Ken Lo Salba Tera?

Hopi hende ta preokupá pa e daño ku hende ta hasi na tera i na e bida ku tin riba dje. Algun eksperto riba tereno di medio ambiente ta bisa ku loke hende ta hasi ta kousa hopi daño na vários forma di bida, i asta ta menasá di kaba ku un gran kantidat di mata i bestia.

Hende lo destruí tera òf nan lo siña biba na un manera ku lo no kousa daño na naturalesa?

Esfuerso di hende lo tin éksito?

Hopi eksperto ta konfia ku hende por protehá tera i biba na un manera ku lo no kousa daño na naturalesa. Pero algun investigadó ta bisa ku pa hende por tin éksito, nan mester hasi kambio den diferente área pareu. Algun di e kambionan akí ta enserá:

Mehorá e manera ku ta kuida tera, mondi, muras i laman.
Usa vários método di agrikultura i di produsí energia.
Kambia e sistema di produkshon i di distribushon di kuminda i evitá di dispidí kuminda. Ademas, mester purba di motivá hende pa kome ménos karni i piská i kome mas bèrdura.
Yuda hende komprondé ku kalidat di bida no ta dependé di e kantidat di kos material ku nan tin.

Kiko bo ta pensa? Ta realístiko pa kere ku e gobièrnunan, e empresanan i hende lo kooperá ku otro na un manera nunka bisto? Òf bo ta kere ku esei no ta posibel debí ku algun hende ta golos, egoista i ta biba pa awe so?—2 Timoteo 3:1-5.

Tin speransa

Beibel ta garantisá ku futuro di nos planeta ta sigur. E ta splika dikon esfuerso di hende no ta sufisiente pa salba tera, i e ta mustra ki kambio mester tuma lugá pa logra salba tera. Ademas, Beibel ta bisa kon e kambionan akí lo tuma lugá.

E motibu dikon esfuerso di hende no ta sufisiente pa salba tera. Yehovaa Dios a krea tera, i el a duna hende e tarea pa kuid’é. (Génesis 1:28; 2:15) Si nan a sigui e guia di nan Kreador i obedesé su instrukshonnan, nan lo tabatin éksito. (Proverbionan 20:24) En bes di hasi esei, nan a rechasá Yehova, i nan a tuma desishon pa nan mes. (Eklesiástes 7:29) Hende no tin e kapasidat pa kuida tera, i kualke esfuerso ku nan hasi lo no tin masha éksito.—Proverbionan 21:30; Yeremías 10:23.

E kambionan ku mester tuma lugá. Dios lo no permití hende destruí tera. (Revelashon 11:18) Dios lo no drecha e gobièrnunan ni sosiedat humano, mas bien, lo e remplasá nan. (Revelashon 21:1) P’esei, Yehova ta bisa: “Tende! Mi ta traha tur kos nobo.”—Revelashon 21:5.

Kon e kambionan ei lo tuma lugá? Yehova lo remplasá gobièrnu humano pa un gobièrnu den shelu ku yama e Reino di Dios. E gobièrnu ei, bou di guia di Hesukristu, lo goberná tera.—Daniel 2:44; Mateo 6:10.

E Reino di Dios lo siña hende pa biba segun e normanan hustu di Dios. Ora hende rekonosé outoridat di nan Kreador i aseptá su guia, nan lo por biba na un manera ku nan lo no hasi daño na naturalesa. (Isaías 11:9) Beibel ta mustra ku e gobièrnu di Dios lo sòru pa su siudadanonan tin un ekselente kalidat di bida, sin kousa daño na tera. E gobièrnu ei lo hasi lo siguiente:

Pèrkurá kuminda pa tur hende.—Salmo 72:16.
Restorá e rekursonan natural.—Isaías 35:1, 2, 6, 7.
Garantisá ku hende i bestia ta biba na pas ku otro.—Isaías 11:6-8; Oséas 2:18.
Prevení desaster natural.—Marko 4:37-41.

Bo por ta sigur ku pronto e Reino di Dios lo trese e kambionan akí. Si bo ke sa mas, lesa e artíkulo “Na Ki Tempu e Reino di Dios Lo Goberná Mundu?”

a Beibel ta bisa ku Dios su nòmber ta Yehova.—Salmo 83:18.

Kiko nos por hasi awor pa mustra rèspèt pa nos tera?

Miéntras nos ta spera pa e Reino di Dios solushoná tur problema ku tera ta enfrentá, for di awor nos por hasi tur loke nos por pa mustra rèspèt pa tera. Por ehèmpel, nos por evitá desperdisio i obedesé e leinan lokal di resiklahe.—Huan 6:12, 13; Romanonan 13:1, 5.

Brett ta un konsehero di medio ambiente ku a baha ku penshon. Su konosementu di ekologia a yud’é komprondé ku tin un Kreador ku lo salba tera. Lesa su historia di bida den e artíkulo na spañó, “Estoy convencido de que la vida es obra de Dios,” riba jw.org.
Un manera ku Testigunan di Yehova ta mustra rèspèt na nan Kreador ta di apliká vários método ku ta bon pa medio ambiente den nan proyektonan grandi di konstrukshon. Si bo ke sa loke nan a logra, wak e vidio, na spañó: Edificios respetuosos del medio ambiente que honran a Jehová.

Teksto di Beibel tokante tera

Génesis 2:15: “Anto Yehova Dios a pone e hòmber den hòfi di Éden p’e kultivá i kuida e hòfi.”

Loke esei ta nifiká: Dios a duna hende e tarea pa kuida tera.

Génesis 1:28: “Ademas, Dios a bendishoná nan, i Dios a bisa nan: ‘Haña yu i bira hopi; yena tera i domin’é. Boso lo tin outoridat riba piská di laman, para di shelu i tur bestia ku ta move riba tera.’”

Loke esei ta nifiká: Hende a haña e tarea pa kuida e bestianan.

Isaías 45:18: “Pasobra Yehova ta Kreador di shelu, e Dios berdadero, e Persona ku a forma tera i estables’é firmemente. E no a krea tera pòrnada. Mas bien, el a form’é pa e ser habitá, i esaki ta loke e ta bisa: ‘Ami ta Yehova, i no tin niun otro.’”

Loke esei ta nifiká: Dios su propósito no a kambia. E hendenan ku ta biba riba tera lo kumpli ku Dios su propósito original.

Salmo 37:29: “Hende hustu lo heredá tera, i nan lo biba riba dje pa semper.”

Loke esei ta nifiká: Hende ku sigui e normanan hustu di Dios lo haña e oportunidat pa biba pa semper riba tera.

Salmo 98:6-8: ‘Dal gritu di viktoria dilanti di Yehova, nos Rei. Laga laman i tur loke tin den dje grita di alegria; laga tera, i tur ku ta biba riba dje, tambe grita di alegria. Laga e riunan bati man; laga e serunan kanta di alegria.’

Loke esei ta nifiká: E gobièrnu di Dios lo solushoná tur problema di medio ambiente.