Promé Krónikanan
18 Algun tempu despues, David a derotá e filisteonan, i el a pone nan bou di su outoridat. El a konkistá nan stat Gat i e pueblonan den bisindario ku tambe tabata bou di nan dominio. 2 Despues, David a derotá Móab, i e moabitanan a bira su sirbidónan. Nan tabatin ku pag’é belasting.
3 David a derotá Hadadézer, rei di Zoba, tambe. Hadadézer tabata den bisindario di Hámat, riba kaminda pa tuma e region di riu Eufrátes bou di su kontrol atrobe. 4 David a kita 1.000 garoshi for di dje. David a kohe tambe 7.000 di su koredónan di kabai i 20.000 di su sòldánan na pia prezu. David a manka* tur e kabainan di garoshi ku eksepshon di 100 kabai di garoshi. 5 E sirionan di Damasko a bini pa yuda Rei Hadadézer di Zoba, pero David a mata 22.000 di nan. 6 David a lanta vários pòst militar na Damasko, na Siria. E sirionan a bira sirbidó di David, i nan mester a pag’é belasting. Unda ku David a bai, Yehova a dun’é viktoria.* 7 Ademas, David a kita e eskudonan rondó di oro for di e sirbidónan di Hadadézer, i el a trese e eskudonan Herúsalèm. 8 Anto David a kohe un kantidat grandi di koper na Tibhat i na Kun, dos stat ku tabata pertenesé na Hadadézer. Ta ku e koper ei Sálomon a laga traha e tanki grandi di koper pa karga awa ku tabata yama Laman, e pilánan i e artíkulonan di uso di koper.
9 Ora Toú,* rei di Hámat, a tende ku David a derotá henter e ehérsito di Rei Hadadézer di Zoba, 10 mesora el a manda su yu hòmber Hadoram* serka Rei David pa wak si tur kos tabata bon ku David i pa felisit’é pasobra el a derotá Hadadézer. (Hadadézer a bringa na vários okashon kontra Toú.) Hadoram a trese tur sorto di artíkulo di oro, di plata i di koper pa David. 11 Rei David a dediká* tur e artíkulonan ei na Yehova. E plata i e oro ku el a kita for di tur e nashonnan, esta, ku el a kita for di Édòm, Móab, e amonitanan, e filisteonan i e amalekitanan, tambe el a dediká na Dios.
12 Abisai, yu hòmber di Zeruya, a derotá 18.000 edomita den Vaye di Salu. 13 El a lanta vários pòst militar na Édòm, i tur e edomitanan a bira sirbidó di David. Unda ku David a bai, Yehova a dun’é viktoria.* 14 Anto David a sigui goberná riba henter Israel. El a goberná henter e pueblo ku hustisia i rektitut. 15 Yóab, yu hòmber di Zeruya, tabata komandante di e ehérsito, i Yehósafat, yu hòmber di Ahilud, tabata kronista.* 16 Zádòk, yu hòmber di Ahitub, i Ahímelèk, yu hòmber di Abiatar, tabata saserdote. I Savsa tabata sekretario. 17 Benaya, yu hòmber di Yehoyada, tabata kabesante di e keretitanan i di e peletitanan. Anto e yu hòmbernan di David tabata okupá e puestonan mas importante despues di David, e rei.