PA HOPI siglo hudaismo a siña cu e nomber di Dios, Jehova, ta muchu sagrado pa pronunciá.a (Salmo 83:18) Hopi teólogo a razoná cu ta un falta di respet pa dirigí bo mes na e glorioso Creador den un manera asina familiar of asta cu e ta un violacion dje di tres dje Dies Mandamentu, cu ta prohibí pa ‘usa nòmber di SEÑOR pornada.’ (Exodo 20:7, Editorial Evangélica) Den siglo 3 E.C., Mishna a declará cu “esun cu pronunciá e Nomber divino manera e ta skirbí, no tin parti den e mundu binidero.”—Sanedrin 10:1.

E di Tres Mandamentu

Pero kico dje prohibicion cu e di tres mandamentu dje Dies Mandamentu ta mencioná? Exodo 20:7 ta declará fuertemente: “Bo no mag tuma e nomber di Jehova bo Dios den un manera indigno, pasobra Jehova lo no laga esun cu tuma su nomber den un manera indigno sin castigu.”

Kico tuma e nomber di Dios “den un manera indigno” ta nificá precis? The JPS Torah Commentary, publicá dor dje Sociedad Editorial Hudiu, ta splica cu e palabra hebreo traducí aki como “den un manera indigno” (lash·sháwʹ) por nificá “falsamente” of “por nada, en bano.” E mésun obra di referencia ta sigui bisa: “E ambigwedad [dje palabra hebreo aki] ta permití pa prohibí e dos partidonan den un caso di corte pa cometé perhurio, hura falsamente i usa e Nomber divino sin ta necesario of con-cu-ta.”

E comentario hudiu aki ta resaltá corectamente cu ‘tuma e nomber di Dios den un manera indigno’ ta encerá usa e nomber den un manera cu no ta apropiado. Pero lo ta na su lugá pa bisa cu un hende cu ta pronunciá e nomber di Dios ora di siña otronan tocante dje of ora di acudí na nan Tata celestial den oracion, ta haci esei “sin ta necesario of con-cu-ta”? Jehova ta expresá su punto di bista cu e palabranan di Salmo 91:14: “Debí cu el a pone su cariño riba mi, ami tambe lo percurá escape p’e. Lo mi proteh’é, pasobra el a siña conocé mi nomber.”