Bo Ta Siñando For di Nos Gran Instructor?

“MI A studia ley pa cincu aña na un dje mihó universidadnan na Spaña,” Julio a splica. “Pero loke mi a siña ora mi a cuminsá studia Bijbel tabata hopi superior. E universidad a siñá mi con pa studia; Bijbel a siñá mi con pa biba.”

Mediante Bijbel nos tin acceso na Dios su pensamentunan, su principionan i su instruccionnan. E Scritura ta describí Jehova como e “Gran Instructor” pasobra e ta e mihó maestro den universo. (Isaías 30:20) Literalmente, e texto hebreo ta yam’E “instructornan”​—⁠un plural indicando excelencia. Esaki mester recordá nos cu siendo siñá dor di Jehova ta hopi superior cu studia bou di cualkier otro maestro.

Sabiduria Práctico For di Jehova

Pakico siñansa divino ta asina beneficioso? Na promé lugá, pa motibu di su contenido balioso. Jehova su siñansa ta duna nos “sabiduria práctico.” Ademas, sabiduria duná dor di Dios “ta preservá bibu” esnan cu ta pon’é na práctica.​—⁠Proverbio 3:​21, 22; Eclesiastés 7:⁠12.

E compositor di Salmo 119 a realisá cu Jehova su sabiduria a proteh’é atrabes di su bida. Por ehempel, el a canta: “E ley di bo boca ta bon pa mi, na mayor grado cu miles di pida di oro i plata. Si bo ley no tabata loke mi tin cariño p’e, e ora ei lo mi mester a perecé den mi afliccion. Mas sabí cu mi enemigunan bo mandamentu ta hací mi, pasobra pa tempu indefiní e ta di mi. Mas perspicacia cu tur mi maestronan mi a yega di tin, pasobra bo recordatorionan ta di interes intenso pa mi.”​—⁠Salmo 119:​72, 92, 98, 99.

E salmista no ta e único cu lo a ‘perecé den su afliccion,’ si no tabata pa Jehova su ley. Rosa, un muher hóben di Spaña, ta convencí cu su bida a ser salbá debí cu el a aplicá principionan piadoso. “Na edad di 26 aña, ya mi a intentá na cometé suicidio dos biaha,” e ta corda.

Rosa a haña su mes den prostitucion, i tambe den abusu di alcohol i droga. “Un dia, ora mi tabata profundamente desesperá,” e ta bisa, “un pareha Testigo a papia cu mi tocante con Bijbel por yuda nos solucioná nos problemanan. Mi a cuminsá studia e Palabra di Dios, cua mi a haña fasinante. Dentro di un luna mi tabatin e fortalesa pa haci un comienso limpi i completamente nobo den bida. Awor cu mi tabatin un propósito den bida, mi no tabatin mester mas dje apoyo di alcohol of droga. I ya cu mi a deseá asina tantu pa ta Jehova su amigu, mi tabata determiná pa biba segun su normanan. Si no tabata p’e sabiduria práctico dje Palabra di Dios, mi ta sigur cu pa awor aki ya lo mi a pone un fin na mi bida.”

En berdad, sabiduria for di Jehova ta salbador di bida. P’esei, nos por saca beneficio no solamente for dje contenido precioso di siñansa divino sino tambe for dje medionan cu Jehova ta usa pa instruí su sirbidornan. Siendo cu e Yu di Dios, Jesucristo, a manda nos pa ta maestronan i hacidornan-didisipel, nos kier siña e métodonan mas eficas pa impartí instruccion.​—⁠Mateo 28:​19, 20.

Jehova Su Uso di Ilustracionnan

E Evangelio di Marco ta bisa cu “[Jesus] no a papia cu nan sin ilustracion.” (Marco 4:34) E rasgo característico aki di Jesus su siñamentu no ta sorprendente. El a simplemente imitá un dje maneranan cu Jehova su mensahenan profético a ser transmití n’e nacion di Israel. Esakinan ta contené un cantidad di ilustracionnan gráfico.​—⁠Isaías 5:​1-7; Jeremías 18:​1-11; Ezekiel 15:​2-7; Oseas 11:​1-4.

