Kiko Beibel Ta Bisa Tokante Pandemia?

Loke Beibel ta bisa

Beibel a profetisá ku durante e último dianan lo tin pèst, esta, tur sorto di malesa i pandemia, ku lo plama na hopi lugá. (Lukas 21:11) Pero e pandemianan ei no ta kastigu di Dios. Al kontrario, pronto Dios lo usa su Reino pa kaba ku tur problema di salú, inkluso pandemia.

Beibel a profetisá ku lo tin pandemia?

Beibel no a profetisá spesífikamente tokante niun malesa òf pandemia. Por ehèmpel, Beibel no ta papia di COVID-19, AIDS òf grip spañó. Pero sí el a profetisá ku lo tin “pèst” i “malesa mortal.” (Lukas 21:11; Revelashon 6:8) Beibel a bisa ku nan lo sosodé den “e último dianan,” ku ta ser yamá tambe “konklushon di e era akí.”—2 Timoteo 3:1; Mateo 24:3.

Dios a yega di kastigá hende ku malesa?

Beibel ta menshoná algun kaso kaminda Dios a usa malesa pa kastigá hende. Por ehèmpel, el a laga algun hende haña lepra. (Numbernan 12:1-16; 2 Reinan 5:20-27; 2 Krónikanan 26:16-21) Pero eseinan tabata kaso isolá i e malesa no a plama i afektá hende inosente. Mas bien, e malesanan ei tabata kastigu spesífiko riba sierto hende ku a rebeldiá kontra Dios.

E pandemianan ku tin awe ta kastigu di Dios?

Nò. Tin hende ta bisa ku den e tempu akí Dios ta usa pandemia i otro malesa pa kastigá hende. Pero Beibel no ta siña esei. Dikon nos ta bisa asina?

Pa kuminsá, algun persona fiel na Dios—tantu den tempu bíbliko komo awe—a sufri di malesa. Por ehèmpel, 1 Timoteo 5:23 ta bisa ku un kristian fiel ku yama Timoteo kada biaha tabata malu. Pero Beibel no ta bisa ku esei tabata pasobra Dios tabata rabiá kuné. Awe ta pasa meskos. Tin persona fiel na Dios ku ta bira malu òf pega ku malesa. Hopi biaha, e personanan ei ta pega ku malesa pasobra nan tabata na e lugá robes na un mal momento.—Eklesiástes 9:11, Tradukshon di Mundu Nobo.

Ademas, Beibel ta siña ku ainda no a yega e momento pa Dios kastigá hende malbado. Mas bien, nos ta bibando awor den “un dia di salbashon,” es desir, den e tempu ku Dios ta duna hende chèns pa siña konos’é i haña salbashon. (2 Korintionan 6:2) E ta hasi esei pa medio di e kampaña mundial di predikashon ku ta plama un mensahe masha positivo: ‘e bon notisia di e Reino.’—Mateo 24:14.

Pandemia lo kaba un dia?

Sí. Beibel ta profetisá ku lo yega un tempu ku niun hende lo ta malu. Dios lo usa su Reino pa kura tur problema di salú. (Isaías 33:24; 35:5, 6) Lo no tin sufrimentu, doló ni morto mas. (Revelashon 21:4) Dios lo resusitá hende ku a muri. E hendenan ei lo gosa di bon salú i lo biba den paradeis aki riba tera.—Salmo 37:29; Echonan 24:15.

Teksto di Beibel tokante malesa

Mateo 4:23: “[Hesus] a pasa den henter Galilea, miéntras ku e tabata siña hende den nan snoanan i tabata prediká e bon notisia di Reino i kura tur sorto di malesa i tur sorto di enfermedat ku e hendenan tabatin.”

Nifikashon: E milagernan di Hesus a demostrá na eskala chikitu loke pronto e Reino di Dios lo hasi pa henter humanidat.

Lukas 21:11: “Lo tin pèst.”

Nifikashon: Pandemia i problema di salú ta parti di loke lo a sosodé den e último dianan.

Revelashon 6:8: “Ata un kabai blek; i esun sintá riba dje tabatin e nòmber Morto. I Graf tabata sigui djis su tras. I a duna nan outoridat pa mata . . . ku malesa mortal.”

Nifikashon: E profesia na Revelashon tokante e kuater koredónan di kabai ta mustra ku lo tabatin pandemia den nos tempu.