Ta Bon pa Nos Sera Mas ku Nos Rumannan!

1-2. Kiko ta masha importante pa Yehova, i kiko e ke pa nos hasi?

BO TABATA sa ku e manera ku nos ta trata otro hende ta masha importante pa Yehova? Hesus a bisa ku nos mester stima nos próhimo meskos ku nos mes. (Mat. 22:​37-39) Esei ke men ku nos mester ta amabel asta ku hende ku no ta Testigu. Di e manera ei, nos ta imitá Yehova Dios, kende “ta laga su solo sali riba mal hende i bon hende i ta laga awa kai riba hende hustu i inhustu.”—Mat. 5:45.

² Yehova stima tur hende, pero e stima foral esnan ku ta obedes’é. (Huan 14:21) Anto e ke pa nos imit’é. P’esei e ta animá nos pa ‘stima nos rumannan intensamente’ i mustra nan “tierno kariño.” (1 Ped. 4:8; Rom. 12:10) E tipo di amor i kariño ei ta meskos ku loke nos ta sinti pa un famia di nos òf un bon amigu.

3. Kiko nos mester hasi pa nos amor sigui krese?

³ Amor ta manera un mata ku mester di kuido pa krese. P’esei, Apòstel Pablo a konsehá e kristiannan: “Sigui stima otro manera ruman.” (Heb. 13:1) Yehova ke pa nos amor pa nos rumannan sigui krese. Den e artíkulo akí nos lo wak dikon nos mester sera mas ku nos rumannan i dikon nos mester sigui hasi esei.

DIKON NOS MESTER SERA MAS KU NOS RUMANNAN?

4. Kon nos por sigui apresiá e union ku Salmo 133:1 ta deskribí? (Wak e plachi.)

⁴ Lesa Salmo 133:1. Meskos ku e salmista, nos tambe ta bisa “esta bon, esta dushi” ta ora nos amigunan ta hende ku ta stima Yehova. Pero, meskos ku un hende por pèrdè apresio pa algu bunita ku e ta mira tur dia, asina nos tambe por pèrdè apresio pa e union ku nos tin ku nos rumannan. Nos ta mira nos rumannan hopi biaha pa siman. Teniendo kuenta ku esei, kiko nos por hasi pa sigui stima nan? Algu ku por yuda nos ta ora nos pensa dikon kada ruman ta balioso pa nos i pa e kongregashon.

5. Kiko hende por realisá ora nan mira kuantu nos stima nos rumannan?

⁵ Hende ku bin nos reunionnan pa promé biaha ta keda masha impreshoná ora nan mira kuantu nos stima otro. Esei so ya ta konvensé nan ku nan a haña e bèrdat. Hesus a bisa: “Na esaki tur hende lo sa ku boso ta mi disipelnan, esta, si boso ta stima otro.” (Huan 13:35) Esei ta loke Chaithra a bin realisá. E ruman ku tabata studia kuné a invit’é pa un kongreso regional. Despues di e promé dia, Chaithra a bisa e ruman: “Nunka mi mayornan a brasa mi. Pero na e kongreso akí, m’a haña 52 brasa den un solo dia! Nan a laga mi sinti kuantu Yehova stima mi. Mi ke pa nan bira mi famia.” Chaithra a sigui progresá, i na 2024 el a batisá. Sí, ora hende interesá mira nos bon obranan, inkluso kuantu nos stima otro, hopi biaha nan ta ser motivá pa sirbi Yehova.—Mat. 5:16.

6. Dikon ta un importante pa nos sera mas ku nos rumannan?

⁶ Ora nos sera mas ku nos rumannan, esei por ta un protekshon pa nos. Pablo a bisa su rumannan: “Sigui animá otro tur dia, pa ningun di boso no laga e poder engañoso di piká hasi boso kurason duru.” (Heb. 3:13) Si sosodé ku nos bira hopi desanimá te ku nos ta kuminsá desviá for di e bon kaminda, Yehova por laga un di nos rumannan nota esaki i duna nos e yudansa ku nos mester. (Sal. 73:​2, 17, 23) E sorto di animashon ei ta bon pa nos.