Nota, por ehempel, con Jehova ta usa un ilustracion poderoso pa siña nos cu ídolonan ta inútil. Isaías 44:​14-17 ta declará: “Tin un persona kende su negoshi ta di kap palu di cedro; i e ta tuma un cierto sorto di palu, asta un palu masivo . . . El a planta e palu di laurel, i . . . el a bira algu pa hende mantené un candela kimando. Pues e ta tuma parti di dje p’e keinta su mes. Realmente, e ta traha un candela i en realidad ta horna pan. Tambe e ta traha riba un dios dilanti cua e por buig. El a traha di dje un imágen grabá, e ta sak na suela dilanti dje. Mitar di dje e realmente ta kima den un candela. Riba mitar di dje e ta hasa bon e carni cu e ta come, i e ta keda satisfecho. . . . Pero di e resto di dje e realmente ta traha un dios mes, den su imágen grabá. E ta sak na suela dilanti dje i ta buig i ta resa na dje i ta bisa: ‘Librá mi, pasobra bo ta mi dios.’ ” Ilustracionnan manera esaki ta hermentnan poderoso pa yuda esnan onrado rechasá idolatria i doctrinanan falsu.

Preguntanan pa Saminá Nos Concenshi

Tambe Bijbel ta contené ehempelnan di con Jehova a ahustá e pensamentu di algun di su sirbidornan mediante preguntanan cu ta stimulá pensamentu serio. E patriarca Job tabata un di esakinan. Cu pacenshi Jehova a yud’é evaluá su mes insignificancia en relacion cu Dios. Esaki a ser hací pa medio di un seri di pregunta, cua Job tabata desesperadamente incapas pa contestá.

“Unda bo tabata ora mi a funda e tera?” Jehova a puntra Job. “Ken a pone baricada di portanan pa laman? . . . Bo por mara duru e banchinan dje constelacion Kima, of bo por los e cabuyanan mes dje constelacion Kesil? . . . Bo tin un brasa manera esun dje Dios berdadero?” E interogacion aki pa haci Job humilde a incluí e pregunta masha importante: “Lo bo pronunciá mi [Jehova] malbado pa bo por haña rason?”​—⁠Job 38:​4, 8, 31; 40:​8, 9.

E preguntanan di saminacion aki a haci Job realisá cu el a papia sin comprendimentu. P’esei, el hala atras i a repentí. (Job 42:⁠6) Mescos cu den e caso aki, preguntanan bon scogé por yuda reahustá pensamentu incorecto di parti di nos yunan of studiantenan di Bijbel.

Edificando Confiansa

Kico si nos mester yuda un persona cu ta sinti su mes indigno of incapas? Di probecho den e caso aki ta un combersacion entre Jehova i su profeta Moises. Ora Dios a asigná Moises pa ta su bocero dilanti Fárao i e israelitanan, e profeta a sinti su mes incapas pa cumpli cu e tarea. “Mi ta lento di boca i lento di lenga,” el a bisa. Sin embargo, Dios a contestá: “Ken a asigná boca na hende? . . . No ta ami, Jehova? Pues bai awor, i ami mes lo resultá di ta cu bo boca i ami lo siñá bo loke bo mester bisa.”​—⁠Éxodo 4:​10-12.

Jehova a asigná Moises su ruman, Aron, como su bocero i nan a pasa na efectuá nan trabou den Egipto. (Éxodo 4:​14-16) Hopi Testigo di Jehova a compartí Moises su sintimentunan di deficiencia ora nan a participá pa promé biaha den e ministerio di cas-pa-cas of den testimonio riba caya. Mescos cu den e caso di Moises, sabiendo cu nos tin e sosten di Jehova i cu nos lo ta compañá pa un minister experenciá, por haci nos vence nos insiguridad. Mescos cu Moises tabata capas pa cultivá confiansa te n’e grado di duna e discursonan poderoso cu nos por haña atrabes dje buki bíblico di Deuteronomio, cu yudansa di Jehova nos tambe por edificá abilidad di papia.

Un Ehempel Práctico

Un deseo sincero pa yuda otronan tambe ta indispensabel. Esei tabata un cualidad cu e profeta Jonas no tabatin. Jehova a asigná Jonas pa spierta e pueblo di Nínive tocante e destruccion inminente dje stad. Sorprendentemente, e ninivitanan a repentí. (Jonas 3:⁠5) Como consecuencia, Jehova a posponé e calamidad. Pero en bes di yena cu goso rib’e éxito di su campaña di predicacion, Jonas a rabia cu su pronóstico lo no a cumpli. Con Jehova a yud’é haña e punto di bista corecto?

