E Personanan Ku Tin Mas Ta Yuda e Personanan Ku Tin Ménos

Testigunan di Yehova ta organisá aktividat religioso i ta hasi trabou importante pa yuda hende den mas ku 200 pais. Pero 35 di e paisnan akí so ta haña sufisiente donashon di e rumannan lokal pa kubri nan gastunan. Kon e paisnan ku tin ménos ta logra kubri nan gastunan?

Kuerpo Gobernante di Testigunan di Yehova ta analisá kiko e Testigunan rònt mundu tin mester pa adorá Yehova i pa prediká e bon notisia. Nan ta hasi sigur ku nan ta manehá i usa e donashonnan bon. Si un sukursal haña mas donashon ku e tin mester pa sòru pa aktividat lokal, e ta hasi e fondonan ei disponibel pa e paisnan ku tin ménos rekurso. Di e manera akí, nan ta sigui ehèmpel di e promé kristiannan ku a yuda otro i “asina trese un balansa.” (2 Korintionan 8:14) Nan a usa loke nan tabatin di mas pa yuda e otro kristiannan ku no tabatin hopi.

Kon e rumannan ku a risibí kontribushon for di e sukursalnan ku tin mas ta sinti? Por ehèmpel, na Tanzania, mas ku mitar di e poblashon ta biba ku ménos ku dos dòler pa dia. Nan a usa e fondonan ei pa renobá e Salòn di Reino di kongregashon Mafinga. E kongregashon a skirbi: “Despues di e renobashon, hopi mas hende ta asistí na nos reunionnan! Nos ta masha gradisidu na e organisashon di Yehova i e hermandat mundial pa nan generosidat, ku a hasi posibel ku nos por tin un bunita lugá di adorashon.”

Algun ruman na Sri Lanka no tabatin sufisiente kuminda debí na e pandemia COVID-19. Entre nan tabatin Imara Fernando i su yu hòmber chikitu, Enosh. Pero, danki na e kontribushonnan for di otro pais, nan a haña e yudansa ku nan tabatin mester. Den un karchi ku nan mes a traha, nan a skirbi: “Nos ta gradisí nos rumannan ku a mustra amor na nos durante e tempunan difísil akí. Nos ta masha kontentu di forma parti di e famia akí, i nos ta sigui hasi orashon pa Yehova yuda tur nos rumannan den e último dianan akí.”

Sin importá unda nos rumannan ta biba, nan ta sinti nan motivá pa kompartí loke nan tin. Por ehèmpel, Enosh, a traha su mes kaha chikitu di kontribushon pa asina e tambe por kontribuí i yuda e famianan den nesesidat. Guadalupe Álvarez tambe ta masha generoso. E ta biba na un parti di México kaminda tiki hende tin un entrada regular òf salario mínimo. Tòg, e ta duna loke e por. El a skirbi: “Mi ta gradisidu pa Yehova su bondat i amor. Mi sa ku mi kontribushon lo bai huntu ku e donashonnan di otro hende i lo yuda mi rumannan ku ta den nesesidat.”

E sukursalnan ku ta manda sèn ta masha kontentu ku nan por yuda e paisnan ku tin mas nesesidat. Anthony Carvalho, ku ta sirbi den e Komité di Sukursal na Brazil, a bisa: “Pa hopi aña, e obra den nos pais tabatin mester di yudansa finansiero di otro pais. Danki na e apoyo akí, nos a mira un kresementu grandi. Awor, nos situashon finansiero a mehorá, i nos tin e privilegio di yuda otro hende. E rumannan ta wak e trabou di prediká komo un obra mundial i awor nan ta komprondé ku nan por duna mas di nan mes.”

Kon ta e mihó manera ku Testigunan di Yehova por yuda nan rumannan ku ta den nesesidat? E mihó manera ta di kontribuí na e obra mundial, i no pa manda sèn direktamente na e sukursalnan di otro pais. Por hasi esei via e kaha di kontribushon di kongregashon marká “Obra Mundial” òf via donate.jw.org. Tur e donashonnan akí ta ser apresiá mashá.