Bo Tin Fe Manera di Abraham?

“Ora e Yu di hende yega, realmente lo e haña fe riba tera?”—LUCAS 18:8.

1. Pakico ta difícil pa mantené bo fe fuerte awe?

NO TA fácil pa mantené bo fe fuerte awe. Mundu ta pone hopi preshon riba cristiannan pa kita nan atencion for di cosnan spiritual. (Lucas 21:34; 1 Juan 2:15, 16) Hopi cristian tin cu lucha pa sobrebibí guera, desaster, enfermedad of hamber. (Lucas 21:10, 11) Den un cantidad di nacion, tin un cultura concentrá principalmente riba cosnan seglar, i ken cu ta biba segun su fe, ta ser mirá como irazonabel, asta fanático. Ademas, mundu ta persiguí hopi cristian debí na nan fe. (Mateo 24:9) E pregunta cu Jesus a haci casi 2.000 aña pasá, sigur ta apropiado: “Ora e Yu di hende yega, realmente lo e haña fe riba tera?”​—Lucas 18:8.

2. (a) Pakico un fe fuerte ta esencial pa un cristian? (b) Ken su ehempel di fe nos ta haci bon di considerá?

² Pero echo ta cu un fe fuerte ta esencial si nos kier tin éxito den bida awor i ricibí e bida eterno primintí pa futuro. Citando Jehova su palabranan na Habacuc, apostel Pablo a skirbi: “‘Mi hustu lo biba pa causa di fe,’ i ‘si e ta hala atras, mi alma no tin placer den dje.’ . . . Sin fe ta imposibel pa agradá [Dios] bon.” (Hebreonan 10:38–11:6; Habacuc 2:4) Pablo a bisa Timoteo: “Lucha e lucha excelente di fe, haña un gara firme riba e bida eterno pa cua bo a ser yamá.” (1 Timoteo 6:12) Con ta posibel anto, pa nos tin un fe inkebrantabel? Ora di considerá e pregunta ei, nos ta haci bon di contemplá un homber cu a biba rond di 4.000 aña pasá, pero kende su fe te ainda ta altamente respetá den tres religion principal: islam, hudaismo i cristianismo. E homber ei ta Abraham. Pakico su fe tabata asina remarcabel? Nos por imit’é awe?

Obedencia na Instruccion di Dios

3, 4. Pakico Taré a muda cu su famia for di Ur pa Haran?

³ Abraham (originalmente yamá Abram) ta ser mencioná pa promé bes casi na cuminsamentu di Bijbel. Na Génesis 11:26, nos ta lesa: “Taré . . . a bira tata di Abram, Nacor i Haran.” Taré cu su famia tabata biba na Ur dje caldeonan, un stad próspero den sur di Mesopotamia. Ma nan no a keda ei. “Taré a tuma su yu Abram i su nietu Lot, yu di Haran, i Sarai [Sara] su suegra, esposa di su yu Abram, i nan a sali cuné for di Ur dje caldeonan pa bai e tera di Canan. Cu tempu nan a yega Haran i a bai biba ei.” (Génesis 11:31) Abraham su ruman Nacor tambe a muda cu su famia pa Haran. (Génesis 24:10, 15; 28:1, 2; 29:4) Pero pakico Taré a muda for dje stad próspero di Ur pa Haran cu ta keda leu?

⁴ Rond di 2.000 aña despues di tempu di Abraham, ora e homber fiel, Esteban, tabata papia dilanti e Sanedrin hudiu, el a splica e mudansa straño aki di Taré su famia. El a bisa: “E Dios di gloria a aparecé na nos antepasado Abraham miéntras e tabata na Mesopotamia, promé cu el a bai biba na Haran, i el a bis’é: ‘Sali for di bo tera i for di bo parientenan i bini na e tera cu lo mi mustra bo.’ E ora ei el a sali for dje tera dje caldeonan i a establecé su mes na Haran.” (Echonan 7:2-4) Taré a someté su mes n’e boluntad di Jehova pa Abraham ora el a muda pa Haran cu su famia djacerca.

