Abraham​—Derá Aki, Tog Bibu?

Pa siglonan hende hudiu, moslim i cristian a biaha p’e lugá aki.

Bo por bishit’é den e stad antiguo di Hébron, sur di Jerusalem. E structura aki ta ser yamá tantu Haram el-Khalil como e Tumba dje Patriarcanan. Sí, esaki ta ser ampliamente aceptá como e lugá di entiero dje patriarcanan Abraham, Isaac i Jacob, i tambe nan respectivo esposanan Sara, Rebeca i Lea.

Corda for di Bijbel cu ora Abraham su esposa stimá, Sara, a muri, el a cumpra un cueba i poco tera pa sirbi como sitio di entiero na Macpelá, cerca di Hébron. (Génesis 23:​2-20) Despues, Abraham tambe a ser derá ei, mescos cu otro miembronan di famia. Siglonan despues, rond dje sitio tradicional di entiero, Herodes e Grandi a construí un edificio impresionante cua cu tempu a ser cambiá i hací mas grandi dor di conkistadornan, reflehando nan mes creencianan religioso.

Ora bo drenta, bo ta mira seis cenotafio (monumento of graf bashí). E potret chikitu ta mustra esun pa Isaac, yu di Abraham. Cerca dje tin buracunan dor dje flur, cuanan a ser usá pa haña acceso na loke tin bou di dje. Investigadornan a descubrí kambernan cu kisas tabata contené cantidad di wesu di antigua.

Kico di Abraham? Si el a ser derá den un cueba awor bou dje sitio aki, e tin hopi tempu morto, no ta berdad? Mayoria bishitante lo ta di acuerdo. Sin embargo, un profeta mayor cu Abraham a bisa cu den un sentido Abraham ta biba ainda. Con? I ki relacion esaki por tin cu bo fe?

Por fabor lesa e artículo “Bo Defuntonan Stimá​—⁠Unda Nan Ta?” (Página 3) E ta presentá loke e gran profeta ei a bisa tocante Abraham siendo bibu, cua informacion por ta di un inmenso balor pa bo i bo famia.