7. Kon amor ta yuda ku union? (Kolosensenan 3:​13, 14)

⁷ Debí ku nos ta parti di un grupo di hende ku ta hasi hopi esfuerso pa stima otro, nos ta haña hopi bendishon. (1 Huan 4:11) Por ehèmpel, amor ta yuda nos “sigui soportá otro,” i esei ta yuda nos keda uní ku nos rumannan. (Lesa Kolosensenan 3:​13, 14; Efe. 4:​2-6) Niun otro grupo na mundu no tin un ambiente mas agradabel ku nos tin na nos reunionnan.

MUSTRA ONOR I RÈSPÈT NA OTRO

8. Kon Yehova ta yuda nos ta uní ku nos rumannan?

⁸ Kon por ta ku apesar ku nos ta imperfekto, nos ta uní ku nos rumannan rònt mundu? Esei ta pasobra Yehova ta yuda ku esei. (1 Kor. 12:25) Beibel ta bisa ku “Dios mes a siña [nos] pa stima otro.” (1 Tes. 4:9) Ku otro palabra, Yehova ta usa Beibel pa bisa nos presis loke nos tin ku hasi pa sera mas ku nos rumannan. P’esei nos mester studia Yehova su instrukshonnan i apliká nan. (Heb. 4:12; Sant. 1:25) Anto esei ta presis loke nos ta purba di hasi.

9. Ki nos ta siña for di Romanonan 12:​9-13 tokante mustra onor na otro?

⁹ Beibel ta siña nos kon pa sera mas ku nos rumannan. Wak por ehèmpel loke Pablo a bisa tokante esei na Romanonan 12:​9-13. (Lesa.) El bisa: “Pa loke ta mustra onor na otro, tuma e inisiativa.” Esei ta nifiká ku nos mester buska oportunidat pa mustra “tierno kariño” na diferente manera, entre otro pordoná, mustra hospitalidat i parti loke nos tin ku otro. (Efe. 4:32) Bo no tin nodi di warda pa bo rumannan purba di sera mas ku bo. Abo “tuma inisiativa” den esei, i lo bo mira ku Hesus tabatin rason ora el a bisa: “Tin mas felisidat den duna ku den risibí.”—Echo. 20:35.

10. Kon nos por tuma inisiativa ora di “mustra onor na otro”? (Wak e plachi.)

¹⁰ Ta interesante ku djis despues di bisa pa “tuma inisiativa” den mustra onor na otro, Pablo ta konsehá nos pa no sea floho. Un hende ku no ta floho ta diligente, ta traha duru i ta tuma trabou ku e haña na serio. Proverbionan 3:27 i 28 ta bisa nos: “No keda sin yuda hende ku mester di yudansa si ta den bo poder pa hasi esei.” Ora nos mira ku un hende mester di algu, nos ke hasi loke nos por pa yud’é. Pues, nos no ta sinta warda wak si otro hende ta bai yud’é.—1 Huan 3:​17, 18.

11. Kiko por yuda nos sera mas ku otro?

¹¹ Un otro manera pa mustra onor na otro ta di no tarda pa pordoná. Efesionan 4:26 ta bisa: “No laga solo baha miéntras ku ainda boso ta rabiá.” Dikon? Versíkulo 27 ta bisa pa “no duna Diabel un chèns.” Den vários teksto di Beibel Yehova ta bisa nos pa pordoná otro. Kolosensenan 3:13 ta animá nos pa “sigui . . . pordoná otro libremente.” Un di e mihó maneranan pa nos sera mas ku nos rumannan ta di no para ketu na nan fayo- i erornan. Di e manera ei nos ta yuda “mantené e union di spiritu den e vínkulo di pas.” (Efe. 4:3) Ku otro palabra, kaminda tin pordon, tin union i pas.

12. Kon Yehova ta yuda nos pordoná?

¹² Tin biaha nos por sinti ku nos no por pordoná un hende ku a hasi nos hopi daño i doló. Pero ku yudansa di Yehova su spiritu santu nos por pordoná nan. Despues di animá nos pa “tene tierno kariño pa otro” i pa no ta floho, Beibel ta sigui bisa: “Bria ku e spiritu di Dios.” Spiritu santu por laga un kristian “bria” di entusiasmo pa hasi loke ta bon, kual ta inkluí mustra tierno kariño i pordoná otro libremente. P’esei nos ta roga Yehova pa yuda nos.—Luk. 11:13.

