duru bida lo bira debí na insiguridat polítiko, guera, desasternan natural i pandemianan. E kosnan ei por oumentá nos gastunan, nos por pèrdè trabou, pèrdè nos pertenensianan òf asta nos por haña nos tin ku bandoná nos kas pa bai biba otro lugá. Anto ta klaru ku nos ke sigui kuida nos famia. Pero ki por yuda nos tuma desishon ku ta mustra ku nos ta konfia den Yehova?

11. Kiko por yuda bo dil ku problema finansiero? (Lukas 12:​29-31)

¹¹ E promé kos ku bo tin ku hasi ta di konta Yehova tur loke ta preokupá bo. Esei lo yuda hopi. (Pro. 16:3) Pidié duna bo sabiduria pa tuma bon desishon i duna bo un kurason trankil pa evitá di bira “demasiado preokupá.” (Lesa Lukas 12:​29-31.) Sigui pidié yuda bo keda kontentu ku e kosnan básiko. (1 Tim. 6:​7, 8) Buska artíkulonan den nos publikashonnan ku lo yuda bo sa ki pa hasi ora bo tin problema finansiero. Riba jw.org tin vários vidio i artíkulo ku ta papia tokante esei i ku a yuda hopi hende.

12. Ki preguntanan por yuda un ruman tuma e mihó desishon pa su famia?

¹² Pa por haña trabou, algun ruman a muda bai leu for di nan famia. Mayoria di nan despues a realisá ku esei no tabata un desishon sabí. Promé ku bo tuma un trabou, no pensa solamente riba kuantu sèn lo bo gana sino pensa tambe si e trabou ei lo afektá bo amistat ku Yehova. (Luk. 14:28) Puntra bo mes: ‘Kon lo para ku mi matrimonio si mi ta leu fo’i kas? Lo mi tin tempu pa bai tur mi reunionnan, sali den sirbishi i pasa tempu ku mi rumannan?’ Si bo tin yu, ta bon pa bo puntra bo mes: ‘Kon mi por lanta mi yunan “den e disiplina di Yehova” si mi no ta huntu ku nan?’ (Efe. 6:4) Tuma bo desishon a base di loke Yehova ta pensa i no bai tras di famia- i amigunan ku no ta respetá loke Beibel ta bisa.c Tony, ku ta biba na Asia, a haña vários oferta pa traha na otro pais. Sinembargo, despues ku el a hasi orashon el a papia ku su kasá, i despues el a disidí di nenga e ofertanan i focus riba baha e gastunan di famia. Awor, Tony ta bisa: “M’a yuda masha hopi hende drenta e bèrdat i nos yunan stima Yehova masha hopi mes. Komo famia nos a bin komprondé ku miéntras ku nos hasi loke Mateo 6:33 ta bisa, Yehova lo sigui sòru pa nos.”

ORA NOS TA PLANIA PA FUTURO

13. Kiko ta algun kos ku nos por hasi pa asina nos tin loke nos mester ora nos edat subi?

¹³ Kon bo ta bai kuida bo mes ora bo edat subi? E desishonnan ku bo tuma tokante bo futuro lo indiká unda bo konfiansa ta. Beibel ta animá nos pa traha duru pa nos tin loke nos mester ora nos edat subi. (Pro. 6:​6-11) Si bo sirkunstansia ta permití, ta bon pa pone algu un banda. Ta bèrdat ku plaka tin su bentaha i por yuda nos den sierto situashon. (Ekl. 7:12) Pero, nos no ke pa plaka bira e kos di mas importante den nos bida.

14. Kon Hebreonan 13:5 lo yuda nos pa no preokupá di mas tokante nos futuro?

¹⁴ Den un ilustrashon ku Hesus a konta, el a mustra kon bobo ta pa montoná plaka sin ta “riku den bista di Dios.” (Luk. 12:​16-21) Niun hende no sa kiko e dia di mañan ta trese. (Pro. 23:​4, 5; Sant. 4:​13-15) Tambe, Hesus a bisa ku tur hende ku ke ta su disipel, mester ta dispuesto pa yama tur nan pertenensianan ayó. (Luk. 14:33) Den promé siglo, ta esei a pasa ku e kristiannan na Hudea. I nan tabata dispuesto pa yama nan pertenensianan ayó. (Heb. 10:34) Den nos tempu, hopi ruman a pèrdè nan trabou pasobra nan no a vota òf duna nan apoyo na niun partido polítiko. (Rev. 13:​16, 17) Nan a mustra ku nan tabata konfia kompletamente den e promesa akí di Yehova: “Hamas lo mi bandoná bo, i hamas lo mi laga bo desampará.” (Lesa Hebreonan 13:5.) Pues, nos ta hasi loke nos por pa prepará pa futuro, ma nos tin konfiansa ku Yehova lo sòru pa nos si algu ònferwagt pasa.

15. Kon mayornan ku ta konfia Yehova tin ku mira nan yunan? (Wak e plachi.)

¹⁵ Den algun kultura, mayornan ta mira yu komo un invershon pa futuro. Ku otro palabra, nan ta ferwagt ku ora e yunan krese nan lo kuida nan. Pero Beibel ta bisa ku ta mayornan mester sòru pa e nesesidatnan di nan yunan. (2 Kor. 12:14) Klaru ku aki aya mayornan lo mester di yudansa segun ku nan edat ta subi. I hopi yu ta kontentu pa yuda den esei. (1 Tim. 5:4) Pero mayornan ku ta konfia Yehova ta rekonosé ku e alegria di mas grandi ta di mira nan yunan bira sirbidónan di Yehova i no di mira nan komo un invershon pa futuro.—3 Huan 4.

16. Kon mayornan por yuda nan yu para riba su mes pia? (Efesionan 4:28)

¹⁶ Segun ku bo ta yuda bo yu siña kon pa mantené su mes, lag’é mira na bo ehèmpel kon abo ta konfia den Yehova. Fo’i chikitu, siñ’é ku trabou duru no ta mata niun hende i ku esei lo benefisi’é. (Pro. 29:21; lesa Efesionan 4:28.) Segun ku e ta krese, yud’é hasi su bèst na skol. Komo mayor, hasi investigashon, buska prinsipionan den Beibel i apliká nan den bo mes bida. Asina ei, bo por yuda bo yu tuma desishon sabí tokante enseñansa. Bo meta ta pa yuda bo yu mantené su mes i apartá tempu pa prediká mas, kisas asta bira pionero.

17. Di kiko nos por ta sigur?

¹⁷ Sirbidónan fiel di Yehova no tin niun duda ku e por i ke duna nan loke nan mester pa biba. Mas serka nos ta di e fin di e mundu malbado akí, mas nos tin ku konfia den Yehova. Pues loke sea ku pasa, laga nos ta determiná pa konfia ku Yehova lo usa su poder pa kuida nos. Nos ta konvensí ku Yehova semper lo yuda nos, sin importá unda nos ta.