Kiko Ta Shelu?

E kontesta ku Beibel ta duna

E palabra “shelu” ta ser usá den Beibel pa básikamente tres kos: (1) e shelu físiko, (2) kaminda e kriaturanan spiritual invisibel ta i (3) komo símbolo di un posishon haltu òf elevá. Den kada kaso, e konteksto ta yuda nos determiná e komprondementu korekto di e palabra.a

1. E shelu físiko. E palabra “shelu” por referí na e atmósfera di tera kaminda bientu ta supla, para ta bula, nubia ta produsí áwaseru i sneu i werlek ta kòrta. (Salmo 78:26; Proverbionan 30:19; Isaías 55:10; Lukas 17:24) Tambe e por referí na espasio, kaminda tin “solo, luna i streanan.”—Deuteronomio 4:19, Beibel Santu; Génesis 1:1.

2. Kaminda e kriaturanan spiritual invisibel ta. E palabra “shelu” ta referí tambe na e region di spiritu, òf kaminda kriaturanan spiritual invisibel ta eksistí, un forma di eksistensia muchu mas elevá i ku no ta parti di e universo físiko. (1 Reinan 8:27; Huan 6:38) Ei ta kaminda Yehova Dios, kende “ta un Spiritu,” ta biba i tambe e angelnan ku el a krea. (Huan 4:24; Mateo 24:36) Tin biaha “e shelunan” ta referí na e angelnan fiel, “e asamblea di e santunan.”—Salmo 89:5-7, Beibel Santu.

   Beibel ta usa e palabra “shelu” pa referí tambe na e parti di e region di spiritu kaminda Yehova ta, su “lugá di biba.” (1 Reinan 8:43, 49, Beibel Santu; Hebreonan 9:24; Revelashon 13:6) Por ehèmpel, Beibel a profetisá ku Satanas i e demoñonan lo a ser saká for di shelu; ke men nan no ta permití pa bini den presensia di Yehova mas. Sinembargo, nan ta keda kriaturanan spiritual.​—Revelashon 12:7-9, 12.

3. Símbolo di un posishon haltu òf elevá. Beibel ta usa e palabra “shelu” pa referí na un posishon haltu, por lo general ora tin di haber ku gobièrnu òf outoridat. Pensa por ehèmpel riba:

   • Yehova Dios komo e Soberano todopoderoso.​—2 Krónikanan 32:20; Lukas 15:21.

   • E Reino di Dios, e gobièrnu ku lo bai remplasá gobernashon humano. Beibel ta referí na e Reino ei komo e “shelunan nobo.”—Isaías 65:17; 66:22, Beibel Santu; 2 Pedro 3:13.b

   • Kristiannan ku ta biba riba tera i ku tin e speransa pa bai shelu.​—Efesionan 2:6.

   • Gobièrnunan humano ku a halsa nan mes riba nan súpditonan.​—Isaías 14:12-14; Daniel 4:20-22; 2 Pedro 3:7.

   • Spiritunan malbado ku tin dominio riba mundu.​—Efesionan 6:12; 1 Huan 5:19.

Kon shelu, òf e region di spiritu, ta?

Den e region di spiritu, tin hopi aktividat. Einan ta biba sientos di miónes di angel “ku ta ehekutá [Yehova] su palabra.”—Salmo 103:20, 21, Beibel Santu; Daniel 7:10.

Beibel ta bisa ku shelu ta un lugá yen di lus. (1 Timoteo 6:15, 16) Profeta Ezekiel a haña un vishon tokante shelu kaminda tabatin “splendor” tur kaminda, miéntras ku e vishon ku Daniel a haña a inkluí “un riu di kandela.” (Ezekiel 1:26-28; Daniel 7:9, 10, Beibel Santu) Shelu ta santu, òf limpi, i bunita.​—Salmo 96:6; Isaías 63:15; Revelashon 4:2, 3.

E deskripshon ku Beibel ta duna di shelu ta masha impreshonante. (Ezekiel 43:2, 3) Apesar di esei, e region di spiritu ta algu ku ta imposibel pa hende komprondé kompletamente.