5. Unda Abraham a bai despues cu su tata a muri? Pakico?

⁵ Taré su famia a establecé nan mes den nan stad nobo. Añanan despues ora Abraham a papia di “mi pais,” e tabata kier men e área di Haran, no Ur. (Génesis 24:4) No obstante, Haran lo no tabata e cas permanente di Abraham. Segun Esteban, “despues cu [Abraham] su tata a muri, Dios a pon’é cambia su residencia na e tera aki den cua boso ta biba awor.” (Echonan 7:4) Obedeciendo e instruccion di Jehova, Abraham, compañá pa Lot, a crusa Riu Eufrátes drenta e tera di Canan.a

6. Kico Jehova a primintí Abraham?

⁶ Pakico Jehova a pone Abraham muda pa Canan? E motibu tabatin di haber cu e propósito di Dios p’e homber fiel ei. Jehova a bisa Abraham: “Sali for di bo pais i for di bo parientenan i for dje cas di bo tata, i bai n’e pais cu lo mi mustra bo; i lo mi haci bo bira un nacion grandi i lo mi bendicioná bo i lo mi haci bo nomber grandi; i lo bo resultá di ta un bendicion. I lo mi bendicioná esnan cu ta bendicioná bo, i esun cu ta inbocá malu riba bo, lo mi maldicioná, i tur e famianan dje tera siguramente lo bendicioná nan mes pa medio di bo.” (Génesis 12:1-3) Abraham lo a bira tata di un nacion grandi cu lo a haña e proteccion di Jehova i cu lo a poseé e tera di Canan. Un promesa maraviyoso! Pero Abraham tabatin cu haci cambio radical den su bida p’e por a heredá e tera ei.

7. Ki cambionan Abraham mester tabata dispuesto pa haci pa por heredá e promesa di Jehova?

⁷ Ora Abraham a bandoná Ur, el a bandoná un stad próspero i probablemente e famia grandi di su tata; fuentenan importante di siguridad den e tempu ei di patriarca. Ora el a bandoná Haran, el a separá su mes for dje cas di famia di su tata, incluso e famia di su ruman Nacor, i a muda pa un tera desconocí. Na Canan e no a busca siguridad paden dje murayanan di un stad. Pakico no? Djis despues cu Abraham a drenta e tera, Jehova a bis’é: “Bai di un lugá pa otro den e tera, den su largura i den su hanchura, pasobra na abo mi ta bai dun’é.” (Génesis 13:17) Abraham di 75 aña i su esposa Sara, di 65 aña, a sigui e instruccionnan aki. “Pa medio di fe el a biba como stranhero den e tera dje promesa como den un tera stranhero, i a biba den tent.”​—Hebreonan 11:9; Génesis 12:4.

Fe Manera di Abraham Awe

8. Mirando e ehempel di Abraham i otro testigonan di antigwedad, kico nos mester cultivá?

⁸ Bijbel ta incluí nomber di Abraham i su famia entre e “nubia . . . grandi di testigonan” pre-cristian mencioná den Hebreonan capítulo 11. En bista di e fe dje promé sirbidónan aki di Dios, Pablo ta animá cristiannan pa “kita tur carga i e picá [falta di fe] cu fácilmente ta coge nos den trampa.” (Hebreonan 12:1) Sí, falta di fe por ‘coge nos fácilmente den trampa.’ Pero tantu den e tempu di Pablo como den nos tempu, cristiannan genuino a logra cultivá fe fuerte comparabel na esun di Abraham i otronan di tempu pre-cristian. Papiando di su mes i di su compañeronan cristian, Pablo ta bisa: “Nos no ta e clase cu ta hala atras te na destruccion, sino e clase cu tin fe cu ta conserbá e alma bibu.”​—Hebreonan 10:39.

9, 10. Ki evidencia tin cu awe hopi hende tin fe manera di Abraham?

