Rut i Noemí

Durante un tempu di hamber na Israel, un señora israelita ku tabata yama Noemí a bai biba na Móab huntu ku su kasá i nan dos yu hòmbernan. Ku tempu, e kasá di Noemí a fayesé. Noemí su dos yu hòmbernan a kasa ku hende muhé di Móab. Un di e mucha muhénan tabata yama Rut, i e otro mucha muhé tabata yama Orpa. Lamentablemente, ku tempu, e dos yu hòmbernan di Noemí tambe a fayesé.

Ora Noemí a tende ku e hendenan na Israel no tabata sufri di hamber mas, el a disidí di bai kas bèk, na Israel. Rut i Orpa a kuminsá biaha kuné, pero na kaminda, Noemí a bisa nan: ‘Boso tur dos tabata bon kasá pa mi yunan, i boso tabata bon suegra. Pero mi ke pa boso kasa atrobe. P’esei, ta mihó boso bai Móab bèk. Einan, ta boso kas.’ E dos mucha muhénan a bisa Noemí: ‘Nos ta stima bo! Nos no ke bai laga bo.’ Noemí a keda bisa nan pa nan bai Móab bèk. Finalmente, Orpa a bai bèk. Pero Rut sí a keda ku Noemí. Noemí a bisa Rut: ‘Orpa ta bai bèk serka su pueblo i serka su diosnan. Bai kuné. I bai kas di bo mama bèk.’ Pero Rut a bis’é: ‘Mi no ta bai laga bo. Bo pueblo lo ta mi pueblo, i bo Dios lo ta mi Dios.’ Kon bo ta kere Noemí lo a sintié ora Rut a bis’é esei?

Rut i Noemí a yega Israel na kuminsamentu di kosecha di puspas. Un dia, Rut a bai piki grano ku a keda atras den kunuku di un hòmber ku tabata yama Bóaz. Bóaz tabata yu di Ráhab. Bóaz a tende ku Rut tabata un mucha muhé di Móab ku no a bai laga Noemí. Bóaz a bisa su trahadónan pa nan laga èkstra grano atras den kunuku pa Rut por a piki.

E anochi ei, Noemí a puntra Rut: ‘Den ken su kunuku bo a traha awe?’ Rut a bis’é: ‘Mi a traha den kunuku di un hòmber ku yama Bóaz.’ Noemí a bisa Rut: ‘Bóaz ta un famia di mi kasá. Sigui traha den su kunuku huntu ku e otro mucha muhénan. Bo ta safe einan.’

Rut a sigui traha den kunuku di Bóaz te ora ku kosecha di puspas a kaba. Bóaz a ripará ku Rut tabata traha duru i ku Rut tabata un ekselente hende muhé. Den e tempu ei, si un hende hòmber a muri sin ku e tabatin yu hòmber, un famia di e hòmber mester a kasa ku e hòmber su esposa. Pues, Bóaz a kasa ku Rut. Nan a haña un yu ku tabata yama Obèd. Obèd a bira welo di Rei David. E amigunan di Noemí a keda masha kontentu. Nan a bisa Noemí: ‘Promé, Yehova a duna bo Rut. Rut a trata bo masha bon mes. I awor, bo tin un ñetu. Alabá sea Yehova.’