Yehova Ta Yuda Nos Perseverá

1. Pakiko nos mester di perseveransia, i ken lo yuda nos? (1 Pedro 5:10)

BIDA den e último dianan akí no ta niun tiki fásil. Algun di nos ta sufri di malesanan króniko i otronan a pèrdè un ser kerí. Anto tin di nos ta haña nos ku oposishon di famia òf di gobièrnu. (Mat. 10:​18, 36, 37) Ta di komprondé anto ku Yehova su pueblo mester di perseveransia. Pero sea loke sea ta hasi bo bida difísil pa trata kuné, Yehova lo duna bo e goso i e forsa pa perseverá.—Lesa 1 Pedro 5:10.

2. Kua ta e úniko manera ku nos por perseverá?

² Perseveransia ta enserá mas ku djis wanta. E ta inkluí tambe keda fiel na Yehova i sirbié ku goso asta si bo haña bo ku difikultat, persekushon òf tentashon. Ademas, e ta enserá ku nos mester tin speransa ku Yehova lo drecha tur kos. Pero niun di nos no por perseverá riba nos mes forsa. Nos mester di Yehova! Ta é ta esun ku ta duna nos “e poder ku ta surpasá esun di hende.” (2 Kor. 4:7) Den e artíkulo akí nos ta bai trata kuater manera ku Yehova ta duna nos e poder pa perseverá anto kiko nos tin ku hasi di nos parti.

ORASHON

3. Dikon orashon ta asina spesial?

³ Pa yuda nos perseverá, Yehova a duna nos orashon. Aunke ku nos ta pekadó, el a hasi posibel pa nos por komuniká kuné. (Heb. 4:16) Para pensa un ratu kon spesial esei ta: Nos por papia ku Yehova tokante kualke tópiko i na kualke idioma. Tambe nos por papia kuné ki ora ku ta i for di unda ku ta, asta si nos ta nos so òf den prizòn. (Yón. 2:​1, 2; Echo. 16:​25, 26) Asta ora nos tin asina tantu ansiedat ku nos no por ni ekspresá loke nos ta sinti, tòg Yehova ta komprondé nos. (Rom. 8:​26, 27) Ta bisto ku orashon ta algu mashá spesial.

4. Kon nos por sa ku ora nos pidi Yehova pa perseveransia esei ta di akuerdo ku su boluntat?

⁴ Den Beibel Yehova ta bisa nos ku “kiko ku nos pidié ku ta di akuerdo ku su boluntat, e ta tende nos.” (1 Huan 5:14) Nos por pidi Yehova pa nos perseverá tambe? Sigur ku sí, pasobra esei ta di akuerdo ku su boluntat. Kon nos por sa esei? Ora nos perseverá i keda leal, Yehova por kontestá Satanas, kende ta papia malu di dje. (Pro. 27:11) Ademas, Beibel ta bisa ku Yehova ta kla pa “sostené tur hende ku nan kurason ta kompletamente dediká na dje.” (2 Kró. 16:9) Pues nos por tin sigur ku Yehova tin tantu e poder komo e deseo pa yuda nos perseverá.—Isa. 30:18; 41:10; Lúk. 11:13.

5. Kon orashon ta duna nos pas mental? (Isaías 26:3)

⁵ Beibel ta bisa ku ora nos papia ku Yehova, “e pas di Dios ku ta surpasá tur komprondementu lo protehá [nos] kurason i [nos] mente.” (Flp. 4:7) Nos ta masha gradisidu pa esei. Tur hende tin problema. Pero esnan ku no ta adorá Yehova ta purba yen di kos pa haña pas mental. Por ehèmpel, tin ta usa un forma di meditashon pa libra nan mente di tur pensamentu i preokupashon. Esei ta masha peligroso pasobra nan ta duna demoñonan chèns di influensiá nan mente. (Kompará ku Mateo 12:​43-45.) Anto asta si nan logra sinti pas, esei no ta nada di kompará ku e pas di Yehova. Ora ku nos resa na Yehova, nos ta mustra ku nos ta konfia kompletamente den dje anto e ta duna nos “pas kontinuo.” (Lesa Isaías 26:3.) Un manera ku Yehova ta hasi esei ta di yuda nos kòrda tekstonan ku ta konsolá nos. Nan ta rekordá nos kuantu Yehova stima nos i ke yuda nos, anto esei ta duna nos pas mental.—Sal. 62:​1, 2.

6. Kiko bo por inkluí den bo orashonnan? (Wak e plachi.)

⁶ Loke bo tin ku hasi: Ora bo ta tratando ku un problema, “tira bo karga riba Yehova.” Sí, bis’é kon bo ta sinti i pidié p’e duna bo pas. (Sal. 55:22) Pidié tambe pa duna bo sabiduria pa sa kon trata ku bo prueba. (Pro. 2:​10, 11) Anto no lubidá di gradisí Yehova den bo orashon. (Flp. 4:6) Presta bon atenshon kon Yehova ta yuda bo perseverá tur dia, gradisié pa esei i pa e bon kosnan ku e ta duna bo. No laga bo problemanan stroba bo di mira e otro bendishonnan ku ya bo tin.—Sal. 16:​5, 6.

