“Manda Yama e Ansianonan”

1. Kon nos sa ku nos ta hopi presioso pa Yehova?

YEHOVA ta stima kada un di nos. Komo su karnénan, nos ta hopi presioso p’e. Nos sa esei pasobra el a kumpra nos ku e sanger di Hesus i a pèrkurá ansianonan pa kuida Su karnénan. (Echo. 20:28) Yehova a pone Hesus na kabes di e kongregashon anto nan tur dos ke pa ansianonan trata e karnénan ku kariño. Ansianonan ta sigui Hesus su guia i instrukshon pa yuda e karnénan keda ku un amistat será ku Yehova.—Isa. 32:​1, 2.

2. Den ken foral Yehova ta interesá? (Ezekiel 34:​15, 16)

² Ta bèrdat ku Yehova ta interesá den tur sirbidónan, pero e ta interesá foral den esnan ku a laga nan amistat kuné bira suak. E ta usa e ansianonan pa yuda nan. (Lesa Ezekiel 34:​15, 16.) Pero no ta nan so Yehova ke yuda, e ke yuda nos tur. P’esei ora nos mester di yudansa, Yehova no ke pa nos djis hasi orashon i pidié yudansa, sino tambe pa nos pidi yudansa na esnan ku ta “kuida e kongregashon i [ta] sirbi komo maestro.”—Efe. 4:​11, 12.

3. Dikon e artíkulo akí ta importante pa nos tur?

³ Den e artíkulo akí nos ta bai mira kon Yehova ta usa e ansianonan pa yuda rumannan ku a laga nan amistat kuné bira suak. Nos lo haña kontesta pa e siguiente preguntanan: Ki ora nos tin ku pidi e ansianonan yudansa? Dikon nos tin ku hasi esei? I kon nan ta yuda nos? Kisas aworakí bo amistat ku Yehova ta fuerte, i bo no mester di yudansa for di e ansianonan. Asina mes, e artíkulo akí lo yuda nos haña apresio pa e manera ku Yehova ta usa e ansianonan i ta yuda nos sa ki pa hasi ora nos mester di yudansa.

KI ORA NOS TIN KU “MANDA YAMA E ANSIANONAN”?

4. Dikon nos por bisa ku Santiago 5:​14-16, 19 i 20 ta papia di un persona ku tin un amistat suak ku Yehova? (Wak e plachi.)

⁴ Disipel Santiago a splika kon Yehova ta usa e ansianonan pa yuda nos. Santiago a skirbi: “Tin un hende den boso ku ta malu? Lag’é manda yama e ansianonan di kongregashon.” (Lesa Santiago 5:​14-16, 19, 20.) Ora nos wak e versíkulonan nos ta mira ku Santiago a bisa ku e persona tin ku yama e ansianonan i no un dòkter. El a splika tambe ku e persona ta kura ora e haña pordon di su pikánan. Pues ta bisto ku e tabata papia di un persona ku tin ku drecha su amistat ku Yehova. Den algun manera loke un persona ku ta malu den sentido spiritual tin ku hasi ta meskos ku loke un hende ku ta malu den sentido físiko tin ku hasi. Ora nos ta malu, nos tin ku bai dòkter, splik’é nos doló i hasi loke el a manda nos. Asina tambe ora nos amistat ku Yehova ta suak, nos tin ku bai na e ansianonan, splika nan nos situashon i hasi kaso di e konseho ku nan ta duna nos for di Beibel.

5. Kon nos por haña sa si nos amistat ku Yehova ta birando suak?

⁵ Den Santiago kapítulo 5, Santiago ta animá nos pa papia ku e ansianonan asina nos sinti ku nos no ta dje será ei ku Yehova manera promé. Pues lo ta sabí pa nos pidi e ansianonan yudansa promé ku nos hasi algu ku Yehova no ta aprobá. Pero Beibel ta atvertí nos ku e peliger ta eksistí ku nos por kere ku nos amistat ku Yehova ta fuerte pero e realidat no ta asina. (Sant. 1:22) Esei ta loke a pasa ku algun kristian na e kongregashon na Sardis. Anto Hesus a hala nan atenshon na esei. (Rev. 3:​1, 2) Kon nos por sa si nos tin un bon amistat ku Yehova? Un manera ta di kompará nos entusiasmo tempu nos a batisá ku awor. (Rev. 2:​4, 5) Pa hasi esei nos tin ku puntra nos mes: ‘Te ainda mi ta disfrutá di mi lesamentu di Beibel i pa meditá riba loke m’a lesa? Te ainda mi ta bai tur mi reunionnan i ta prepará pa tur? Te ainda mi gusta prediká òf mi ta preferá di usa mi tempu pa otro kos? Mi ta pensa mas riba plaka ku ántes?’ Si bo kontesta pa kualke un di e preguntanan ei ta sí, esei ke men ku bo amistat ku Yehova ta birando suak. Anto chèns ta hopi grandi ku esei lo bira pió si bo no hasi nada. Si bo no ta logra drecha e kosnan akí riba bo mes òf bo a ripará ku ya bo a kuminsá desviá for di Yehova su normanan, bo tin ku pidi e ansianonan yudansa.

