Beibel A Bisa Kon Hende Lo Pensa i Aktua den Nos Tempu?

Loke Beibel Ta Bisa

Sí, Beibel a bisa ku e manera ku hende ta pensa i aktua lo bira mas malu den nos tempu. Beibel a indiká ku mayoria di hende lo rechasá norma i balor ku ta yuda hende biba bon ku otro.a (2 Timoteo 3:1-5) Pero Beibel a bisa tambe ku algun hende lo no laga e manera di pensa i aktua negativo akí influensiá nan. Ku Yehova su yudansa, nan lo hasi esfuerso pa resistí influensia negativo i siña kon pa pensa i aktua na un manera ku ta agradá Dios.—Isaías 2:2, 3.

Den e artíkulo akí:

Kiko Beibel a bisa tokante e manera ku hende lo pensa i aktua den nos tempu?

Beibel a deskribí vários manera di pensa i aktua negativo ku lo bira komun den nos tempu, i tur ta bini di un aktitut egoista. Hende lo ta “sin dominio propio,” “lo stima nan mes” i lo “stima plaser en bes di stima Dios.”—2 Timoteo 3:2-4.

Di akuerdo ku e profesia ei, hopi hende awe ta pensa solamente riba nan mes, riba loke lo benefisiá nan, riba loke lo pone nan sinti bon i riba loke lo pone nan sinti ku nan bida tin propósito, etcetera. Awe, hopi hende no ta interesá den otro hende. Nan ta pensa solamente riba nan mes; tur kos ta ami ami ami. Hopi hende awe ta “sin amor pa loke ta bon.” Pasobra nan ta pensa asina tantu riba nan mes, ku nan no por ni balorá bon kualidat. Komo ku nan ta asina “malagradesí,” nan no ta sinti e nesesidat pa mustra apresio pa loke nan tin òf pa loke otro hende ta hasi pa nan.—2 Timoteo 3:2, 3.

E aktitut egoista di hende ta hiba na hopi otro aktitut ku Beibel a bisa lo ta komun den nos tempu:

Golos. Hopi hende ta “stima plaka.” Nan ta kere ku e kantidat di plaka òf kos material ku nan tin ta loke ta determiná kon eksitoso nan ta den bida.—2 Timoteo 3:2.
Orguyoso. Hopi hende ta “bromadó, arogante” i “hinchá di orguyo.” (2 Timoteo 3:2, 4) E tipo di hendenan ei ta broma i ta hala hopi atenshon na nan abilidatnan, kualidatnan i rikesa.
Kalumniadó. Awe hopi hende ta ‘blasfemá’ i ‘kalumniá.’ (2 Timoteo 3:2, 3) E ekspreshonnan ei por referí na esnan ku ta insultá otro hende òf Dios, òf ku ta plama mentira tokante nan.
Tèrko. Hopi hende ta “desleal,” “traidor,” “kabesura” i nan “no ta dispuesto pa sera ningun akuerdo.” (2 Timoteo 3:2-4) Nan ta demostrá e kualidatnan akí ora nan no ta dispuesto pa kooperá ku otro pa yega na un akuerdo ni tene nan mes na e promesanan ku nan a hasi.
Violento. Hopi hende awe ta “feros” i kla pa rabia. Esei hopi bes ta pone nan aktua na un manera kruel òf violento.—2 Timoteo 3:3.
Rebelde. Hesus a bisa ku lo tin “oumento di maldat” den nos tempu. (Mateo 24:12) El a bisa tambe ku tur rònt di nos lo tin “desòrdu” òf “rebelion.”—Lukas 21:9; Beibel na papiamentu koriente.
Falta di amor pa famia. Komo ku asina tantu hende ta “desobediente na mayornan” i ta “sin kariño [pa famia],” hopi miembro di famia ta ser neglishá i tin mas tantu kaso di abusu i violensia doméstiko.—2 Timoteo 3:2, 3.
Adorá Dios na manera hipókrita. Mas i mas hende awe tin djis un “aparensia di ta deboto na Dios.” (2 Timoteo 3:5) En bes di hasi loke Dios ke pa nan hasi, nan ta sigui guia di lidernan religioso ku ta bisa nan loke nan tin gana di tende.—2 Timoteo 4:3, 4.

Ki efekto un aktitut egoista tin riba otro hende?

Komo ku hopi hende awe ta egoista, mas tantu hende ku nunka tin problema mental i emoshonal. (Eklesiástes 7:7) Por ehèmpel, algun hende ku ta stima plaka ta gaña otro hende òf probechá di nan. Hende ku ta sin kariño sa probechá di miembro di nan famia, i esei por pone nan bira depresivo òf haña gana di kometé suisidio. I un persona ku ta traishoná un otro persona por kous’é hopi doló, i e doló ei por keda pa hopi tempu.

Dikon hende lo bai di malu pa pió?

Beibel ta splika dikon hende ta bai di malu pa pió:

Hende no ta stima Dios ni nan próhimo mes tantu mas. (Mateo 24:12) Pa e motibu ei, hende ta bira mas i mas egoista.
Satanas e Diabel a ser saká for di shelu i benta abou riba tera. (Revelashon 12:9, 12) Desde e tempu ei, e ta influensiando hende pa ta mas egoista.—1 Huan 5:19.

Kon nos por evitá e manera di pensa i aktua negativo di otro hende?

Beibel ta bisa: “Keda leu for di hende asina.” (2 Timoteo 3:5, Beibel na papiamentu koriente) Esei no ke men ku nos mester isolá nos mes for di otro hende. En bes di esei, nos mester evitá di tin amistat será ku hende egoista i ku no ta biba segun Dios su normanan.—Santiago 4:4.

Tur hende lo bai di malu pa pió?

Nò. Beibel a bisa ku algun hende lo “suspirá i keha pa motibu di tur e abominashonnan ku ta wòrdu hasí.” (Ezekiel 9:4) E hendenan ei lo no ta egoista, i nan lo laga Dios su normanan guia nan bida. Nan manera di papia i e kosnan ku nan ta hasi lo ta diferente for di otro hende. (Malakías 3:16, 18) Por ehèmpel, nan lo purba di ta na pas ku tur hende; nan lo no partisipá den guera, i nan lo keda leu di tur sorto di violensia.—Mikéas 4:3.

Hende lo sigui bai di malu pa pió te na e punto ku ta violensia i káos so tin?

Nò. E situashon lo no bira asina malu ku ta violensia i káos so tin. En bes di esei, pronto Dios lo kaba ku tur hende ku ta sigui desobedesé su normanan. (Salmo 37:38) Lo e sòru pa “un tera nobo,” esta, hende riba tera ku tin Dios su aprobashon. Anto e hendenan humilde ei lo biba na pas ku otro pa semper. (2 Pedro 3:13; Salmo 37:11, 29) E speransa aki no ta un fantasia. Asta awor Beibel ta yudando hende kambia nan bida i biba na un manera ku Dios ta aprobá.—Efesionan 4:23, 24.

a Profesia di Beibel i loke ta tuma lugá rònt di nos ta mustra ku nos ta bibando den “e último dianan,” ku ta ser deskribí komo tempu “krítiko” òf “difísil.” (2 Timoteo 3:1; Beibel na papiamentu koriente) Pa mas informashon, wak “Kiko Ta e Señal di ‘e Último Dianan,’ òf di ‘e Tempu di e Fin’?”