Yehova Lo Hasi Bo Fuerte!

1. Di unda Yehova su sirbidónan fiel di pasado a haña forsa?

ORA Beibel papia di hende fiel, hopi biaha e ta bisa ku nan tabata fuerte i yen di kurashi. Pero asta esnan mas fuerte no tur ora a sinti nan fuerte. Por ehèmpel, tabatin biaha ku Rei David a sintié “mes fuerte ku un seru,” pero otro biahanan e tabata “morto spantá.” (Sal. 30:7) Anto aunke Sámsòn, ku yudansa di Yehova su spiritu santu, tabatin forsa ekstraordinario. E mes a rekonosé ku sin e poder di Dios lo e “bira suak, i lo [e] ta manera kualke otro hòmber.” (Hues. 14:​5, 6; 16:17) Pues, e hòmbernan fiel akí tabata fuerte, pasobra Yehova a duna nan forsa.

2. Dikon Pablo por a bisa ku ora e tabata débil, e tabata poderoso? (2 Korintionan 12:​9, 10)

² Pablo a rekonosé ku e tambe tabatin mester di Yehova su poder. (Lesa 2 Korintionan 12:​9, 10.) Meskos ku nos, Pablo tabatin problema di salú. (Gal. 4:​13, 14) I tin biaha tabata difísil p’e hasi loke ta korekto. (Rom. 7:​18, 19) Anto otro biaha e tabatin miedu i tabata teme pa su bida. (2 Kor. 1:​8, 9) Pero apesar di tur e kosnan ei, el a bisa ku ora e tabata débil, e tabata poderoso. Kon bin? Pasobra Yehova a duna Pablo poder, e forsa ku e tabatin mester pa por soportá su pruebanan.

3. Kiko nos ta bai trata den e artíkulo akí?

³ Yehova a primintí ku lo e hasi nos fuerte. (1 Ped. 5:10) Pero, nos no por ferwagt ku nos lo haña su yudansa si nos sinta man krusá. Dikon? Wèl, pensa riba esaki. Motor di un outo ta generá forsa pa asina e outo por bai dilanti. Pero si e shofùr no primi gasolin, e outo no ta bai niun kaminda. Di mes manera, Yehova ta kla pa duna nos poder i forsa pero nos tin ku hasi di nos parti tambe. Kiko Yehova a perkurá pa hasi nos fuerte? I kiko nos tin ku hasi pa haña e yudansa ei? Nos ta bai haña kontesta pa e preguntanan ei, ora nos mira kon Yehova a fortalesé Profeta Yónas, Maria i Apòstel Pablo. Ademas, nos ta bai mira kon te awe Yehova ta hasi meskos pa su sirbidónan.

ORASHON I ESTUDIO PERSONAL

4. Kiko nos tin ku hasi pa haña forsa serka Yehova?

⁴ Kiko nos tin ku hasi pa haña forsa serka Yehova? Un di e kosnan ta, orashon. Yehova ta kontestá nos orashon dor di duna nos “e poder ku ta surpasá esun di hende.” (2 Kor. 4:7) Un otro kos ku nos por hasi ta di lesa Beibel i meditá riba dje. (Sal. 86:11) Dikon? Pasobra Yehova su Palabra ta “poderoso.” (Heb. 4:12) Pues, ora nos hasi orashon i lesa Beibel, nos lo haña e forsa ku nos mester pa soportá prueba, pa keda ku nos goso òf pa kumpli ku un asignashon ku nos ta haña difísil. Awor, laga nos wak kon Yehova a duna Profeta Yónas forsa.

5. Dikon Profeta Yónas tabatin mester di kurashi?

⁵ Yehova a duna Profeta Yónas un asignashon. Pero e tabatin masha miedu. P’esei, el a hui subi un barku. Su akshonnan a hiba ku é i e otro hendenan riba e barku a hera di pèrdè nan bida den un mal tempu pisá. Ora ku e tripulantenan a bent’é den laman, un piská grandi a gulié. Yónas a hañ’é den barika di e piská: un lugá skur ku a dun’é masha miedu. Kiko bo ta kere lo a pasa den su mente? Por ta el a pensa: ‘Mi ta bai muri aki den sigur,’ òf ‘Yehova a bandoná mi.’ Sin duda Yónas a sinti un ansiedat enorme. E tabatin mester di forsa i kurashi.