6. Ki un ruman tin ku hasi si el a kometé un piká grave?

⁶ Tin algun piká ku ta asina grave ku si un ruman no arepentí e por ser saká for di e kongregashon. Si bo a kometé un di e pikánan ei, bo tin ku bai papia ku un ansiano. (1 Kor. 5:​11-13) Esei ta masha importante pasobra den e kaso akí, riba bo mes bo no por drecha bo amistat ku Yehova. Pa Yehova pordoná nos pikánan, nos tin ku “hasi obra ku ta mustra . . . arepentimentu.” (Echo. 26:20) Anto un manera ku nos ta hasi esei ta di bai serka e ansianonan si nos a kometé un piká grave.

7. Ken mas por pidi e ansianonan yudansa?

⁷ E ansianonan t’ei pa yuda tambe e rumannan ku ta sinti ku ta hopi duru pa lucha kontra nan deseonan robes. (Echo. 20:35) Esaki ta e kaso foral pa rumannan ku, por ehèmpel, promé ku nan a bira Testigu tabata adikto na droga, tabata wak pornografia òf tabata hiba un bida inmoral. Si abo ta un di e rumannan ei, no sinti miedu pa pidi e ansianonan yudansa. Bo por papia ku un ansiano ku bo ta sinti bo konfortabel kuné, i bo por tin sigur ku lo e skucha bo, splika bo ki bo tin ku hasi pa lucha kontra deseonan robes i kòrda bo ku Yehova lo keda hopi kontentu si bo sigui resistí e deseonan ei. (Ekl. 4:12) Ta di komprondé ku kisas bo ta sinti bo kansá ku ketu bai bo tin ku sigui lucha ku e mesun kosnan. Pero no preokupá, e ansianonan lo kòrda bo ku Yehova ta masha kontentu ku bo ta sigui pidi yudansa. Ora bo pidi yudansa bo ta mustra ku bo ta humilde i ku bo ke hasi Yehova kontentu.—1 Kor. 10:12.

8. Akaso nos tin ku bai serka e ansianonan pa delaster un fayo ku nos hasi? Splika.

⁸ Pero nos no tin nodi di bai serka e ansianonan pa delaster un fayo ku nos hasi. Por ehèmpel, por pasa ku un dia bo por pleita ku un ruman. Na lugá di bai stret serka e ansianonan bo por sigui Hesus su konseho tokante hasi pas entre abo i bo ruman. (Mat. 5:​23, 24) Bo por buska den nos publikashonnan kon bo por ta mas suave, tene mas pasenshi i mustra mas dominio propio. Pero si te ainda bo mester di yudansa, bo por bai serka un ansiano. Ora ku Evodia i Síntike no por a resolvé nan desakuerdo, Pablo a pidi un ruman hòmber den e kongregashon pa yuda nan. Pues un ansiano den bo kongregashon por yuda bo tambe.—Flp. 4:​2, 3.

DIKON NOS TIN KU MANDA YAMA E ANSIANONAN?

9. Asta si nos tin bèrgwensa, dikon nos mester bai papia ku e ansianonan? (Proverbionan 28:13)

⁹ Nos mester di fe i kurashi pa pidi pa yudansa ora nos a kometé un piká grave òf ora nos ta sinti ku nos no por sigui lucha kontra un deseo robes. Asta si bo tin bèrgwensa di bai serka e ansianonan, tòg ta importante pa bo bai. Ta Yehova ta esun ku a pèrkurá pa e ansianonan i nan t’ei pa yuda bo mantené un amistat será ku Yehova. Pues ora bo bai papia ku nan, bo ta mustra ku bo ta konfia Yehova i ku bo ta obedes’é. Nos sa ku nos mester di Yehova su yudansa pa sigui hasi loke ta korekto. (Sal. 94:18) Anto si nos a peka, nos sa tambe ku Yehova lo pordoná nos si nos bai papia ku e ansianonan i stòp di hasi loke ta malu.—Lesa Proverbionan 28:13.

