E Papel Dignifica di Hende Muher Entre E Prome Sirbidornan di Dios
“Jehova Dios a pasa na bisa: ‘No ta bon p’e homber sigui su so. Mi ta bai traha un yudante p’e, como un complemento di dje.’ ”
1. Con un diccionario di Bijbel ta describí e posicion di hende muher den tempu antiguo?
“NINGUN caminda den e paisnan mediteráneo of e paisnan di Zuidwest Asia di antigwedad hende muher a ser concedé e libertad cu nan ta disfrutá di dje den e sociedad occidental moderno. E patronchi general tabata unu di subordinacion di hende muher na hende homber, mescos cu esclabonan tabata subordiná na hende liber, i hóbennan na hende di mas edad. . . . Yu homber a ser considerá di mas tantu balor cu yu muher, i mucha muher baby tin biaha a ser lagá pa muri sin proteccion den mal tempu.” Asina un diccionario bíblico ta describí e condicion di bida di hende muher den tempu antiguo.
2, 3. (a) Segun un informe, con e situacion ta pa hopi hende muher awe? (b) Ki preguntanan ta lanta?
2 E situacion no ta muchu mas mihó den hopi parti dje mundu awe. Na 1994, pa promé biaha, e informe anual riba derecho humano di Departamento di Estado Mericano a enfocá riba e trato duná na hende muher. “Datonan di 193 Pais Ta Mustra cu Discriminacion Diario Ta un Realidad,” asina un titular di New York Times a declará relacioná cu e informe.
3 Siendo cu un gran cantidad di hende muher cu vários antecedente cultural ta asociá cu e congregacionnan di Jehova su pueblo rond mundu, algun pregunta ta lanta: E trato cu a caba di ser describí ta e clase cu Dios originalmente a intencioná pa hende muher? Con hende muher a ser tratá entre adoradornan di Jehova den tempu bíblico? I con hende muher mester ser tratá awe?
“Un Yudante” i “un Complemento”
4. Kico Jehova a comentá despues cu e promé homber tabata den e hofi di Eden su so pa algun tempu, i kico Dios a haci e ora ei?
4 Despues cu Adam tabata den e hofi di Eden su so pa algun tempu, Jehova a comentá: “No ta bon p’e homber sigui su so. Mi ta bai traha un yudante p’e, como un complemento di dje.” (Génesis 2:18) Maske Adam tabata un homber perfecto, algu mas tabata necesario afin di cumpli cu e propósito dje Creador. Pa yena e necesidad, Jehova a crea e muher i a efectuá e promé matrimonio.—Génesis 2:21-24.
5. (a) Con e sustantivo hebreo traducí como “yudante” hopi biaha ta ser usá dor di e escritornan di Bijbel? (b) E echo cu Jehova a referí n’e promé muher como “un complemento” ta indicá kico?
5 E palabranan “yudante” i “complemento” ta indicá cu e papel cu Dios a asigná na e hende muher tabata humiyante? Al contrario. Escritornan di Bijbel hopi biaha ta aplicá na Dios e sustantivo hebreo (ʽeʹzer) traducí como “yudante.” Por ehempel, Jehova ta resultá di ta “nos yudante i nos escudo.” (Salmo 33:20; Exodo 18:4; Deuteronomio 33:7) Na Oséas 13:9, Jehova asta ta referí na su mes como “yudante” di Israel. Pa loke ta e palabra hebreo (neʹghedh) traducí como “complemento,” un escolástico bíblico ta splica: “E yudansa cu ta ser buscá no ta djis un asistencia den su trabou diario of den e procreacion di yunan . . . sino e apoyo mutuo cu compañerismo ta proveé.”
6. Kico a ser bisá despues dje creacion dje hende muher, i pakico?
6 Pues no tin nada humiyante den e echo cu Jehova a describí e hende muher como “un yudante” i “un complemento.” E hende muher tabatin su propio composicion mental, emocional i físico distintivo. E tabata un compañera apropiado, un complemento satisfaciente p’e homber. Cada un tabata diferente, tog cada un tabata necesario pa “yena e tera” na armonia cu e propósito dje Creador. Tabata evidentemente despues dje creacion di tantu e homber como e muher cu “Dios a mira tur loke el a traha i, mira! e tabata masha bon.”—Génesis 1:28, 31.