Jehova a usa un mata di calbas di botter pa siña Jonas e importancia di interesá den otronan. E mata a crece milagrosamente durante anochi i a proveé algun sombra na ora pa Jonas, kende a traha un tent pafó dje stad di Nínive. Jonas a cuminsá “alegrá mashá” riba e mata humilde aki. Pero e ora ei Jehova a laga un bichi heridá e mata di manera cu el a seca. Sin proteccion contra e solo i un bientu ardiente, Jonas a rabia i a bisa: “Mihó mi muri cu mi keda na bida.” (Jonas 4:​5-8) Kico tabata e les den tur esaki?

Jehova a papia cu Jonas i a bisa: “Abo, di bo parti, a sinti duele dje mata di calbas di botter, cua bo no a afaná p’e of haci crece, cua a resultá di ta un simpel crecimentu di un anochi i a perecé como un simpel crecimentu di un anochi. I ami, di mi parti, no mester sinti duele di Nínive e gran stad, den cua ta existí mas cu cient’i binti mil hende cu no sa mes e diferencia entre nan man drechi i nan man robes, ademas di hopi animal doméstico?”​—⁠Jonas 4:​9-11.

Ki un les práctico poderoso! Jonas tabata mas interesá den e mata di calbas di botter cu den miles di hende. Aunke interes den cualkier parti dje creacion di Dios ta encomendabel, yuda scapa bida di hende ta nos tarea di mas importante.

Instruyendo Cu Pacenshi

Manera Jonas a descubrí, no ta semper fácil pa cumpli cu nos ministerio. (2 Timoteo 4:⁠5) Sin embargo, un actitud paciente pa cu otronan lo yuda.

Con bo ta reaccioná ora un di bo studiantenan di Bijbel ta lento of un tiki irazonabel? Nos Gran Instructor ta siña nos con pa trata cu un problema asina. El a mustra un pacenshi extraordinario ora Abraham a sigui haci’é pregunta tocante e huicio inminente riba Sódoma i Gomora. “Di berdad lo bo eliminá e hustu huntu cu e malbado?” Abraham a puntra. “Suponé cu tin cincuenta hende hustu meimei dje stad,” Abraham a suplicá. “Lo bo eliminá nan e ora ei i no pordoná e lugá pa causa dje cincuenta hustunan cu ta den dje?” Jehova su contesta a impulsá Abraham pa sigui suplicá te ora e cantidad a ser reducí na dies. Jehova tabata sa cu Lot su famia so a merecé pa ser salbá, i el a haci percuracion pa esei tuma lugá. Pero cu pacenshi Dios a permití Abraham sigui cuestion’é te ora el a capta e magnitud di Jehova su misericordia.​—⁠Génesis 18: 20-32.

Jehova a tuma na consideracion Abraham su comprendimentu limitá i su sintimentunan di preocupacion. Si nos tambe ta comprendé e limitacionnan di nos studiante, esei lo yuda nos mustra pacenshi miéntras e ta haci esfuerso pa comprendé un doctrina particular of pa vence un custumber cu rais profundo.

Sigui Siña For di Jehova

Jehova Dios ta indudablemente e Gran Instructor. Usando medionan manera ilustracion, pregunta i ehempel práctico, cu pacenshi e ta impartí siñansa. Te n’e grado cu nos ta imitá su métodonan di siñansa, nos mes lo bira mihor maestronan.

Siendo cu esnan cu ta siña otronan no mester neglishá di siña nan mes, nos mester sigui ser “siñá dor di Jehova.” (Isaías 54:13) Isaías a skirbi: “Bo wowonan tin cu bira wowonan mirando bo Gran Instructor. I bo mes oreanan lo tende un palabra bo tras bisando: ‘Esaki ta e caminda. Boso cana den dje,’ den caso cu boso bai pa banda drechi of den caso cu boso bai pa banda robes.” (Isaías 30:​20, 21) Dor di sigui cana den Jehova su caminda i yuda otronan haci esei, nos por tin e privilegio único di siña for di nos Gran Instructor pa semper.

[Caption on page 28]

Jehova a puntra Job: “Ta riba bo ordu un águila ta bula bai ariba i ta construí su neshi den haltura?”

[Caption on page 28]

Pa medio di un mata di calbas di botter, Jehova a siña Jonas pa ta mas interesá den hende