10. Kiko por pasa si nos skonde nos pikánan?

¹⁰ Kiko lo pasa si bo no bai papia ku e ansianonan? Wèl, bo ta hasi bo situashon mas pió. Si bo tarda pa bai dòkter ora bo ta malu, mas malu lo bo bira. Asina tambe, si nos no bai papia ku e ansianonan, nos ta sufri mas. Yehova no por pordoná nos i nos no por drecha nos amistat kuné. Esei ta loke a pasa ku Rei David ora el a purba di skonde su piká. El a sufri spiritualmente, emoshonalmente i asta físikamente. (Sal. 32:​3-5) Yehova no ke pa esaki pasa ku nos. P’esei e ta bisa nos pa bai serka e ansianonan pa nan yuda nos drecha nos amistat kuné.—Isa. 1:​5, 6, 18.

11. Kiko mas lo pasa si nos skonde un piká grave?

¹¹ Si nos skonde nos pikánan, esei por asta afektá otro hende. Por ehèmpel, nos por stroba Yehova su spiritu santu di yuda e kongregashon i tambe stroba e pas di nos rumannan. (Efe. 4:30) Pero kiko si nos haña sa ku un ruman a kometé un piká grave? Nos mester anim’é pa bai papia ku e ansianonan. Nos no ke bira kulpabel di a skonde su piká. (Lev. 5:1) P’esei nos ta dun’é sufisiente tempu pa papia ku e ansianonan. Pero si e no hasi esei, nos amor i lealtat pa Yehova lo motivá nos pa bai papia ku e ansianonan i bisa nan e bèrdat. Asina nos ta yuda tene e kongregashon limpi i yuda e ruman ku a peka pa drecha su amistat ku Yehova.

KON E ANSIANONAN TA YUDA NOS?

12. Kon e ansianonan ta yuda un ruman ku mester drecha su amistat ku Yehova?

¹² Beibel ta bisa ku e ansianonan tin e tarea di yuda esnan ku mester drecha nan amistat ku Yehova. (1 Tes. 5:14) Ora bo bai buska yudansa serka e ansianonan, nan lo hasi bo pregunta pa purba di saka afó kiko bo ta pensa i kiko bo ta sinti. (Pro. 20:5) Kisas esei no ta fásil pa bo debí na bo kultura, personalidat òf pasobra bo tin bèrgwensa di loke a pasa. Pero lo bo yuda nan hopi si abo ta habrí ku nan. No ansha si bo papia algun kos “sin pensa.” (Yòb 6:3) Na lugá di korigí delaster un kos ku bo bisa, e ansianonan lo hasi nan esfuerso pa komprondé henter e asuntu promé ku nan usa Beibel pa yuda bo. (Pro. 18:13) Nan ta komprondé ku ta tuma tempu pa duna un hende e yudansa ku e mester. Pues, nan ta konsiente ku e yudansa ei tin biaha por rekerí mas ku ún kòmbersashon.

13. Ora e ansianonan hasi orashon pa nos i duna nos konseho for di Beibel, kon esei ta yuda nos? (Wak e plachi.)

¹³ Ora bo bai serka e ansianonan nan lo no laga bo sinti bo mas pió. Al kontrario, nan ta bai hasi orashon pa bo i e orashon ei lo yuda bo mas di loke abo por pensa. Ademas, nan ta bai hunta bo “ku zeta den nòmber di Yehova.” (Sant. 5:​14-16) E “zeta” ei ta referí na e bèrdat ku tin den Beibel. Pues e ansianonan lo usa Beibel pa duna bo konsuelo i pa drecha bo amistat ku Yehova. (Isa. 57:18) E konseho ku nan duna bo for di Beibel por fortalesé bo pa sigui hasi loke ta korekto. Ta komo si fuera, via e ansianonan, bo ta tende Yehova bisa: “Esaki ta e kaminda korekto. Kana den dje.”—Isa. 30:21.