BEIBEL

7. Kon lesamentu di Beibel por yuda nos perseverá?

⁷ Pa yuda nos perseverá, Yehova a duna nos su Palabra. Tin hopi teksto den Beibel ku ta mustra nos ku nos por konta ku Yehova su apoyo. Por ehèmpel, na Mateo 6:8 nos ta lesa ku Hesus a bisa: “Boso Tata, sa kiko boso tin mester asta promé ku boso pidié.” Nos por konfia e palabranan ei pasobra Hesus konosé su Tata mihó ku kualke otro hende. Pues ora nos ta pasa den difikultat nos no tin niun motibu pa duda ku Yehova sa loke nos tin mester i ku lo e yuda nos. Asina tin hopi mas teksto animante ku ta konvensé nos ku Yehova lo duna nos e forsa pa perseverá.—Sal. 94:19.

8. (a) Duna ehèmpel di un prinsipio di Beibel ku por yuda nos perseverá. (b) Ki por yuda nos kòrda prinsipionan di Beibel?

⁸ Prinsipio, òf konseho, ku nos ta haña den Beibel ta yuda nos perseverá. Nan ta siña nos lèsnan práktiko ku ta yuda nos tuma desishonnan sabí. (Pro. 2:​6, 7) Por ehèmpel, Beibel ta animá nos pa no ansha pa e dia di mañan, pero pa kada dia nos konfia den Yehova. (Mat. 6:34) Si nos tin kustumber di lesa Beibel tur dia i meditá riba e tekstonan, tin mas chèns ku prinsipionan lo bin na nos mente ora nos mester di nan.

9. Kon bo ta sinti ora bo lesa relatonan den Beibel kaminda Yehova a yuda su sirbidónan?

⁹ Aparte di prinsipio, den Beibel nos ta lesa tambe tokante hende meskos ku nos ku a konfia den Yehova i a haña su yudansa. (Heb. 11:​32-34; Sant. 5:17) Ora nos para ketu i pensa riba e relatonan ei, nos ta haña mas konfiansa ku Yehova ta “nos refugio i nos fortalesa. [I ku] ta fásil pa haña su yudansa den tempu difísil.” (Sal. 46:1) Ora nos mira kon e sirbidónan fiel ei di Yehova a mustra fe den dje i a sigui sirbié den tempunan difísil, esei ta animá nos pa hasi meskos.—Sant. 5:​10, 11.

10. Pa bo benefisiá di Beibel, kiko abo tin ku hasi?

¹⁰ Loke bo tin ku hasi: Segun bo ta lesa Beibel tur dia, traha un lista di teksto ku bo sa ku lo yuda abo. Algu tambe ku a yuda hopi ruman ta di kuminsá nan dia ku e teksto di dia. Asina ei nan tin algu animante pa pensa riba dje durante henter e dia. Esei ta loke a yuda un ruman ku yama Marie.a E mester a kuida su mayornan ku tabata muriendo di kanser. El a konta: “Tur mainta mi ta lesa e teksto di dia i mi ta meditá riba e versíkulo pa e dia ei. E kustumber akí a yuda mi pensa riba Yehova i tur e kosnan bunita ku e ta siña nos den su Palabra, na lugá di keda pensa riba mi problemanan.”—Sal. 61:2.

NOS RUMANNAN SPIRITUAL

11. Kon bo ta sinti ora bo sa ku bo rumannan tambe ta perseverá?

¹¹ Pa yuda nos perseverá, Yehova a duna nos nos rumannan rònt mundu. Ta un animashon pa sa ku nos rumannan den fe ta “soportando e mesun tiponan di sufrimentu.” (1 Ped. 5:9) Pues nos por tin sigur ku kualke situashon ku nos ta enfrentá, tin ruman ku a pasa den meskos i nan a perseverá. Esei ke men, ku nos tambe por perseverá!—Echo. 14:22.

12. Kon nos rumannan por yuda nos, i na nos turno kiko nos por hasi pa nan? (2 Korintionan 1:​3, 4)

¹² Segun ku nos ta perseverá, nos rumannan por animá nos. I Apòstel Pablo a eksperensiá esei. Pa un tempu e no tabatin mag di sali for di su kas. Pero e rumannan a yud’é, dunad’é konsuelo i yudansa práktiko. Hopi biaha den su kartanan el a yama e rumannan ku a yud’é danki i a menshoná nan na nòmber. (Flp. 2:​25, 29, 30; Kol. 4:​10, 11) Awe nos rumannan tambe ta duna nos konsuelo i ta yuda nos perseverá. Anto ora nan ta pasando den difikultat nos tambe por hasi meskos pa nan.—Lesa 2 Korintionan 1:​3, 4.