⁹ Ta cierto cu mundu a cambia compará cu e tempu di Abraham. No obstante, ainda nos ta sirbi e mésun “Dios di Abraham,” i e sí no ta cambia. (Echonan 3:13; Malakías 3:6) Jehova ta merecé nos adoracion awe mescos cu el a merec’é den tempu di Abraham. (Revelacion 4:11) Hopi hende ta dedicá nan mes completamente na Jehova i, mescos cu Abraham, nan ta haci cualkier cambio necesario den nan bida pa por haci e boluntad di Dios. Aña pasá, 316.092 persona a duna evidencia público di nan dedicacion dor di someté nan na bautismo bou di awa “den e nomber dje Tata i dje Yu i dje spiritu santu.”—Mateo 28:19.

¹⁰ Mayoria dje cristiannan nobo aki no tabatin cu biaha bai leu for di nan pais pa cumpli cu nan dedicacion. Pero, den un sentido spiritual, hopi di nan a biaha un distancia basta grandi. Por ehempel, na Mauritius, tabatin un hacidó di bruha cu yama Elsie. Tur hende tabatin miedu di dje. Un pionero special a haci areglo pa studia Bijbel cu Elsie, su yu muher, i esaki a habri caminda pa Elsie “bolbe for di scuridad na e lus.” (Echonan 26:18) Mirando e interes di su yu muher, Elsie a bai eens pa studia Mi buki di relato bíblico. Tabata conducí e studio tres bes pa siman cuné ya cu e tabatin mester di animacion constante. Su prácticanan di spiritismo no a dun’é felicidad, i e tabatin hopi problema personal. Sin embargo, cu tempu, e por a completá e biahe largu for di demonismo pa adoracion berdadero. Ora hende tabata bin busk’é pa su servicionan, e tabata splica nan cu ta Jehova so por protehá nan di cos malu. Awor Elsie ta un Testigo bautisá, i 14 persona di su famia i conocínan a aceptá e berdad.

11. Ki ahustenan esnan cu ta dedicá nan mes na Jehova ta dispuesto pa haci?

¹¹ Mayoria di esnan cu aña pasá a dedicá nan mes pa sirbi Dios no tabatin nodi haci cambionan radical asina. Pero tur a cambia for di ta spiritualmente morto pa ta spiritualmente bibu. (Efesionan 2:1) Aunke ainda nan ta físicamente den mundu, nan no ta parti di dje mas. (Juan 17:15, 16) Mescos cu cristiannan ungí, kende nan “ciudadania ta existí den shelu,” nan ta manera “stranhero i residentenan temporal.” (Filipensenan 3:20; 1 Pedro 2:11) Nan a pone nan bida na armonia cu e normanan di Dios, motivá, riba tur cos, pa amor pa Dios i amor pa próhimo. (Mateo 22:37-39) Nan no ta sigui metanan egoista i materialista ni no ta sinti e necesidad pa logro personal den e mundu aki. En bes di esei, nan ta fiha nan bista riba e ‘shelu nobo i tera nobo primintí den cua husticia lo tin cu biba.’​—2 Pedro 3:13; 2 Corintionan 4:18.

12. Ki actividad raportá aña pasá ta duna evidencia cu durante Jesus su presencia, el a haña “fe riba tera”?

¹² Ora Abraham a muda pa Canan, e cu su famia tabata nan so ei, cu solamente Jehova pa apoyá nan i protehá nan. Sin embargo, e 316.092 cristiannan recien bautisá aki ta leu di ta nan so. Ta cierto cu Jehova ta apoyá nan i ta protehá nan pa medio di su spiritu, mescos cu el a haci cu Abraham. (Proverbionan 18:10) Pero, ademas di esei, e ta apoyá nan mediante un “nacion” internacional vibrante cu tin un poblacion mas grandi cu algun nacion di mundu djawe. (Isaías 66:8) Aña pasá, un máximo di 5.888.650 ciudadano dje nacion ei a duna evidencia di nan fe activo dor di papia cu nan próhimo tocante e promesanan di Dios. (Marco 13:10) Nan a dedicá e cantidad extraordinario di 1.186.666.708 ora den e trabou aki, buscando hende interesá. Como resultado, nan a conducí 4.302.852 studio di Bijbel cu otro hende cu ta deseá di cultivá fe. Como un demostracion adicional di nan celo, 698.781 persona den e “nacion” aki a participá den e sirbishi di pionero, sea tempu completo of pa un luna of mas. (Bo ta haña detaye dje actividad di Testigonan di Jehova di aña pasá na página 12 pa 15.) E registro remarcabel aki ta un contesta bibu i afirmativo riba Jesus su pregunta: “Ora e Yu di hende yega, realmente lo e haña fe riba tera?”

