LOKE HÓBEN SA PUNTRA
Pakiko Semper Mi Ta Bisa Nèt e Kos Robes?
“Tin biaha mi ta sinti ku mi por dominá mi lenga, pero otro biaha ta manera mi ta sigui papia sin ku mi mente por kontrolá mi lenga!”—James.
“Ora mi ta nèrvioso mi ta papia sin pensa i ora mi ta mas trankil mi ta papia di mas. Pues básikamente, nunka mi ta bisa loke ta bon.”—Marie.
Beibel ta bisa: “Lenga ta un kandela i un kandela chikitu ta pega un mondi grandi na kandela!” (Santiago 3:5, 6) Loke bo ta papia sa hinka bo den problema? Si ta asina e artíkulo akí por yuda bo.
Pakiko mi ta bisa nèt e kos robes?
Imperfekshon. Beibel ta bisa: “Nos tur ta trompeká hopi biaha. Si un hende no ta trompeká den loke e ta bisa, e ta un hòmber perfekto, kapas pa frena tambe henter su kurpa.” (Santiago 3:2) Imperfekshon ta pone ku ta fásil pa nos hasi òf bisa nèt e kosnan ku ta robes.
“Ya komo ku mi tin un mente i un lenga imperfekto, ta irealístiko pa pensa ku mi tin pleno kontrol riba nan.”—Anna.
Papia di mas. Beibel ta bisa: “Ora tin hopi papiamentu, piká no ta falta, ma esun ku frena su lepnan ta sabí.” (Proverbionan 10:19) Hende ku ta papia hopi i no ta kla pa skucha por ofendé otro hende mas lihé bisando kos robes.
“E hende di mas sabí den un kamber no ta semper e hende ku ta na palabra. Hesus ta e hende di mas sabí ku a kana riba tera i tòg tin biaha el a keda ketu.”—Julia.
Palabra sarkástiko. Beibel ta bisa: “Tin hende ta papia sin pensa, manera hinká di spada.” (Proverbionan 12:18) Un ehèmpel di papia sin pensa ta sarkasmo, palabra skèrpi ku ta humiá otro hende. Hende ku ta papia sarkástiko por bisa; “Mi tabata hasiendo wega.” Pero si bo humiá otro hende no ta algu prèt. Beibel ta bisa pa “laga kalumnia wòrdu kitá for di boso, huntu ku tur malisia.”—Efesionan 4:31.
“Mi ta gusta hasi wega i ta prèt, kualidat ku hopi biaha ta hiba na sarkasmo i ta hinka mi den problema.”—Oksana.
Una bes bo a bisa algu, bo no por drech’é bèk, si no ta manera ora bo ke hala pasta di djente bèk den su tubu.
Siña dominá bo lenga
No ta fásil pa kontrolá bo lenga, pero e prinsipionan bíbliko por yuda bo. Por ehèmpel, konsiderá lo siguiente:
“Rabia, ma no hasi piká; meditá den bo kurason riba bo kama i keda ketu.” —Salmo 4:4.
Tin biaha ta mihó pa keda ketu. Un hóben ku yama Laura a bisa: “Loke mi ta sinti na e momento ku mi ta asina rabiá kisas no ta meskos ku lo mi sinti mas despues. Ora mi kalma, mi ta kontentu ku mi no a bisa loke mi tabata pensa.” Asta un pousa di un par di sekònde por yuda bo evitá di bisa kos robes.
“No ta orea ta tèst palabra, manera shel’i boka ta purba su kuminda?”—Yòb 12:11.
Bo por spar bo mes di hopi doló, si bo tèst loke bo ke bisa ku e siguiente preguntanan:
Loke mi ke bisa ta bèrdat, amigabel òf nesesario?—Romanonan 14:19.
Kon lo mi sinti mi si un hende bisa ami esei?—Mateo 7:12.
Lo mi respetá opinion di e otro persona?—Romanonan 12:10.
Esaki ta e momento apropiá pa bis’é?—Eklesiástes 3:7.
“Ku humildat, konsiderá ku otro hende ta superior na boso.”—Filipensenan 2:3.
E konseho ei por yuda bo pensa bon di otro hende, i esei na su turno, lo yuda bo pa kontrolá loke bo ke bisa promé ku bo papia. Asta ora bo a bisa algu kaba ku a pone un hende sintié malu, humildat por yuda bo pa pidi despensa mas lihé ku ta posibel. Esei lo yuda bo pa hasi bo esfuerso pa dominá bo lenga e siguiente biaha. (Mateo 5:23, 24)