Rahab​—⁠Declará Hustu mediante Obra di Fe

DJIS imaginá bo! Un muher di mal bida declará hustu desde e punto di bista di Dios. “Nunca!” hopi hende lo bisa. Sin embargo, esei ta loke a sosodé cu e prostituta Rahab di Jérico, un stad cananeo di antigua.

Santiago, escritor di Bijbel, ta bisa: “Un homber mester ser declará hustu mediante obra, i no mediante fe so. Den e mesun manera tambe, Rahab, e muher di mal bida, no a ser declará hustu mediante obra, despues cu el a ricibí e mensaheronan hospitalariamente i a manda nan bai via un otro caminda? En berdad, mescos cu e curpa sin spiritu ta morto, asina tambe fe sin obra ta morto.” (Santiago 2:24-26) Pakico Rahab a ser declará hustu? Kico el a haci pa ricibí un posicion asina privilegiá cerca Dios?

E Israelitanan Ta Biniendo!

Laga nos considerá e aña 1473 P.E.C. Visualisá e marco di circunstancia. Jérico ta bastante fortificá. Situá na haltu riba muraya dje stad ta e cas di Rahab, e muher di mal bida. For dje punto faborabel aki, probablemente e por mira parti oost den direccion dje awanan cu ta desbordá for di riu Jordan. (Hosué 3:15) Na su oriya parti oost, kisas e por mira e campamentu dje israelitanan, cu un forsa di bataya di mas cu 600.000 homber. Nan ta solamente un par di kilometer leu!

Rahab a haña sa tocante Israel su hazañanan den bataya. Tambe el a tende dje manifestacionnan di Jehova su poder, particularmente den habrimentu di un coridor di escape p’e israelitanan dor di Laman Corá. Siguramente, anto, e awanan gerijs di riu Jordan lo no ta un barera. Esaki ta un tempu di crísis! Con Rahab lo reaccioná?

Rahab Ta Tuma Su Posicion

Pronto, Rahab ta ricibí dos bishitante inesperá—spion dje campamentu israelita. Nan ta busca un lugá di hospedahe, i e ta permití nan den su cas. Pero informe di nan presencia ta yega na orea dje rey di Jérico. E ta despachá su oficialnan lihé pa cohe nan den custodia.—Hosué 2:1, 2.

Pa ora cu e oficialnan dje rey a yega, Rahab a tuma su posicion na banda di Jehova Dios. “Saca e hombernan cu a bini cerca bo,” e oficialnan real ta exigí. Rahab a sconde e spionnan entre e stengelnan di palu di linen cu tabata seca riba su dak. E ta bisa: “Sí, ta berdad cu e hombernan a bini cerca mi, i mi no tabata sa for di unda nan tabata. I a sosodé cu na ora di cera porta [dje stad] ora a bira scur, e hombernan a sali. Mi simplemente no sa unda e hombernan a bai. Core nan tras rápidamente, pasobra boso lo alcansá nan.” (Hosué 2:3-5) E hombernan dje rey ta haci esei—en bano.

Rahab a laga e enemigunan dwal. Inmediatamente e ta dal mas paso cu ta manifestá su fe den Jehova mediante obra. E ta subi dak i ta bisa e spionnan: “Mi sa cu Jehova siguramente lo duna boso e tera.” Rahab ta admití cu tur e habitantenan dje tera ta temorisá pasobra nan a tende cu Dios “a seca e awanan di Laman Corá” for di dilanti e israelitanan 40 aña mas promé. E pueblo sa tambe cu e israelitanan a destruí dos rey amoreo. Rahab ta bisa, “Ora nos a yega na tende esei, anto nos curason a cuminsá dirti, i ningun spiritu a lanta ainda den ningun persona pa causa di boso, pasobra Jehova boso Dios ta Dios den cielu ariba i riba tera abou.”—Hosué 2:8-11.

Rahab ta roga: “Awor, por fabor, hura na mi pa Jehova cu, debí cu mi a ehercé bondad amoroso pa cu boso, boso tambe siguramente lo ehercé bondad amoroso pa cu e cas di mi tata, i boso mester duná mi un señal fidedigno. I boso mester conservá bibu mi tata i mi mama i mi rumannan homber i muher i tur cu ta pertenecé na nan.”—Hosué 2:12, 13.

E hombernan ta bai di acuerdo i ta bisa Rahab kico pa haci. For di su bentana, e mester cologá e cabuya corá cu ta ser usá pa baha e spionnan abou na suela pafó dje murayanan di Jérico. E mester reuní su famia den su cas, caminda nan mester keda pa proteccion. Rahab ta duna e spionnan cu ta bayendo informacion útil tocante e estado dje tereno i ta splica nan con pa evadí nan persiguidornan. Esaki ta loke e spionnan ta haci. Despues di exhibí e cabuya corá i reuní miembronan di su cas, Rahab ta warda mas desaroyo.—Hosué 2:14-24.

Kico Rahab a haci? Wel, el a proba cu su fe ta den Jehova, e Dios Todopoderoso! Lo e biba segun su normanan. Sí, i lo e ser declará hustu pa tal obranan di fe.

E Murayanan Ta Basha Abou!

