Hende No Ta Konfia e Polítikonan Mas—⁠Kiko Beibel Ta Bisa?

Aña 2024 lo marka historia pa loke ta trata e kantidat di elekshon polítiko ku lo tuma lugá rònt mundu. Sinembargo, hopi hende a kuminsá pèrdè konfiansa den e polítikonan.

• Na Merka, e hendenan a hasi un enkuesta, i mayoria di e merikanonan ku a ser entrevistá ta haña ku “hopi polítiko tin meta egoista.” Hende ta sinti ku meta di e polítikonan no ta pa sirbi e pueblo ku nan ta representá.a—Pew Research Center, 19 di sèptèmber 2023.

Hopi hóben tampoko no ta konfia e polítikonan.

• ‘Hopi tiner ke solushon pa e problemanan krusial di mundu, pero e enkuestanan ta mustra ku hopi hóben no ta haña ku e polítikonan ta solushonando e problemanan ei.’—The New York Times, 29 di yanüari 2024.

• ‘Un enkuesta ta mustra ku hopi hóben ta konfia e hendenan riba YouTube mas ku nan ta konfia e polítikonan.’—The Korea Times, 22 di yanüari 2024.

Nos por tin konfiansa ku e polítikonan lo yuda trese un mihó futuro? Ken sí nos por konfia?

Tene kuidou ken bo ta konfia

Hende tin bon motibu pa tene kuidou ken nan ta konfia. Beibel ta bisa ku “un hende sin eksperensia ta kere tur kos ku bo bis’é, pero un persona sabí ta pensa bon promé ku e dal un paso.”—Proverbionan 14:15.

• Si bo ke sa kon pa evaluá un informashon pa mira si loke e ta bisa ta kuadra ku bèrdat, e siguiente artíkulo ta duna algun sugerensia práktiko: “Protehá Bo Mes Kontra Informashon Falsu.”

Asta e polítikonan di mas onesto i ku tin e mihó intenshonnan ta limitá den loke nan por hasi. Beibel ta spièrta:

• “No konfia den prensnan [òf, e lidernan humano], den yu di hende, den kende no tin salbashon.”—Salmo 146:3, Beibel Santu.

Un lider ku nos por konfia

Beibel ta mustra ku Dios a nombra un lider ku nos por konfia i ku ta plenamente kapasitá pa goberná: Hesukristu. (Lukas 1:32, 33) Hesus ta Rei di e Reino di Dios. E Reino di Dios ta un gobièrnu selestial ku ta goberná for di shelu.—Mateo 6:10.

• Ta importante pa bo haña sa dikon bo por konfia den Hesus i kiko lo e hasi pa solushoná e problemanan ku nos ta enfrentá. Bo por lesa e siguiente artíkulonan pa haña kontesta: “Ken Ta Rei di e Reino di Dios?” i “Kiko e Reino di Dios Lo Hasi?”