Ábraham i Sara A Obedesé Dios

No muchu leu for di Bábel, tabatin un stat ku tabata yama Ur. Hopi di e hendenan ku tabata biba na Ur no tabata adorá Yehova. Nan tabata adorá hopi otro dios. Na Ur, tabata biba un hòmber ku sí tabata adorá Yehova. E hòmber ei tabata yama Ábraham.

Yehova a bisa Ábraham: ‘Sali for di bo kas, i bai laga bo famianan. Bai e pais ku lo mi mustra bo.’ Dios a primintí Ábraham: ‘Bo famia lo bira un nashon grandi. Danki na bo, lo mi hasi kos bon pa hopi hende rònt mundu.’

Ábraham no tabata sa unda Yehova tabata ke pa e bai, pero el a konfia den Yehova. Ábraham su esposa Sara, Ábraham su tata Taré i Ábraham su subrinu Lòt a obedesé Yehova. Nan a kohe nan kosnan, i nan a kuminsá un biahe largu.

Ábraham tabatin 75 aña ora e i su famia a yega e pais kaminda Yehova tabata ke pa nan bai. E pais tabata yama Kánan. Na Kánan, Yehova a papia ku Ábraham, i Yehova a primintié: ‘Mi ta bai duna bo yunan henter e pais ku bo ta mira akí.’ Ábraham i Sara tabata bieu kaba, i nan no tabatin yu. Kon Yehova lo a kumpli ku su promesa?