7, 8. (a) Ora e promé pareha a peca den Eden, con e papel dje hende muher a ser afectá? (b) Ki preguntanan ta surgi relacioná cu e cumplimentu di Génesis 3:16 entre e adoradornan di Jehova?
7 Despues cu nan a peca, cosnan a cambia pa tantu e homber como e muher. Jehova a dicta sentencia pa tur dos como pecador. “Lo mi aumentá den un gran manera e dolor di bo embaraso,” Jehova a bisa Eva, papiando di loke e ta permití sosodé cu tempu como si fuera é a ocasion’é. El a agregá: “Cu dolor di parto lo bo duna lus na yunan homber, i bo deseo intenso lo ta pa bo esposo, i lo e dominá bo.” (Génesis 3:16) Desde e tempu ei, hopi esposa a ser dominá, hopi biaha severamente, dor di nan esposonan. En bes di ser balorá como yudante i complemento, frecuentemente nan a ser tratá mas manera criá of catibu.
8 Pero kico e cumplimentu di Génesis 3:16 a nificá pa adoradornan femenino di Jehova? Nan a ser degradá na un posicion di inferioridad i humiyacion? Siguramente cu no! Pero kico di relatonan bíblico cu ta papia di custumber i prácticanan cu ta afectá hende muher cu por parce inaceptabel den cierto sociedadnan awe?
Comprendiendo Custumbernan Bíblico
9. Ora di considerá custumbernan cu a enbolbé hende muher den tempu bíblico, cua tres cos nos mester tene na mente?
9 Hende muher a ricibí bon trato entre e sirbidornan di Dios den tempu bíblico. Naturalmente, ora di considerá e custumbernan cu a enbolbé hende muher den e dianan ei, ta probechoso pa tene vários factor na mente. Di promé, ora Bijbel ta papia di situacionnan desagradabel cu a desaroyá pa motibu di dominacion egoista dor di hombernan malbado, esei no kier men cu Dios a aprobá tal trato di hende muher. Di dos, aunke Jehova a tolerá cierto custumbernan entre su sirbidornan pa un tempu, el a regulá esakinan afin di protehá hende muher. Di tres, nos mester tene cuidou pa no husga custumbernan antiguo segun normanan moderno. Cierto custumbernan cu por parce desagradabel pa hende bibando awe no necesariamente a ser mirá como humiyante dor di hende muher e tempu ei. Laga nos considerá algun ehempel.
10. Con Jehova a mira e práctica di poligamia, i kico ta indicá cu e nunca a bandoná su norma original di monogamia?
10 Poligamia:a Segun e propósito original di Jehova, un esposa lo no compartí su esposo cu un otro hende muher. Dios a crea solamente un esposa pa Adam. (Génesis 2:21, 22) Despues dje rebelion den Eden, e práctica di poligamia a aparecé pa promé bes den e liña di Cain. Cu tempu el a bira un custumber i a ser adoptá dor di algun adorador di Jehova. (Génesis 4:19; 16:1-3; 29:21-28) Aunke Jehova a permití poligamia i esei a sirbi pa aumentá e poblacion di Israel, el a mustra consideracion pa hende muher dor di regulá e práctica di manera cu esposanan i nan yunan lo a ser protehá. (Exodo 21:10, 11; Deuteronomio 21:15-17) Ademas, Jehova nunca a bandoná su norma original di monogamia. Noe i su yu hombernan, na kende e mandamentu a ser ripití pa ‘ser fructífero i yena e tera,’ tur tabata monógamo [casá cu un solo muher]. (Génesis 7:7; 9:1; 2 Pedro 2:5) Dios a describí su mes como un esposo monógamo ora el a simbolisá su relacion cu Israel. (Isaías 54:1, 5) Despues, tambe, e norma original di Dios di monogamia a ser reestablecé dor di Jesucristo i a ser practicá den e congregacion cristian di promé.—Mateo 19:4-8; 1 Timoteo 3:2, 12.
