LOKE HÓBEN SA PUNTRA
Ta Malu pa Flirt?
Kiko ta flirtmentu?
Tin hende ta pensa ku flirtmentu ta un manera pa laga un hende di e sekso opuesto sa ku bo ta interesá den dje. Esei por ta ku palabra òf akshon. Ta malu pa mustra interes romántiko den un hende? No nesesariamente. Un mucha muhé ku yama Ann a bisa: “Si bo tin edat pa kasa i tin interes den un hende, kon otro bo por haña sa kiko e ta sinti pa bo?”
Sinembargo, den e artíkulo akí nos lo trata un otro tipo di flirtmentu: un hende ku ta hasi manera e tin interes romántiko den un otro hende sin intenshon di kuminsá algu serio kuné.
“No tin nada malu den duna un hende atenshon spesial ku e intenshon di kuminsá un relashon romántiko kuné. Loke sí ta malu ta pa laga un hende pensa ku bo ta interesá den dje sin intenshon di kuminsá algu serio kuné.”—Deanna.
Dikon tin hende ta flirt?
Tin hende ta flirt djis pa nan sinti nan mes mas mihó. Hailey a bisa: “Ora bo realisá ku bo por haña e tipo di atenshon ei, lo bo ke haña mas di dje.”
Pero si bo laga un hende pensa ku bo tin interes romántiko den dje miéntras ku no ta asina, bo ta mustra ku bo no tin kunes ku su sintimentunan. Ademas, esaki ta mustra ku bo no ta madurá. Beibel ta bisa: “Bobedat ta alegria pa esun ku falta komprondementu.”—Proverbionan 15:21, Beibel Santu.
Ku bon motibu Hailey a bisa: “Flirtmentu por kuminsá komo algu inosente, pero hopi biaha e a kaba na malu.”
Kiko ta e peligernan di flirtmentu?
Flirtmentu ta daña bo reputashon.
“Un hende ku ta flirt ta mustra ku e ta insigur i no ta madurá. Bo ta ripará ku e no ta sinsero i ku e ta purba di probechá di bo.—Jeremy.
Beibel ta bisa: “Amor . . . no ta buska su mes interes.”—1 Korintionan 13:4, 5.
Pensa riba esaki: Kiko ta e kosnan ku bo por bisa òf hasi ku por duna bo e reputashon di ta un hende ku ta gusta flirt?
Flirtmentu ta hasi e otro hende doló.
“Si mi konosé un mucha hòmber ku ta gusta flirt, mi no ke ta banda di dje mes. E ta pone mi pensa ku e úniko motibu ku e ta papia ku mi ta pasobra mi ta un mucha muhé. Hende ku ta flirt no tin interes den mi; úniko kos ku nan ta buska pa nan sinti nan mes mihó.”—Jaqueline.
Beibel ta bisa: “Laga kada hende sigui buska, no su mes benefisio, sino esun di e otro persona.”—1 Korintionan 10:24.
Pensa riba esaki: Un hende a yega di laga bo kere ku e ta interesá den bo sin ku e tabata? Si ta asina, kon bo a sinti bo despues? Kon bo por evitá di laga otro hende sinti nan asina?
Flirtmentu ta pone ku ta bira mas difísil pa bo haña amor berdadero.
“Ami lo no ke kasa ni sikiera date un hende ku ta gusta flirt. Kon mi por siña konosé òf konfia un hende ku no ta sinsero?”—Olivia.
E salmista David a skirbi: ‘Mi no ta anda ku hipókrita.’—Salmo 26:4, Beibel Santu.
Pensa riba esaki: Ki tipo di hende ta gusta un hende ku ta flirt? Ta e tipo di hendenan ei abo ke atraé?