Plaka Ta Rais di Tur Sorto di Maldat?

E kontesta ku Beibel ta duna

Nò. Beibel no ta bisa ku plaka ta malu, ni ku plaka ta e kousa di tur kos malu. E ekspreshon “plaka ta rais di tur sorto di maldat” ta un interpretashon robes di loke Beibel ta bisa. Beibel ta bisa ku ta “amor pa plaka ta rais di tur sorto di kos perhudisial.”—1 Timoteo 6:10.

Kiko Beibel ta bisa tokante plaka?

Beibel ta rekonosé ku ora bo usa plaka na un manera sabí, e por ta útil i por sirbi asta komo “protekshon.” (Eklesiástes 7:12) Tambe, Beibel ta elogiá hende ku ta gusta duna, kisas asta dunando regalo den forma di plaka.—Proverbionan 11:25.

Na mes momento, Beibel ta spièrta nos pa no enfoká demasiado riba plaka. E ta bisa: “Laga boso manera di biba ta liber di amor pa plaka, i keda kontentu ku loke boso tin.” (Hebreonan 13:5) Pues, e lès ku nos por saka ta: Tene plaka na su lugá i no kore tras di rikesa. Na lugá di kore tras di rikesa, nos mester keda kontentu ku e kosnan ku realmente nos tin mester, manera kuminda, paña i un dak riba nos kabes.—1 Timoteo 6:8.

**Dikon Beibel ta spièrta nos tokante amor pa plaka?**

Hende golos lo no haña bida eterno. (Efesionan 5:5) Esei ta pasobra golosidat ta un forma di idolatria, òf adorashon di dios falsu. (Kolosensenan 3:5) Algun hende, den nan esfuerso pa yega na loke nan ta deseá, a bandoná bon prinsipio debí na nan golosidat. Proverbionan 28:20 ta bisa: “Esun ku ta purá pa bira riku lo no keda sin kastigu.” Hende golos por bai asina leu di kometé delitu manera soborno, ekstorshon, froude, sekuestro i asesinato.

I asta si amor pa plaka no hiba na mal kondukta, e por tin otro mal konsekuensia. Beibel ta bisa ku “hende ku ta determiná pa bira riku ta kai den tentashon, den trampa i den hopi deseo bobo i perhudisial ku ta hiba hende na destrukshon i ruina.”—1 Timoteo 6:9.

Kon Beibel su konsehonan tokante plaka por yuda nos?

Si nos no bai kontra Dios su normanan moral i spiritual pa motibu di plaka, nos lo tin rèspèt propio i tambe su aprobashon i sosten. Pa esnan ku sinseramente ta purba di agradá Dios, e ta primintí: “Hamas lo mi bandoná bo, i hamas lo mi laga bo desampará.” (Hebreonan 13:5, 6) Tambe Dios ta sigurá nos ku “un hende fiel lo ta yen di bendishon.”—Proverbionan 28:20.

Konseho di Beibel Tokante Plaka

Eklesiástes 7:12: “Plaka ta protekshon.”

Nifikashon: Ora nos usa plaka na e manera korekto, e por duna nos un sierto grado di siguridat.

Lukas 12:15: “Asta ora un hende tin na abundansia, su bida no ta dependé di loke e tin.”

Nifikashon: Plaka no ta e kos di mas importante den bida, lo e no kontribuí na nos salbashon.

1 Timoteo 6:10: “Pasobra amor pa plaka ta rais di tur sorto di kos perhudisial, i algun hende ku a kai pa e amor akí a desviá for di fe i a kousa nan mes hopi doló.”

Nifikashon: Plaka riba su mes no ta malu. Pero hende ku ta stima plaka—ku ta hasi plaka e kos di mas importante den nan bida—ta hinka nan mes den problema.

Hebreonan 13:5: “Laga boso manera di biba ta liber di amor pa plaka, i keda kontentu ku loke boso tin.”

Nifikashon: Na lugá di kore tras di rikesa, nos lo ta sabí si nos keda kontentu ku loke realmente nos tin mester.

Mateo 19:24: “Ta mas fásil pa un kamel pasa dor di wowo di un angua ku pa un hende riku drenta e Reino di Dios.”

Nifikashon: Hesus a kaba di invitá un yònkuman pa siguié. Pero e yònkuman a nenga pasobra e tabata muchu pegá na su propiedatnan. P’esei Hesus a dun’é spièrtamentu. Un hende ku ta pone rikesa na promé lugá ta kore riesgo di pèrdè bida eterno.