Dios A Usa Evolushon pa Krea Diferente Sorto di Bida?

E kontesta ku Beibel ta duna

Nò. Beibel ta bisa bon kla ku Dios a krea hende i tambe diferente “sorto” di bestia i mata.a (Génesis 1:12, 21, 25, 27; Revelashon 4:11) Beibel ta splika ku henter e famia humano ta desendiente di nos promé mayornan, Adam i Eva. (Génesis 3:20; 4:1) Beibel no ta apoyá e teoria, konosí komo evolushon teista, esta, e teoria ku Dios a usa evolushon pa krea diferente sorto di bida. Di otro banda, Beibel no ta kontradisí tampoko e opservashonnan sientífiko, esta, ku tin variedat denter di kada sorto.b

• Kiko algun hende ta kere?

• Beibel ta apoyá e teoria di evolushon?

• Kiko di e abilidat ku mata i bestia tin di por adaptá nan mes?

Kiko algun hende ta kere?

E ekspreshon “evolushon teista” ta referí na un variedat amplio di idea. Segun Encyclopædia Britannica, e ekspreshon ei ta transmití e idea di “ku Dios ta usa e proseso di selekshon natural pa dirigí naturalesa.”c

Evolushon teista por enserá e siguiente ideanan tambe:

• Tur organismo ta bini di e mesun antepasado pre-históriko.

• Un forma di bida por evolushoná i bira kompletamente un otro forma di bida. Nan sa yama e konsepto ei makro-evolushon.

• Ku di un, òf otro manera, Dios ta sòru pa e prosesonan ei tuma lugá.

Beibel ta apoyá e teoria di evolushon?

Segun e teoria di evolushon teista, loke Beibel ta bisa den Génesis tokante kreashon no ta eksakto. Sinembargo, Hesus a referí na e relato di Génesis komo un relato históriko konfiabel. (Génesis 1:26, 27; 2:18-24; Mateo 19:4-6) Beibel ta bisa ku, promé ku Hesus a bini na tera, e tabata biba den shelu huntu ku Dios i a yuda Dios krea “tur kos.” (Huan 1:3) P’esei, e idea ku Dios a usa evolushon pa laga diferente forma di bida yega na eksistensia no ta kuadra ku loke Beibel ta siña.

Kiko di e abilidat ku mata i bestia tin di por adaptá nan mes?

Beibel no ta bisa kuantu variedat por tin di e mes sorto. Beibel no ta kontradisí tampoko e echo ku diferente sorto di bestia i mata ku Dios a krea por varia segun ku nan ta reprodusí òf ta adaptá na nan medio ambiente. Algun hende ta pensa ku e kambionan ei ta un forma di evolushon, pero realidat ta ku e variedatnan ei no ta produsí niun forma di bida nobo.