E Punto di Bista Bíblico

Ta Malu pa Come Carni?

“ATA AKI MI A DUNA BOSO TUR VEGETACION CU TA DUNA SIMIA CU TA RIBA E SUPERFICIE DI HENTER E TERA I TUR PALU DEN CUA TIN FRUTA DI PALU CU TA DUNA SIMIA. LAGU’E SIRBI COMO CUMINDA PA BOSO.”—Génesis 1:29.

SUJATA di diesocho aña, cu ta bini di un famia hindú vegetariano, a bai di acuerdo unbes cu Dios su instruccion dietético n’e promé homber, Adam. Pero di biaha el a puntra: “Pakico anto, hende ta mata animal pa cuminda ora cu tin asina tantu otro cos pa come?”

Hopi hende rond mundu tin e mésun sintimentu aki. Cientos di miyones di hende den Oriente ta sigui un dieta sin carni. Ademas, e cantidad di vegetariano den Occidente ta aumentando. Na Merca so, rond di 12,4 miyon hende ta bisa cu nan ta vegetariano, rond di 3 miyon mas cu un década pasá.

Pakico asina tantu hende ta preferá un dieta sin carni? Cua ta e punto di bista corecto tocante bida animal? Comementu di carni ta un falta di respet pa bida? En bista di loke ta pará na Génesis 1:29, ta malu pa come carni? Promé, considerá pakico algun hende no ta come carni.

Pakico Algun Hende No Ta Come Carni?

Pa Sujata, su dieta ta enbolbé su creencianan religioso. “Mi a ser criá como hindú, i ta kere den e doctrina di reencarnacion,” e ta splica. “Siendo cu un alma humano por bini bek como animal, mi ta considerá animal igual cu mi. I p’esei ta malu pa mata nan pa come.” Otro religionnan tambe ta boga pa un dieta vegetariano.

Tin otro factornan ademas di creencianan religioso cu tambe ta influenciá loke hende ta scoge pa come. Dr. Neal Barnard, por ehempel, ta afirmá categóricamente: “E único motibunan pa come carni ta custumber of ignorancia.” Su opinion fuerte ta basá riba su ideanan tocante e rísiconan cu consumo di carni ta trece pa salú, manera malesa di curason i cancer.a

Na Merca, ta ser bisá cu tienernan ta e grupo di vegetarianonan cu ta creciendo mas lihé. I preocupacion pa animalnan ta un motibu. “Mucha ta stima animal,” segun Tracy Reiman di Hende Pro e Trato Etico di Animal. “Ora nan cuminsá siña kico ta pasa cu animalnan promé cu mata nan pa come, esei ta solamente reforsá nan sintimentu di compasion.”

Hopi hende cu ta conciente di medio ambiente ta haci tambe e coneccion entre nan dieta i e tremendo demanda cu esaki ta pone riba e recursonan natural pa cria animal pa cuminda. Por ehempel, mester di rond di 3.300 liter di awa pa producí djis un kilo di carni di baca i 3.100 liter di awa pa un kilo di galiña. Pa algun hende, esaki ta bira e ora ei un motibu pa evitá carni.

Kico di abo? Bo mester abstené di carni? Promé cu contestá e pregunta ei, considerá un otro punto di bista. Manera nos por lesa na Salmo 50:10, 11, Jehova Dios, e Creador di tur cos, ta bisa: “Na mi tur animal salbahe di mondi ta pertenecé, e bestianan riba mil ceru. Mi conocé bon tur criatura cu hala dje cerunan, i e trupanan di animal dje campo habrí ta cu mi.” Ya cu en realidad tur animal ta pertenecé na Dios, ta importante pa comprendé con e Creador ta pensa tocante bida animal i e uso cu hende ta haci di dje pa cuminda.

Ta Malu pa Mata Animal?

Algun hende cu, mescos cu Sujata, ta considerá animal na mésun nivel cu hende ta haña cu ta malu pa kita bida di un animal pa cualkier motibu—pió ainda pa mata nan pa come. No obstante, e Scritura ta indicá cu Dios ta haci un distincion entre bida animal i bida humano i ta permití e matamentu di animal pa diferente motibu. Den Israel un hende por a mata un animal, por ehempel, si e tabata forma un peliger pa bida humano of pa su tou di bestia.—Exodo 21:28, 29; 1 Samuel 17:34-36.

For di tempunan mas antiguo, Dios a aprobá e ofrenda di animalnan como sacrificio den adoracion. (Génesis 4:2-5; 8:20, 21) Tambe el a instruí e israelitanan pa conmemorá nan Exodo for di Egipto dor di celebrá e Pascu hudiu tur aña, locual a encerá sacrificá un lamchi of un cabritu i come su carni. (Exodo 12:3-9) I bou dje Ley di Moises, tabatin otro ocasionnan pa ofrendanan di animal.

Ora un señora hindú di 70 aña a lesa Bijbel pa promé biaha, el a haña e idea di sacrificionan di animal desagradabel. Pero segun cu el a progresá den su conocimentu dje Scritura, e por a mira cu sacrificionan cu Dios a manda pa haci tabatin un propósito. Nan a señalá padilanti n’e sacrificio di Jesucristo, cu mester a cumpli cu e rekisito legal di pordon di picánan. (Hebreonan 8:3-5; 10:1-10; 1 Juan 2:1, 2) Den hopi caso e ofrendanan a sirbi tambe como cuminda pa e sacerdotenan i tin biaha pa e adoradónan. (Levítico 7:11-21; 19:5-8) Dios, na ken tur criatura bibiente ta pertenecé, tabatin tur derecho di instituí un areglo asina pa un propósito. Naturalmente, una bes cu Jesus a muri, e sacrificionan di animal ya no tabata necesario mas den adoracion.—Colosensenan 2:13-17; Hebreonan 10:1-12.