6. Segun Yónas 2:​1, 2 i 7, kiko a duna Yónas forsa ora e tabata den barika di e piská?

⁶ Yónas tabata su so den barika di e piská. Kiko el a hasi pa haña forsa i kurashi? Wèl, pa kuminsá, el a hasi orashon. (Lesa Yónas 2:​1, 2, 7.) Aunke el a desobedesé Yehova, el a arepentí i tabatin sigur ku Yehova lo a skucha su orashon. Nos sa ku Yónas a pensa riba e skrituranan ku el a lesa. Dikon nos ta bisa esei? Wèl, pasobra den su orashon, ku nos por lesa na Yónas kapítulo 2, nos ta mira hopi di e mesun palabranan ku tin den Salmonan. (Por ehèmpel, kompará Yónas 2:​2, 5 ku Salmo 69:1; 86:7.) Ta bisto ku e skrituranan ei tabata spesial pa Yónas. I nan a sigur’é ku Yehova lo yud’é. Anto ta esei ta presis loke a pasa. Yehova a salb’é i despues e tabata kla pa kumpli ku kualke asignashon ku Yehova lo a dun’é.—Yón. 2:10–3:4.

7-8. Kiko un ruman na Taiwan a hasi pa haña forsa pa soportá su pruebanan?

⁷ E relato di Yónas por yuda nos ora nos ta pasando den prueba. Wak por ehèmpel Zhiming,b un ruman na Taiwan. E tin problema serio di salú. I riba dje, su famia ta trat’é malu pasobra e ta un sirbidó di Yehova. Kiko Zhiming a hasi pa haña forsa pa soportá tur e kosnan ei? Orashon i estudio. El a atmití: “Tin biaha ora problemanan presentá, gewon mi ta sinti ku mi no por konsentrá pa hasi mi estudio personal.” Pero Zhiming no ta entregá. El a bisa: “Di promé, mi ta hasi orashon. Kaba mi ta bisti mi earpiece anto mi ta skucha mi kantikanan di Reino. Tin biaha, mi ta asta kanta nan na bos abou te ora mi kalma. Despues di esei, mi ta hasi mi estudio personal.”

⁸ Loke Zhiming tabata studia durante su estudio personal a dun’é forsa i kurashi. Por ehèmpel, despues di un operashon grandi un zùster a bin bis’é ku e tin ku tuma sanger. Pero e anochi promé ku su operashon, el a lesa tokante un ruman ku a hasi e mesun operashon kuné. E ruman a pèrdè mas sanger kuné, pero e ruman no a tuma sanger i a rekuperá bon. E eksperensia ku Zhiming a lesa di e ruman a dun’é forsa pa keda fiel.

9. Kiko bo por hasi si un prueba ta laga bo sin forsa? (Wak e plachi.)

⁹ Bo a yega di sinti ku durante un prueba tin biaha bo ta asina anshá ku ta difísil pa bo hasi orashon? Òf ku bo no tin forsa pa studia? Kòrda ku Yehova ta komprondé presis loke bo ta pasando aden. P’esei, pa kon kòrtiku ku bo orashon por ta, bo por tin sigur ku e sa presis loke bo mester. (Efe. 3:20) Bo por asta usa grabashonnan di oudio di lesamentu di Beibel òf di nos publikashonnan si bo ta sinti ku ta difísil pa bo lesa i studia debí ku bo ta malu, kansá òf muchu agitá. Algu otro ku kisas por yuda bo ta di skucha un di nos kantikanan òf wak un vidio riba jw.org. Ora bo hasi orashon i buska kontesta pa bo orashonnan den Beibel i den otro kosnan ku Yehova ta perkurá, lo ta komo si fuera bo ta pidiendo Yehova pa hasi bo fuerte.

BO RUMANNAN

10. Den ki manera nos rumannan por yuda nos haña forsa?

¹⁰ Yehova por usa nos rumannan pa duna nos forsa. Nan por ta “un fuente di gran konsuelo” pa nos ora nos ta pasa den prueba òf ta lucha ku un asignashon ku nos ta haña difísil. (Kol. 4:​10, 11) Anto foral den “tempu difísil,” nos mester di bon amigu. (Pro. 17:17) Na momentonan ku nos ta sinti ku nos no tin forsa, nos rumannan por yuda nos den sentido físiko, emoshonal i spiritual. Laga nos wak awor kon Maria, mama di Hesus, a haña forsa di otro persona.