Fiel Apesar di Prueba

13, 14. Describí algun dje dificultadnan cu Abraham i su famia a encontrá na Canan.

¹³ Hopi bes cosnan tabata difícil pa Abraham i su famia na Canan. Na por lo ménos un ocasion, tabatin un hamber severo cu a obligu’é sali for di Canan bai Egipto. Ademas, tantu e gobernante di Egipto como e gobernante di Guerar (cerca di Gaza) a purba tuma Abraham su casá, Sara, pa nan mes. (Génesis 12:10-20; 20:1-18) Tambe tabatin conflicto entre cuidadó di bestia di Abraham i cuidadó di bestia di Lot, i esaki a causa un separacion entre e dos famianan. Di un manera inegoista, Abraham a duna Lot e promé chens di scoge tereno, i Lot a scoge pa biba den e Distrito di Jordan, cu tabata parce Eden pa loke ta su fertilidad i bunitesa.​—Génesis 13:5-13.

¹⁴ Despues, Lot a haña su mes enbolbí den un guera entre e rey di Elam, cu tabata na un bon distancia, i su aliadonan, contra e reynan di cincu stad riba e Yanura Abou di Sidim. E reynan stranhero a vence e reynan local i a bai cu un botin grandi, incluso Lot i su pertenencianan. Ora Abraham a tende kico a pasa, sin miedu el a bai tras dje reynan stranhero i a logra recobrá Lot i su famia di cas, i tambe pertenencianan dje reynan local. (Génesis 14:1-16) Sin embargo, esei no tabata Lot su pió experencia na Canan. Pa un of otro motibu el a bai biba na Sódoma, apesar dje reputacion inmoral dje stad.b (2 Pedro 2:6-8) Ora dos angel a spierta Lot cu Dios lo a destruí e stad, el a hui cu su esposa i su yu muhernan. Sin embargo, Lot su esposa a ignorá e instruccionnan specífico dje angelnan i, como resultado, a ser derá den un pilar di salu. Lot a haña su mes obligá ta biba pa un tempu den un cueba na Zoar huntu cu su dos yunan. (Génesis 19:1-30) E sucesonan aki lo mester a molestiá Abraham masha tantu, foral dor cu Lot a bini Canan como parti di Abraham su famia di cas.

15. Apesar dje problemanan cu Abraham a enfrentá tempu cu e tabata biba den tent den un pais desconocí, ki pensamentu negativo el a evitá evidentemente?

¹⁵ Lo tabatin ocasion cu Abraham a puntra su mes cu lo no tabata mihó si e cu Lot a keda den e siguridad di Ur huntu cu e famia grandi di su tata of na Haran huntu cu su ruman Nacor? Lo tabatin biaha cu el a deseá cu e por a establecé su mes den e siguridad di un stad rondoná pa muraya en bes di biba den tent? Por ta cu el a cuestioná e sabiduria dje sacrificionan cu el a haci di biaha di un banda pa otro den un pais desconocí? Papiando di Abraham cu su famia, apostel Pablo e remarcá: “Si nan di berdad a sigui corda e lugá ei di cua nan a sali, nan lo tabatin e oportunidad di bolbe.” (Hebreonan 11:15) Tog, nan no a bolbe. Nan a keda caminda Jehova tabata kier pa nan ta, sin laga contratempu desanimá nan.

Awante Awe

16, 17. (a) Ki dificultadnan hopi cristian ta enfrentá awe? (b) Ki actitud positivo cristiannan tin? Pakico?

