Beibel A Kambia Atraves di Añanan?

Nò. Un komparashon di e manuskritonan antiguo ta mustra ku Beibel no a kambia ni maske nan a kopi’é pa míles di aña usando material ku ta kaba na nada.

Esaki ke men ku nunka nan no a hasi fout ora di kopi’é?

A haña míles di manuskrito antiguo di Beibel. Algun di eseinan tabatin vários diferensia, mustrando ku nan a hasi fout ora di kopia. Mayoria di e diferensianan akí ta chikitu i no ta kambia nifikashon di e teksto. Sinembargo, a deskubrí algun kambio importante. Ta parse ku algun di e kambionan ei a ser hasí hopi tempu pasá ku e intenshon di kambia e mensahe di Beibel. Laga nos wak dos ehèmpel:

1. Algun tradukshon mas bieu di Beibel ta bisa na 1 Huan 5:7: “den shelu, e Tata, e Palabrá, i e Spiritu Santu: i nan tres ta un.” Sinembargo, otro manuskritonan konfiabel ta konfirmá ku e palabranan ei no ta den e teksto original. Nan a ser agregá despues.a P’esei, algun tradukshon moderno di Beibel konfiabel a laga nan afó.

2. Dios su nòmber personal ta aparesé míles di biaha den e manuskritonan antiguo di Beibel. Sinembargo, hopi tradukshon di Beibel a remplas’é ku título manera “Señor” òf “Dios.”

Kon nos por ta sigur ku no tin hopi fout mas ku no a ser deskubrí?

Awe, ta mas fásil ku nunka pa haña fout pasobra nan a deskubrí hopi manuskrito mas.b Un komparashon di e manuskritonan akí a revelá kiko tokante eksaktitut di Beibel awe?

• Eksperto William H. Green a bisa tokante e Skritura Hebreo (òf “Tèstamènt Bieu”): “Ku tur siguransa por bisa ku ningun otro obra di antigwedat no a ser transmití ku tantu eksaktitut.”

• F. F. Bruce, un eksperto riba tereno di Beibel, a skirbi tokante e Skritura Griego Kristian (òf e “Tèstamènt Nobo”): “Tin hopi mas evidensia pa loke tin skirbí den e Tèstamènt Nobo ku pa e obranan skirbí di outornan klásiko. I tòg niun hende no ta kuestioná si e obranan akí ta outéntiko.”

• Sir Frederic Kenyon, un eksperto renombrá di manuskrito di Beibel, a bisa ku un hende “por tene henter Beibel den su man i bisa sin miedu òf duda ku e tin e Palabrá di Dios, ku a ser transmití di generashon pa generashon atraves di siglonan sin fout importante.”

Ki motibunan mas nos tin pa konfia ku Beibel a ser kopiá ku eksaktitut?

• Kopistanan hudiu i kristian a konserbá e relatonan ku ta saka na kla e foutnan grandi di e pueblo di Dios.c (Numbernan 20:12; 2 Samuel 11:​2-4; Galationan 2:​11-​14) Nan a konserbá tambe e relatonan ku ta kondená e desobedensia di e nashon hudiu i ta saka na kla e doktrinanan di hende. (Oséas 4:2; Malakías 2:​8, 9; Mateo 23:​8, 9; 1 Huan 5:​21) Ku eksaktitut nan a kopia e relatonan akí i a mustra ku nan ta onesto i ku nan tin rèspèt profundo pa Dios su Palabra sagrado.

• No ta rasonabel pa kere ku Dios, kende a inspirá Beibel, a hasi sigur tambe pa konserbá su mensahe?d (Isaías 40:8; 1 Pedro 1:​24, 25) Al fin i al kabo, su intenshon no tabata pa e hendenan di antigwedat so benefisiá di Beibel, pero nos tambe. (1 Korintionan 10:11) En realidat, “tur loke a ser skirbí anteriormente a ser skirbí pa nos instrukshon, pa asina mediante nos perseveransia i e konsuelo for di e Skritura nos por tin speransa.”​—Romanonan 15:4.

• Hesus i su siguidónan a sita for di e kopianan di e Skritura Hebreo. Nan no a preokupá ni un tiki pa e eksaktitut di e tekstonan antiguo ei.​—Lukas 4:​16-​21; Echonan 17:​1-3.