11. Dikon Maria tabatin mester di forsa?

¹¹ Imaginá kon aribabou Maria a bira ora Gabriel a bis’é ku lo e sali na estado sin ta kasá. E no tabatin niun eksperensia komo mama, pero lo el a kria e mucha ku lo a bira e Mesías. Kon lo e bai kuminsá splika Hose, kende e tabata bai kasa kuné, ku e ta na estado sin ku el a tene relashon ku niun hòmber? Pues Maria tabatin mester di forsa pa kumpli ku e asignashon ku el a haña di Yehova.—Luk. 1:​26-33.

12. Segun Lukas 1:​39-45, kon Maria a haña e forsa ku e tabatin mester?

¹² Maria su asignashon no tabata fásil i tabata fuera di normal. Unda lo el a haña e forsa pa kumpli kuné? El a buska yudansa. Por ehèmpel, el a pidi Gabriel pa dun’é mas informashon tokante e asignashon ku el a haña. (Luk. 1:34) Poko despues, el a biaha bai te na “e region di seru” di Huda pa bishitá Elisabèt, un famia di dje. I tabata bon ku el a hasi e biahe ei. Elisabèt a elogiá Maria, i Yehova a inspir’é pa duna un profesia tokante e yu ku Maria tabatin den su barika. (Lesa Lukas 1:​39-45.) Kon Maria a sinti ora el a skucha esei? El a bisa ku Yehova “a hasi obranan poderoso ku Su brasa.” (Luk. 1:​46-51) Yehova a usa Gabriel i Elisabèt pa duna Maria forsa.

13. Kiko a pasa ora ku Dasuri a pidi yudansa?

¹³ Meskos ku Maria, nos rumannan tambe por duna nos forsa. Dasuri, un ruman na Bolivia, a haña sa ku su tata tabatin un malesa terminal i mester a keda hospital. El a tuma riba su mes e responsabilidat pa kuida su tata. (1 Tim. 5:4) Esei no tabata niun tiki fásil. Dasuri tabata mester di forsa. El a atmití: “Hopi biaha m’a sinti ku mi no tabata por mas.” Na promé instante e no a pidi yudansa. Dikon? El a bisa: “Mi no kier a kansa e rumannan. Mi tabata pensa: ‘Ta Yehova ta bai yuda mi.’ Pero m’a realisá ku ora mi isolá mi mes, ta mi mes ku mi mes ta purba di resolvé mi problemanan.” (Pro. 18:1) Dasuri a disidí di skirbi un par di ruman ku e ta será kuné i splika nan su situashon. El a bisa: “Mi no por kaba di splika kon mi rumannan a fortalesé mi. Nan tabata trese kuminda hospital i a animá mi ku teksto. Ta dushi pa sa i mira ku nos no ta nos so. Nos ta parti di Yehova su famia grandi; un famia ku ta kla pa yuda bo, yora ku bo i animá bo pa sigui sirbi Yehova huntu ku nan.”

14. Dikon nos tin ku aseptá yudansa for di ansianonan?

¹⁴ Yehova ta usa ansianonan tambe pa duna nos forsa. Nan ta regalo ku e ta usa pa fortalesé i refreská nos. (Isa. 32:​1, 2) Pues, ora ku algu ta preokupá bo, papia ku e ansianonan. Hasi bo esfuerso pa aseptá i apliká e yudansa ku nan ta duna bo. Kòrda ku Yehova ta usa nan pa hasi bo fuerte.

BO SPERANSA PA FUTURO

15. Ki speransa tur kristian tin?

¹⁵ E speransa ku nos ta haña den Beibel por duna nos hopi forsa. (Rom. 4:​3, 18-20) Algun kristian tin speransa pa biba pa semper den shelu, miéntras ku algun otro tin speransa pa biba pa semper den Paradeis aki riba tera. Nos speransa ta duna nos forsa pa wanta prueba, prediká i kumpli ku diferente asignashon den kongregashon. (1 Tes. 1:3) E mesun speransa ei a duna Apòstel Pablo forsa.

