Tin un Gobièrnu Stabil Ku Por Goberná Nos Planeta?—⁠Kiko Beibel Ta Bisa?

Tur kaminda na mundu, e gobièrnunan ta aribabou. Asta e paisnan ku ta parse di tin un gobièrnu stabil tin hopi problema. Hopi di e paisnan ku ta parse di tin un gobièrnu stabil ta haña nan ku eskándalo polítiko, elekshon ku resultado hopi pèrtá, divishon polítiko i hopi protesta violento kontra nan gobièrnu.

Beibel ta mustra ku ta un gobièrnu so tin ku ta stabil. Muy probablemente, bo a tende di e gobièrnu ei kaba. E ta e gobièrnu ku Hesus a menshoná den e orashon ku el a siña su disipelnan hasi.

“Pues, boso mester hasi orashon asin’akí: ‘Nos Tata ku ta den shelu, bo nòmber sea santifiká. Laga bo Reino bini. Laga bo boluntat sosodé, meskos ku den shelu, tambe riba tera.’”—Mateo 6:9, 10.

Kiko Beibel ta bisa tokante e Reino ei?

E Reino—⁠un gobièrnu stabil

E Reino ta goberná for di shelu.

Hesus a yama e gobièrnu ei “e Reino di shelu.” (Mateo 4:17; 5:3, 10, 19, 20) P’esei, el a bisa: “Mi reino no ta parti di e mundu akí.”—Huan 18:36.

E Reino lo remplasá tur gobièrnu humano.

Beibel ta bisa: “E reino akí . . . lo destruí i pone un fin na tur e reinonan [humano] ei, i e reino akí so lo keda pa semper.”—Dánièl 2:44.

E Reino, ku Hesukristu komo su Rei, nunka lo ser destruí.

Beibel ta bisa: “Su gobernashon lo dura pa semper; sí, su gobernashon lo no yega na un fin. Su reino lo no ser destruí.”—Dánièl 7:13, 14.

E Reino lo trese pas i trankilidat riba tera.

Beibel ta bisa: “Pero kada ken lo sinta trankil bou di palu di wendrùif i di figu, sin niun hende spanta nan.”—Mikéas 4:4, Beibel na papiamentu koriente.

Haña sa mas tokante e Reino

Tempu ku Hesus tabata riba tera, el a dediká su tempu predikando “bon notisia di Reino.” (Mateo 9:35) Ademas, el a profetisá:

‘Bon notisia di e Reino lo ser prediká den henter e tera habitá, komo testimonio pa tur nashon, anto e fin lo yega.’—Mateo 24:14.

Awe, e bon notisianan di Reino ta ser prediká den mas ku 240 pais. Nos ta invitá bo pa siña mas tokante e gobièrnu ei i kon bo por benefisiá di e gobernashon ei.

Por fabor wak e vidio Kiko e Reino di Dios Ta?