11. Pakico un bruidsschat a ser pagá den tempu bíblico, i esaki tabata un humiyacion pa hende muher?
11 Pagamentu di un ‘bruidsschat’: E buki Ancient Israel—Its Life and Institutions ta declará: “E obligacion aki pa paga un suma di placa, of su ekivalente, n’e famia dje mucha muher obviamente ta duna e matrimonio israelita e aparencia externo di un compra. Pero e [bruidsschat] aparentemente no ta asina tantu e prijs pagá pa e hende muher sino mas bien un compensacion duná n’e famia.” (Letter cursivo ta di nos.) Pues e pago di un bruidsschat a sirbi pa compensá e muher su famia p’e pérdida di su servicionan i pa e esfuerso i gastu rekerí di su famia pa cuid’é. En bes di humiyá e muher, anto, el a afirmá su balor pa su famia.—Génesis 34:11, 12; Exodo 22:16; mira E Toren di Vigilancia [na ingles] di 15 di januari, 1989, página 21-4.
12. (a) Con e Scritura tin biaha a referí na homber i muher casá, i e expresionnan aki tabata ofensivo pa hende muher? (b) Kico ta notabel tocante e términonan cu Jehova a usa den Eden? (Mira nota.)
12 Esposo como “doño”: Un incidente den e bida di Abraham i Sara rond di 1918 P.E.C. ta indicá cu pa den nan tempu evidentemente a bira un custumber pa mira un homber casá como e “doño” (hebreo, baʹʽal) i un muher casá como ‘esun poseé’ (hebreo, beʽu·lahʹ). (Génesis 20:3) E expresionnan aki despues di esei ta ser usá algun biaha den e Scritura, i no tin ningun indicacion cu hende muher pre-cristian a haña nan ofensivo.b (Deuteronomio 22:22) Sin embargo, esposanan no mester a ser tratá como propiedad. Propiedad of rikesa por a ser cumprá, bendí i asta heredá, pero esaki no tabata e caso cu un esposa. “E herencia for di mayornan ta un cas i rikesa,” un proverbio bíblico ta bisa, “pero un esposa discreto ta for di Jehova.”—Proverbionan 19:14; Deuteronomio 21:14.
Un Papel Dignificá
13. Ora hombernan temeroso di Dios a sigui Jehova su ehempel i a obedecé su Ley, kico tabata e resultado pa hende muher?
13 Kico, anto, tabata e papel di hende muher entre e sirbidornan di Dios den tempu pre-cristian? Con nan a ser mirá i tratá? Senciyamente bisá, ora hende homber temeroso di Dios a sigui Jehova su propio ehempel i a obedecé su Ley, hende muher a retené nan dignidad i a disfrutá di hopi derecho i privilegio.
14, 15. Ki indicacionnan tin cu hende muher a ser respetá den Israel, i pakico Jehova por a spera cu bon motibu pa su adoradornan masculino respetá nan?
14 Hende muher mester a ser respetá. E Ley di Dios den Israel a manda pa tantu tatanan como mamanan ser respetá. (Exodo 20:12; 21:15, 17) “Cada un di boso mester teme su mama i su tata,” Levítico 19:3 ta bisa. Ora Batseba a acercá su yu Sálomon na un ocasion, “mesora e rey a lanta pa topa cuné i a buig dilanti dje” como un gesto di respet. (1 Reynan 2:19) Encyclopaedia Judaica ta comentá: “E comparacionnan profético dje amor di Dios pa Israel cu e amor di un esposo pa su esposa por a ser hací solamente den un sociedad den cua hende muher a ser respetá.”
15 Jehova ta spera pa su adoradornan masculino respetá hende muher, pasobra e ta respetá nan. Indicacionnan di esaki ta ser hañá den textonan den cua Jehova ta usa e experencianan di hende muher na moda di ilustracion i ta compará su mes sintimentunan cu esnan di hende muher. (Isaías 42:14; 49:15; 66:13) Esaki ta yuda lectornan comprendé con Jehova ta sinti. Interesantemente, e término hebreo pa “misericordia,” of “piedad,” cu Jehova ta aplicá na su mes, ta estrechamente relacioná cu e palabra pa “matris” i por ser describí como “sintimentu di un mama.”—Exodo 33:19; Isaías 54:7.