16. Dikon Pablo tabatin mester di forsa?

¹⁶ Den Pablo su karta ku el a skirbi pa e korintionan, el a bisa ku e tabata frágil manera un pòchi di klei. Tin biaha, e no tabata “sa sigur kiko pa hasi. El a konta ku a preshon’é, persiguié i tumb’é.” I tin biaha asta su bida tabata na peliger. (2 Kor. 4:​8-10) Pablo a skirbi tur e kosnan ei durante su di tres biahe komo misionero, pero e no tabata sa ku lo el a enfrentá mas kos ainda. Un multitut di hende lo a atak’é, lo el a ser arestá, barku lo a senk kuné i lo a bent’é den prizòn. Pues ta bisto ku Pablo tabatin mester di forsa.

17. Segun 2 Korintionan 4:​16-18, kiko a duna Pablo forsa pa soportá su pruebanan?

¹⁷ Pablo su speransa a dun’é forsa pa soportá su pruebanan. (Lesa 2 Korintionan 4:​16-18.) El a bisa e rumannan na Korinto ku maske su kurpa tabata “kaba na nada,” lo e no laga esei desanim’é. Pablo a focus riba su futuro. E speransa ku e tabatin di biba pa semper den shelu tabata “bira mas i mas grandi.” Ku otro palabra, Pablo su speransa tabata asina spesial p’e, ku e tabata dispuesto pa soportá kualke difikultat pa asina haña su rekompensa. Debí ku Pablo tabata meditá riba su speransa, esei a lag’é sintié “renobá . . . dia tras dia.”

18. Kon e speransa di Tihomir i su famia a duna nan forsa?

¹⁸ Ruman Tihomir, di Bulgaria, ta haña forsa ora e pensa riba su speransa. Un par di aña pasá, su ruman hòmber Sdravko a muri den un aksidente. Pa un tempu Tihomir a keda hopi kibrá. Pa trata ku e tristesa ei, e ku su famia a imaginá kon e resurekshon di Sdravko lo ta. Tihomir a splika: “Por ehèmpel, nos tabata papia tokante unda nos lo top’é, kiko nos lo kushiná p’e, ken nos lo invitá na e promé fiesta despues di su resurekshon i ki nos lo kont’é tokante e último dianan.” Tihomir a bisa ku ora e ku su famia ta focus riba nan speransa, esei ta duna nan e forsa ku nan tin mester pa sigui soportá i sigui warda te ora Yehova resusitá su ruman.

19. Kiko bo por hasi pa fortalesé bo fe? (Wak e plachi.)

¹⁹ Kiko bo por hasi pa fortalesé bo speransa? Wèl, si bo speransa ta pa biba pa semper aki riba tera, e ora ei lesa loke Beibel ta bisa tokante Paradeis i meditá riba dje. (Isa. 25:8; 32:​16-18) Sera bo wowo i imaginá bo mes den e mundu nobo. Ken otro bo ta mira? Ki bo ta tende? Kon bo ta sinti bo? Pa yuda bo imaginá tur esei, wak e plachinan di Paradeis den nos publikashonnan òf wak vidio di e kantikanan Nos Dushi Paradeis, Djis Tras di Porta òf Imaginá Kon Mundu Nobo Lo Ta. Si regularmente nos tuma tempu pa pensa riba nos speransa, nos lo sinti ku nos problemanan “ta leve i pa un tempu kòrtiku.” (2 Kor. 4:17) Sí, e speransa ku Yehova ta duna nos lo hasi nos fuerte.

20. Asta ora nos ta débil, kon nos por haña forsa?

²⁰ Asta ora nos ta sinti nos débil, “Dios lo duna nos forsa.” (Sal. 108:13) Yehova ya kaba a perkurá tur loke nos mester pa nos ta fuerte. Pues, ora bo tin mester di yudansa pa kumpli ku un asignashon, pa soportá prueba òf pa keda ku bo goso, hasi orashon i hasi estudio personal pa buska Yehova su guia. Ademas, aseptá yudansa for di bo rumannan i mantené bo speransa pa futuro bibu den bo mente. E ora ei, Yehova ‘su poder glorioso lo duna bo tur e forsa ku bo mester pa bo por soportá tur kos ku pasenshi i goso.’—Kol. 1:11.