¹⁶ Nos por mira un awante similar den cristiannan awe. Aunke e ta un fuente di gran goso pa nan sirbi Dios, bida no ta fácil pa cristiannan berdadero den e último dianan aki. Aunke nan ta biba den un paradijs spiritual, nan ta sufri dje mésun preshonnan económico cu nan próhimo. (Isaías 11:6-9) Hopi a bira víctima inocente den e gueranan dje nacionnan, i algun a bin cai den pobresa extremo sin cu ta nan mes falta. Ademas, nan ta wanta e problemanan di ta un minoria impopular. Den hopi pais nan ta predicá e bon nobo meimei di un tremendo apatia. Den otro paisnan nan ta sufri dje atakenan di acusacion falsu di parti di esnan cu ta ‘formulá problema mediante decreto’ i cu ta “pronunciá malbado asta e sanger di esun inocente.” (Salmo 94:20, 21) Asta den paisnan caminda cristiannan no ta bou di atake i caminda algun hende ta elogiá nan pa nan normanan haltu, nan ta conciente cu nan ta diferente for di nan compañeronan di scol i di trabou, prácticamente mescos cu Abraham, cu a biba den tent miéntras mayoria hende rond di dje tabata biba den stad. Sí, no ta fácil pa biba den mundu i tog “no ta parti” di dje.—Juan 17:14.

¹⁷ Ta duel nos anto, cu nos a dedicá nos mes na Dios? Nos ta pensa cu ta mihó nos a keda parti di mundu, ser manera tur otro hende? Nos ta lamentá e sacrificionan cu nos a haci den Jehova su sirbishi? Di ningun manera! En bes di mira atras cu anhelo, nos ta reconocé cu kico cu nos por a sacrificá no tabatin berdadero balor compará cu e bendicionnan cu nos ta disfrutá di dje awor i esnan cu nos lo disfrutá di dje den futuro. (Lucas 9:62; Filipensenan 3:8) Ademas, hende den mundu ta felis? E berdad ta cu hopi di nan ta buscando contestanan cu nos tin caba. Nan ta sufri dor cu nan no ta sigui e guia cu nos ta haña for di Dios mediante e páginanan di Bijbel. (Salmo 119:105) I hopi di nan ta anhelá e clase di compañerismo cristian i dushi asociacion cu nos ta disfrutá di dje cu nos compañeronan creyente.—Salmo 133:1; Colosensenan 3:14.

18. Kico ta e resultado final ora cristiannan mustra curashi manera esun di Abraham?

¹⁸ Berdad tin biaha nos mester tin curashi mescos cu Abraham ora el a bai tras di esnan cu a capturá Lot. Pero ora nos tin curashi, Jehova ta bendicioná e resultado. Por ehempel, na Nort Irlanda ta reina un odio profundo como resultado dje violencia di sectanan contra otro, i curashi ta necesario pa keda neutral. Sin embargo, cristiannan fiel a haci caso di Jehova su palabranan na Hosué: “Tene curashi i sea fuerte. No yena cu ansha ni cu teror, pasobra Jehova bo Dios ta cu bo unda cu bo bai.” (Hosué 1:9; Salmo 27:14) Den transcurso di añanan nan posicion intrépido a gana respet, i awe nan por predicá libremente den tur comunidad dje pais ei.

19. Unda cristiannan ta felis di ta, i ki resultado nan ta spera cu confiansa ora nan sigui Jehova su instruccion?

¹⁹ Hamas nos tin cu duda cu si nos sigui Jehova su instruccion, sea cual sea e situacion cu nos ta enfrentá, e resultado final lo ta pa su gloria i pa nos beneficio riba término largu. Apesar dje desafio i sacrificionan, no tin ningun lugá cu nos lo preferá di ta cu no ta den Jehova su sirbishi, disfrutando di compañerismo cu nos rumannan cristian i mirando padilanti cu confiansa n’e futuro eterno cu Dios a primintí.

[Nota]

Bo Ta Corda?

◻ Pakico un fe fuerte ta esencial?

◻ Con Abraham a mustra cu e tabatin fe fuerte?

◻ Con dedicacion ta bai compañá cu cambionan den bida di un persona?

◻ Pakico nos ta felis pa sirbi Dios apesar di cualkier problema cu nos por enfrentá?

[Plachinan na página 7]

Abraham tabata dispuesto pa haci cambionan grandi den su bida pa por heredá e promesa

[Plachinan na página 9]

Evidencia ta mustra cu Jesus a haña “fe riba tera” durante su presencia