16. Ki ehempelnan ta mustra cu e conseho di hende muher piadoso a ser considerá di gran balor?
16 E conseho di hende muher piadoso a ser considerá di gran balor. Ora Abraham temeroso di Dios a vacilá pa haci caso dje conseho di su esposa piadoso, Sara, na un ocasion, Jehova a bis’é: “Scucha su bos.” (Génesis 21:10-12) E esposanan hitita di Esau “tabata un fuente di amargura di spiritu pa Isaac i Rebeca.” Cu tempu, Rebeca a expresá e angustia cu lo el a experenciá si nan yu Jacob mester a casa cu un hitita. Kico tabata Isaac su reaccion? “Consecuentemente,” e relato ta bisa, “Isaac a yama Jacob i a bendicion’é i a mand’é i a bis’é: ‘Bo no mag tuma un esposa for dje yu muhernan di Canaan.’ ” Sí, maske Rebeca no a ofrecé conseho directo, su esposo a tuma un decision cu a tuma su sintimentunan na consideracion. (Génesis 26:34, 35; 27:46; 28:1) Rey David despues a evitá culpa di sanger pa motibu cu el a scucha n’e súplica di Abigail.—1 Samuel 25:32-35.
17. Kico ta mustra cu hende muher tabatin un midí di autoridad den e famia?
17 Hende muher tabatin un midí di autoridad den e famia. Yunan a ser instá: “Scucha, mi yu, n’e disiplina di bo tata, i no bandoná e ley di bo mama.” (Proverbionan 1:8) E descripcion dje “esposa capas” den Proverbionan capítulo 31 ta revelá cu un muher casá diligente no solamente a manehá un famia sino tambe por a atendé transaccionnan di benta i compra di edificio i tereno, establecé un tereno productivo, manehá un negoshi chikitu i ser conocí pa su palabranan di sabiduria. Mas importante cu tur tabata e muher su temor reverencial di Jehova cu tabata digno di alabansa. Nada straño cu e balor di un esposa asina tabata “muchu mas cu esun di coralnan”! Coral corá precioso tabatin un balor haltísimo como hoya i obheto di adorno.—Proverbionan 31:10-31.
Hende Muher Cu A Ricibí Fabor Special di Dios
18. Den ki maneranan fabor special a ser otorgá na cierto hende muher den tempu bíblico?
18 Jehova su afecto pa hende muher a ser reflehá den e fabor special cu el a otorgá algun di nan den tempu bíblico. Agar, Sara i e esposa di Manoa a ser bishitá dor di angelnan cu a comunicá guia divino na nan. (Génesis 16:7-12; 18:9-15; Huesnan 13:2-5) Tabatin “criánan femenino” n’e tabernáculo i cantantenan femenino den e palacio di Sálomon.—Exodo 38:8; 1 Samuel 2:22; Eclesiástes 2:8.
19. Den ki manera Jehova a yega di usa hende muher pa represent’é?
19 Vários biaha den historia di Israel, Jehova a usa un hende muher pa represent’é of pa papia p’e. Relacioná cu e profetisa Débora, nos ta lesa: “E yunan di Israel a subi cerca dje pa huicio.” (Huesnan 4:5) Despues dje derota di Israel dje rey cananeo Jabin, Débora tabatin un privilegio berdaderamente special. E tabata evidentemente e compositor, por lo ménos parcialmente, dje cantica di victoria cu, cu tempu, a bira parti di Jehova su registro inspirá.c (Huesnan, capítulo 5) Siglonan despues, pa haña informacion di Jehova, Rey Hosías a manda p’e profetisa Hulda un delegacion cu a incluí e sumo sacerdote. Hulda por a contestá cu autoridad: “Esaki ta loke Jehova e Dios di Israel a bisa.” (2 Reynan 22:11-15) N’e ocasion ei e rey a manda e delegacion bai cerca un profetisa, pero esaki a ser hací pa ricibí guia for di Jehova.—Compará cu Malakías 2:7.