Animal Como Cuminda

Pero, kico di mata animal pa come? Ta cierto cu e dieta original di hende tabata vegetariano. Pero mas despues Jehova a expand’é cu carni di animal. Un 4.000 aña pasá—den e dianan dje hustu Noe—Jehova a manda un diluvio mundial i a caba cu e maldad cu tabata existí den e tempu ei riba tera. Noe, su famia i e criaturanan bibiente cu el a hiba den e arca a sobrebibí e Diluvio. Despues cu nan a sali for dje arca, Jehova a declará pa promé biaha: “Tur animal moviente cu ta bibu por sirbi pa boso como cuminda. Como den e caso di vegetacion berde, ami en berdad ta duna boso tur esei.” (Génesis 9:3) Sin embargo, na mes momento Dios a duna e ley: “Ken cu ta drama sanger di hende, pa hende, su propio sanger lo ser dramá, pasobra Dios a traha hende den su imágen.” (Génesis 9:6) Ta obvio cu Dios no a pone animal riba e mésun nivel cu hende.

Eigenlijk, Sujata su conviccion tocante animalnan tabata basá riba su creencia den e doctrina di reencarnacion. Relacioná cu esaki, Bijbel ta splica cu maske cu hende i animal ta alma, e alma no ta inmortal. (Génesis 2:7; Ezekiel 18:4, 20; Echonan 3:23; Revelacion 16:3) Como alma, tantu hende como bestia ta muri i ta stop di existí. (Eclesiástes 3:19, 20) Pero hende tin un speransa maraviyoso di haña un resureccion den e mundu nobo di Dios.b (Lucas 23:43; Echonan 24:15) Esaki tambe ta indicá cu animal no ta igual cu hende.

“Pero tog, pakico a cambia e dieta?” Sujata a puntra. Evidentemente e clima dje tera a cambia drásticamente pa motibu dje Diluvio. Si Jehova a agregá carni na hende su dieta debí cu el a anticipá e necesidadnan di futuro generacionnan bibando den áreanan caminda vegetacion lo ta scars, Bijbel no ta bisa. Pero Sujata por a aceptá cu e Doño di tur cos bibiente tabatin e derecho di introducí un cambio.

Mustrando Respet pa Bida Animal

Sin embargo, Sujata a puntra su mes: ‘Nos no mester tin por lo ménos un poco respet pa bida animal?’ Sí, nos mester. I e Creador di tur cos a bisa nos con nos por haci esaki. “Solamente carni cu su alma—su sanger—boso no mag come,” su decreto ta declará na Génesis 9:4. Pakico e restriccion pa come sanger? “Pasobra e alma [bida] dje carni ta den e sanger,” Bijbel ta bisa. (Levítico 17:10, 11) Jehova a stipulá: ‘Bo mester basha e sanger dje animal matá riba e suela mescos cu awa.’—Deuteronomio 12:16, 24.

Esaki no kier men cu e percuracion pa come carni ta duna lus berde pa hiba gustu den dramamentu innecesario di sanger animal djis pa e excitacion di yag of pa desplegá abilidad personal. Evidentemente Nimrod a haci esaki. Bijbel ta identifik’é como “un yagdó poderoso na oposicion cu Jehova.” (Génesis 10:9) Asta awe, excitacion pa yag i mata animal por desaroyá fácilmente den algun hende. Pero un spiritu asina ta bai man na man cu un indiferencia brutal pa bida animal, i Dios no ta aprobá esei.c

Ser Compasivo pa cu Animalnan

Algun vegetariano awe ta sinceramente preocupá tambe tocante e manera con e industria moderno di carni ta trata animalnan. “E negoshi di agricultura no tin niun tiki interes den e instintonan natural di animalnan,” The Vegetarian Handbook ta comentá. “Criá horiblemente pertá riba otro i den ambientenan innatural,” e buki ta nota, “animalnan djawe ta ser explotá mas completamente cu nunca promé.”

Maske no ta contra e boluntad di Dios pa usa animal pa cuminda, trata nan cruel sí ta. “E hustu ta percurá pa e alma di su animal doméstico,” Bijbel ta bisa na Proverbionan 12:10. I e Ley di Moises a manda pa cuida animalnan doméstico bon.—Exodo 23:4, 5; Deuteronomio 22:10; 25:4.

Un Cristian Mester Ta Vegetariano?

Manera lo anterior a mustra, e cuestion di bira un vegetariano—of permanecé unu—ta un decision estrictamente personal. Un persona por scoge pa sigui un régimen vegetariano pa motibunan di salú, finansa, ecologia of compasion pa animalnan. Pero e mester mira esei como solamente un custumber di come. E no mag criticá esnan cu ta scoge pa come carni, mescos cu esun cu ta come carni no mag condená un vegetariano. Come carni of abstené di dje no ta haci un hende un mihó persona. (Romanonan 14:1-17) Ni tampoco un hende su dieta no mester bira e cos mas importante den su bida. Jesus a bisa: “Hende mester biba, no di pan so, sino di tur expresion cu ta sali for dje boca di Jehova.”—Mateo 4:4.

Pa loke ta e crueldad cometí contra animal i e maluso dje recursonan di tera, Jehova a primintí di trece un fin na e sistema corupto i golos aki i reemplas’é cu e mundu nobo cu e lo introducí. (Salmo 37:10, 11; Mateo 6:9, 10; 2 Pedro 3:13) Den e mundu nobo ei, hende i animal lo biba pa semper na pas cu otro, i Jehova lo ‘satisfacé e deseo di tur cos bibiente.’—Salmo 145:16; Isaías 65:25.

[Notanan]

[Plachi Rekonosementu na página 28]

Punch