13. Kiko a yuda Maya perseverá?

¹³ Maya, un ruman na Rusia, a haña hopi animashon for di su rumannan spiritual. Na 2020, polisnan a bin pa listra su kas. Despues e mester a defendé su mes dilanti korte pa e echo ku el a papia tokante su kreensianan. El a bisa: “Durante e tempu ei e rumannan tabata yama mi, manda mensahe i skirbi karta pa mi. I nan tabata bisa mi kuantu nan stima mi.” El a sigui bisa: “Semper mi tabata sa ku mi rumannan stima mi, pero awor m’a bib’é i mir’é ku mi mes wowo.”

14. Kiko bo tin ku hasi pa haña yudansa for di bo rumannan? (Wak e plachi.)

¹⁴ Loke bo tin ku hasi: Ora bo ta pasa den problema, no hala pia for di bo rumannan ma hala pega na nan! Kòrda ku semper bo por pidi e ansianonan yudansa. Nan por ta “un lugá di skonde kontra bientu [i] un refugio kontra áwaseru pisá.” (Isa. 32:​2, di dos nota) Kòrda ku bo rumannan tambe ta pasa den situashonnan difísil. Pues, ora bo hasi algu pa yuda nan, bo ta keda positivo i esei ta duna bo forsa pa perseverá.—Echo. 20:35.

NOS SPERANSA

15. Kon speransa a yuda Hesus, i kon speransa por yuda abo tambe? (Hebreonan 12:2)

¹⁵ Pa yuda nos sigui perseverá, Yehova a duna nos un bunita speransa. (Rom. 15:13) Kòrda kon speransa a yuda Hesus perseverá durante e dia di mas difísil di su bida aki riba tera. (Lesa Hebreonan 12:2.) Hesus tabata sa ku si e keda fiel te na su morto lo e yuda vindiká e nòmber di su Tata. Tambe e tabata anhelá pa ta huntu ku su Tata atrobe i pa e dia yega ku lo e bira Rei i lo goberná huntu ku su rumannan ungí. Asina tambe nos speransa di biba pa semper den Dios su mundu nobo lo duna nos forsa pa sigui perseverá den kualke difikultat ku nos haña nos kuné den e mundu di Satanas.

16. Kon speransa a yuda Anna perseverá, i ki bo ta siña for di loke el a bisa?

¹⁶ Wak kon e speransa di biba den e mundu nobo a yuda un ruman na Rusia ku yama Anna. Su kasá a wòrdu arestá i será den prizòn wardando pa su kaso bai dilanti. Ora e situashon akí a pasa, Anna a bisa: “Regularmente mi tabata papia ku Yehova tokante e speransa ku el a duna mi i mi tabata pensa hopi riba kon bida lo ta e tempu ei. Esei a yuda mi pa no ta muchu desanimá. Mi sa ku e difikultatnan akí no ta pa semper. Yehova ta bai derotá su enemigunan i lo e rekompensá nos.”

17. Kon bo por mustra apresio pa nos bunita speransa? (Wak e plachi.)

¹⁷ Loke bo tin ku hasi: Tuma tempu pa pensa riba e bunita speransa ku Yehova a duna bo pa futuro. Visualisá bo mes ta kana rònt den Yehova su mundu nobo i ta wak tur e bendishonnan ku tur hende lo tin. Hasiendo esei lo pone ku kualke kos ku bo ta pasando den dje aworakí parse “leve i pa un tempu kòrtiku.” (2 Kor. 4:17) Tambe konta otro hende tokante e kosnan ku Yehova a primintí pa futuro. Imaginá kon duru ta pa un hende dil ku tur e problemanan den Satanas su mundu sin sa nada di loke Yehova a primintí pa futuro. Si bo djis duna nan un ñapa di nos bunita futuro, kisas nan lo haña gana di sa mas.

18. Dikon nos por konfia ku Yehova ta bai kumpli ku su promesanan?

¹⁸ Despues ku Yòb a wanta diferente prueba i a perseverá, el a bisa Yehova: “Awor mi sa ku mi Señor por hasi tur kos i ku nada no ta imposibel pa mi Señor.” (Yòb 42:2) Yòb a siña ku nada no por stroba Yehova su propósito. I e konfiansa ei ku Yehova ta bai kumpli ku su promesanan por yuda nos perseverá. Pa ilustrá, imaginá un señora ku ta tur desanimá pasobra el a bai serka diferente dòkter i niun no por a sali afó kon pa yud’é ku su malesa. Pero ora e haña un dòkter ku sí ta saka afó kiko presis ta kousa e problema i ta splik’é stap pa stap kon e ta bai yud’é, e ta sintié mas trankil aunke lo e no kura mesora. Awor sí e por perseverá pasobra e tin speransa ku e ta bai kura. Asina tambe, komo ku nos ta sigur ku Paradeis ta bini, nos por sigui perseverá.

19. Kiko nos tin ku hasi pa perseverá?

¹⁹ Manera nos a siña den e artíkulo akí, pa yuda nos perseverá, Yehova a duna nos orashon, Beibel, nos rumannan i nos speransa. Si nos hasi bon uso di kada un di nan, Yehova lo yuda nos den kualke difikultat ku nos ta pasa aden. Asina ei, nos lo por perseverá te ora ku tur e problemanan i sufrimentu ku ta bini di Satanas su mundu no t’ei mas.—Flp. 4:13.