20. Ki ehempelnan ta indicá Jehova su interes p’e sintimentunan i bienestar di hende muher?
20 Jehova su interes p’e bienestar di hende muher ta bisto for dje ehempelnan den cua el a actua na fabor di algun di su adoradornan femenino. Dos biaha el a intervení pa protehá Abraham su bunita esposa, Sara, for di violacion. (Génesis 12:14-20; 20:1-7) Dios a mustra fabor na Jacob su esposa ménos stimá, Lea, ‘habriendo su matris’ di manera cu e por a duna lus na un yu homber. (Génesis 29:31, 32) Ora dos partera israelita temeroso di Dios a risca nan bida pa conserbá yunan masculino hebreo for di matamentu di mucha na Egipto, Jehova apreciativamente “a concedé famia na nan.” (Exodo 1:17, 20, 21) Tambe el a contestá e oracion ferviente di Ana. (1 Samuel 1:10, 20) I ora e biuda di un profeta a enfrentá un persona cu e tabata debe i cu tabata cla pa tuma su yunan pa paga su debe, Jehova no a bandon’é. Amorosamente, Dios a capacitá profeta Eliseo p’e multiplicá su suministro di zeta di manera cu e por a paga e debe. Asina el a conserbá su famia i su dignidad.—Exodo 22:22, 23; 2 Reynan 4:1-7.
21. E Scritura Hebreo ta presentá ki descripcion balansá dje posicion di hende muher?
21 P’esei, leu for di animá menosprecio pa hende muher, e Scritura Hebreo ta presentá un descripcion balansá di nan posicion entre e sirbidornan di Dios. Aunke Jehova no a protehá su adoradornan femenino for dje cumplimentu di Génesis 3:16, hende muher a ser tratá cu dignidad i respet dor di hombernan piadoso cu a sigui Jehova su ehempel i a presta atencion na su Ley.
22. P’e tempu cu Jesus tabata riba tera, con e papel di hende muher a cambia, i ki preguntanan ta ser hací?
22 Den e siglonan cu a sigui despues cu e Scritura Hebreo a ser completá, e papel di hende muher a cambia entre e hudiunan. P’e tempu cu Jesus a presentá riba tera, tradicionnan rabínico a restringuí hende muher masha tantu den nan privilegionan religioso i nan bida social. E tradicionnan ei a influenciá e manera cu Jesus a trata cu hende muher? Con muhernan cristian mester ser tratá awe? E preguntanan aki lo ser considerá den e siguiente artículo.
[Notanan]
a Segun Webster’s Ninth New Collegiate Dictionary, “poligamia” ta referí na un “matrimonio den cua sea e esposo of esposa por tin mas cu un casá n’e mésun tempu.” E expresion mas specífico “poliginia” ta ser definí como “e estado of custumber di tin mas cu un esposa of partner femenino na un solo tempu.”
b E Scritura Hebreo ta referí hopi mas tantu biaha na homber i muher casá como “esposo” (hebreo, ʼish) i “esposa” (hebreo, ʼish·shahʹ). Den Eden, por ehempel, e expresionnan cu Jehova a usa no tabata “doño” i ‘esun poseé,’ sino “esposo” i “esposa.” (Génesis 2:24; 3:16, 17) E profecia di Oséas a pronosticá cu despues di Israel su regreso for di exilio, cu repentimentu lo e yama Jehova “Mi esposo,” i no “Mi doño” mas. Esaki por sugerí cu e expresion “esposo” tabatin un implicacion mas tierno cu “doño.”—Oséas 2:16.
c Notabel ta e uso dje forma di promé persona (“ami”) cu referencia na Débora na Huesnan 5:7.
Con Lo Bo Contestá?
◻ Kico e palabranan “yudante” i “complemento” ta indicá tocante e papel cu Dios a asigná na hende muher?
◻ Ora nos ta considerá custumbernan cu a afectá hende muher den tempu bíblico, kico nos mester tene na mente?
◻ Kico ta mustra cu hende muher tabatin un papel dignificá entre e sirbidornan di Dios di tempu antiguo?
◻ Den ki maneranan Jehova a otorgá fabor special na hende muher den tempunan pre-cristian?