14. Segun Galationan 6:​1, kon ansianonan ta yuda un ruman ku “dal un paso robes”? (Wak e plachi.)

¹⁴ Lesa Galationan 6:1. Un ruman ku “dal un paso robes,” no ta hasiendo loke Yehova ke pa e hasi. E paso robes ei por ta sea un mal desishon òf un piká grave kontra e lei di Dios. Komo ku e ansianonan stima e ruman, nan lo “purba di trese e hende ei bèk riba e kaminda korekto. [I lo] hasi esei ku suavedat.” E palabra griego tradusí komo “trese . . . bèk” ta duna e idea di loke un dòkter ta hasi ora ku e tin ku pone un wesu bèk na su lugá pa e kura bon. Meskos ku un bon dòkter ta hasi esfuerso pa drecha e wesu sin kousa mas doló, e ansianonan ta hasi esfuerso pa duna un ruman konseho sin laga e ruman sintié mas malu ainda. Beibel ta bisa e ansianonan tambe pa “wak [nan] mes bon.” Esei kier men ku segun ku nan ta yuda e ruman apliká prinsipionan di Beibel, semper nan mester kòrda ku nan ta imperfekto i tambe por dal un paso robes. P’esei nan lo evitá di pensa ku nan ta mas hustu ku e ruman ku nan ta purba di yuda. Na lugá di esei nan lo ta humilde i lo mustra e ruman kompashon.—1 Ped. 3:8.

15. Ki ta bon pa nos hasi si nos tin un problema?

¹⁵ Nos por konfia nos ansianonan pasobra Yehova a siña nan pa no papia ku otro hende tokante nos kosnan personal. Tambe nan a siña pa duna konseho for di Beibel i no segun nan mes opinion. Nan a siña tambe ku nan tin ku sigui yuda nos karga nos karga, esta, sigui yuda nos dil ku nos problemanan. (Pro. 11:13; Gal. 6:2) Ta bèrdat ku nan tin diferente personalidat i no ta tur tin mesun eksperensia. Pero bo por aserká kualke un di nan. Ma esei no ke men, ku ora di buska konseho nos ta bai di ansiano pa ansiano sperando pa un di nan bisa nos loke nos tin gana di tende. Si nos hasi esei, nos ta manera hende ku ta preferá di tende algu ku ta “kishikí nan orea” na lugá di tende e “siñansa ku ta benefisiá nan” i ku ta bin fo’i Beibel. (2 Tim. 4:​3, nota) Ora nos bai serka un ansiano kisas e por puntra nos: ‘B’a papia ku un ansiano kaba tokante esaki? Kiko el a konsehá bo?’ Komo ku ansianonan ta modesto, nan por pidi un otro ansiano konseho.—Pro. 13:10.

NOS RESPONSABILIDAT

16. Ki responsabilidat kada un di nos tin?

¹⁶ Aunke ansianonan ta yuda nos i duna nos konseho ora nos tin problema, loke nan lo no hasi ta di bisa nos ki desishon nos tin ku tuma. Kada un di nos tin e responsabilidat di mustra Yehova, pa medio di loke nos ta bisa i hasi, ku nos ta stim’é i ke agrad’é. Anto e di su banda lo yuda nos tuma bon desishon pa keda fiel na dje. (Rom. 14:12) Pues ansianonan lo usa Beibel pa yuda nos komprondé kon Yehova ta pensa tokante un asuntu i djei laga nos tuma nos mes desishon. Ora nos para pensa i apliká e konseho ku nan duna nos for di Beibel nos ta entrená nos “kapasidat di komprondé” pa tuma desishon sabí.—Heb. 5:14.

17. Kiko mester ta nos determinashon?

¹⁷ Nos ta masha kontentu di ta forma parti di e karnénan di Yehova! Yehova a manda “e bon wardadó,” Hesus, pa duna su bida pa asina nos por biba pa semper. (Huan 10:11) Ademas, Yehova a pèrkurá ansianonan pa kuida nos pasobra el a primintí: “Mi ta bai duna boso wardadó di karné ku ta traha di akuerdo ku mi boluntat, i nan lo sòru pa boso haña konosementu i komprondementu profundo.” (Yer. 3:15) P’esei si nos ripará ku nos fe ta birando suak òf nos mester di yudansa pa drecha nos amistat ku Yehova, nos no mester tin bèrgwensa ni miedu pa bai serka e ansianonan. Laga nos keda determiná pa hasi uso di e provishon akí di Yehova mediante e ansianonan.