NO MESTER “TIN DESUNION DEN BOSO”

13. Kiko por kousa desunion entre nos?

¹³ Den kongregashon tin “tur sorto di hende.” (1 Tim. 2:​3, 4) Komo nos tin background diferente, ta normal ku nos lo tuma desishonnan diferente enkuanto estilo di bisti, kuido personal i aparensia, salú i entretenimentu. Si nos no paga tinu, e diferensianan ei por kousa desunion. (Rom. 14:4; 1 Kor. 1:10) Pero komo ku Dios mes ta siñando nos pa stima otro, nos lo no insistí ku nos desishonnan ta mihó ku esun di otro ruman.—Flp. 2:3.

14. Kiko semper nos mester purba di hasi, i dikon?

¹⁴ Algu mas ku nos por hasi pa evitá desunion den kongregashon ta di hasi esfuerso pa semper animá i fortalesé nos rumannan. (1 Tes. 5:11) Último tempunan, hopi hende ku tabata inaktivo òf ku a ser saká for di e kongregashon a bini bèk. Nos ta risibí nan ku brasa habrí. (2 Kor. 2:8) Un ruman muhé ku a bolbe Salòn despues di ta inaktivo pa mas ku dies aña a bisa: “Tur hende tabatin sonrisa riba nan kara i a duna mi man.” (Echo. 3:19) Ki efekto tur esei tabatin riba dje? El a bisa: “M’a sinti ku Yehova tabata yudando mi haña felisidat atrobe.” Ora nos hasi esfuerso pa animá otro, Hesus por usa nos pa duna alivio na esnan “ku ta kargá.”—Mat. 11:​28, 29.

15. Kiko mas nos por hasi pa yuda e kongregashon keda uní? (Wak e plachi.)

¹⁵ Ku nos abla tambe nos por yuda e kongregashon keda uní. Yòb 12:11 ta bisa: “Hende no mester analisá loke su oreanan ta tende meskos ku lenga ta pruf kuminda?” Promé ku un bon kòki sirbi su kuminda, semper e ta pruf e pa wak si e ta smak bon. Asina tambe, nos mester pensa bon promé ku nos papia. (Sal. 141:3) Semper nos ke pa tur loke ta sali for di nos boka ta fortalesé, animá i yuda “esnan ku ta tende.”—Efe. 4:29.

16. Ken foral tin ku hasi esfuerso pa papia palabra animante?

¹⁶ Foral esposonan i mayornan mester hasi esfuerso pa no kibra nan famia ku palabra. (Kol. 3:​19, 21; Tito 2:4) Ansianonan tin ku sòru pa nan ta un fuente di animashon i konsuelo pa Yehova su karnénan. (Isa. 32:​1, 2; Gal. 6:1) Un proverbio den Beibel ta bisa: “Palabra papiá na un momento oportuno ta refreskante.”—Pro. 15:23.

STIMA “KU ECHO I KU SINSERIDAT”

17. Kon nos por hasi sigur ku nos amor pa nos rumannan ta sinsero?

¹⁷ Apòstel Huan a bisa ku “nos no mester stima ku palabra òf ku boka so, ma ku echo i ku sinseridat.” (1 Huan 3:18) Kon nos por hasi sigur ku nos ta stima nos rumannan ku sinseridat, esta, di kurason? Wèl, mas tempu nos pasa ku nan, mas nos lo sera ku nan i nos amor pa nan lo krese i bira mas fuerte. P’esei, nos tin ku buska oportunidat pa pasa tempu ku otro por ehèmpel, na reunion i den sirbishi. Tambe traha tempu pa bishitá otro. Ora nos hasi tur esei, nos ta demostrá ku ta ‘Dios mes a siña nos pa stima otro.’ (1 Tes. 4:9) E ora ei, nos tambe lo sinti kon “dushi ta ora ruman ta biba huntu den union!”—Sal. 133:1.