Kuater Mucha Hòmber A Obedesé Yehova

Nabukodónosor a bai Babilonia ku vários israelita ku tabata di famia real i di famia prominente di Huda. El a bisa Áspenas, funshonario di palasio, pa kuida nan. Ademas, Nabukodónosor a bisa Áspenas pa skohe e hóbennan di mas salú i di mas sabí for di entre nan. E mucha hòmbernan akí mester a haña tres aña di entrenamentu. E entrenamentu mester a prepará nan pa hasi trabou importante na Babilonia. E hóbennan mester a siña lesa, skirbi i papia e idioma di Babilonia. Ademas, nan mester a kome e mesun kuminda ku e rei i e hendenan den e palasio tabata kome. Entre nan, tabatin Dánièl, Hananías, Mísaèl i Azarías. Áspenas a kambia nan nòmber pa un nòmber ku nan tabata usa na Babilonia: Bèltsasar, Sádrak, Mésak i Abed-Nego. E entrenamentu akí lo a stroba nan di sirbi Yehova?

E kuater hóbennan akí tabata determiná pa obedesé Yehova. Nan tabata sa ku nan no mester a kome kuminda di Rei, pasobra Lei di Yehova a prohibí algun di e kumindanan ei. P’esei, nan a bisa Áspenas: ‘Por fabor, no fòrsa nos kome e kumindanan di Rei.’ Áspenas a bisa nan: ‘Si boso no kome i e rei mira boso, lo e pensa ku boso ta malu i lo e mata mi!’

Dánièl tabatin un idea. El a bisa Áspenas: ‘Por fabor, pa dies dia largu duna nos solamente bèrdura pa kome i awa pa bebe. I despues, kompará nos ku e hóbennan ku a kome kuminda di Rei.’ E vigilante a haña esei un bon idea.

Despues di dies dia, Dánièl i su tres amigunan tabata mustra mas salú ku tur e otro mucha hòmbernan. Yehova a keda kontentu ku nan a obedes’é. El a asta duna Dánièl sabiduria pa komprondé diferente vishon i soño.

Ora e entrenamentu a kaba, Áspenas a hiba e hóbennan serka Nabukodónosor. Rei a papia ku nan, i el a mira ku Dánièl, Hananías, Mísaèl i Azarías tabata mas sabí ku tur e otro hóbennan. El a skohe e kuater hóbennan akí pa nan traha den su palasio. Hopi biaha, Rei tabata pidi nan konseho tokante asuntu importante. Yehova a hasi nan mas sabí ku tur e hendenan sabí ku Rei tabatin i mas sabí ku e hendenan ku tabata hasi magia.

Maske Dánièl, Hananías, Mísaèl i Azarías tabata na un otro pais, nan no a lubidá ku nan tabata parti di e pueblo di Yehova. Bo tambe lo kòrda semper riba Yehova, asta ora bo no ta huntu ku bo mayornan?