Algun siman ta pasa. Compañá pa sacerdote—algun cu cachu di chubat’i carné i otronan cargando e arca sagrado dje pacto—e hombernan israelita di guera ta rondoná Jérico. Nan a bin ta haci esaki un biaha pa dia pa seis dia awor. Ma riba e di siete dia aki ya nan a marcha rond dje stad seis biaha. Ata nan ta bai atrobe!

Ora e di siete marcha ser completá, zonido largu di cachu ta yena e aire. E israelitanan awor ta grita cu forsa. Riba esei, Jehova ta pone e murayanan protectivo di Jérico basha abou cu un boroto di strena. Solamente e seccion cu ta sostené e cas di Rahab ta keda para. E resto dje stad i su habitantenan ta ser destruí. Cu su fe probá mediante obra, e prostituta repentí ta ser conservá huntu cu su famia, i e ta cuminsá biba meimei dje pueblo di Jehova.—Hosué 6:1-25.

Un Bista dje Cualidadnan di Rahab

Rahab no tabata un muher floho i malcriá, pasobra riba su dak tabatin stengelnan di palu di linen secando den solo. Fibra di palu di linen tabata ser usá pa traha linen. Tambe tabatin un depósito di cabuya di carmesí den Rahab su cas. (Hosué 2:6, 18) Pues, talbes e tabata enbolbí den produccion di linen i posiblemente tabata conocé e arte di tinsha (tiña). Sí, Rahab tabata un muher industrioso. Riba tur cos, el a bin haña un temor reverencial pa Jehova.—Compará cu Proverbio 31:13, 19, 21, 22, 30.

Kico di Rahab su otro profesion? E no tabata simplemente un anfitriona di un posada. No, e Scritura ta identifik’é usando e palabranan hebreo i griego pa denotá un prostituta. Por ehempel, e palabra hebreo zoh·nahʹ semper tin di ber cu relacion ilegal. Incidentalmente, entre e cananeonan prostitucion no tabata un negoshi di mal reputacion.

Jehova su uso di un muher di mal bida ta demostrá su gran misericordia. Aparencia djafó por gaña nos, pero Dios “ta mira loke e curason ta.” (1 Samuel 16:7) P’esei, prostitutanan di curason recto cu ta repentí di nan mal bida por ricibí Jehova Dios su pordon. (Compará cu Mateo 21:23, 31, 32.) Rahab mes a bira for di picá pa un curso hustu cu tin aprobacion divino.

E spionnan israelita a biba segun e Ley di Dios, pues nan no a hospedá n’e cas di Rahab pa motibunan inmoral. Nan motibu por tabata cu nan presencia den cas di un muher di mal bida probablemente lo no a lanta sospecho. Tambe, su posicion riba muraya dje stad lo a facilitá huida. Claramente, ta Jehova a guia nan na un pecador kende su curason a ser afectá asina faborablemente dor di informenan di trato divino cu e israelitanan cu el a repentí i cambia su caminda. E declaracion di Dios cu Israel mester a saca e cananeonan debí na nan prácticanan inmoral, i su bendicion riba Rahab i riba e conkista di Jérico, ta haci cla cu e spionnan no a cometé inmoralidad.—Levítico 18:24-30.

Kico di Rahab su palabranan engañador na persiguidor dje spionnan? Dios a aprobá di su curso. (Compará cu Romano 14:4.) El a tuma un rísico afin di protehá Dios su sirbidornan, dunando evidencia di su fe. Miéntras gañamentu malicioso ta malu den bista di Jehova, un persona no ta obligá pa divulgá informacion corecto na hende cu no ta autorisá pa sa. Asta Jesucristo no a duna detaye completo of contesta directo ora esei por a haci daño innecesario. (Mateo 7:6; 15:1-6; 21:23-27; Juan 7:3-10) Claramente, Rahab su curso di maldirigí e oficialnan enemigu mester ser mirá den tal lus.

Rahab su Recompensa

Con Rahab a ser recompensá pa su ehercisio di fe? Su preservacion durante e destruccion di Jérico siguramente tabata un bendicion di Jehova. Mas despues, el a casa cu Salmon (Salma), yu di Nason, hefe di desierto dje tribu di Huda. Como mayornan di Boaz, un homber piadoso, Salmon i Rahab a forma un coneccion den e liña di desendencia cu a hiba na Rey David di Israel. (1 Crónica 2:3-15; Rut 4:20-22) Mas importante ainda, Rahab, e ex-prostituta, ta un dje único cuater muhernan mencioná den Mateo su genealogia di Jesucristo. (Mateo 1:5, 6) Ki un bendicion di Jehova!

Aunke no un israelita i un tempu un prostituta, Rahab ta un ehempel sobresaliente di un muher kende a proba mediante su obranan cu e tabatin pleno fe den Jehova. (Hebreo 11:30, 31) Mescos cu otronan, algun di cua a bandoná un bida di prostitucion, lo e ricibí un otro recompensa mas—un resureccion for di morto pa bida den un paradijs riba tera. (Lucas 23:43) Debí na su fe compañá cu obra, Rahab a gana e aprobacion di nos Tata celestial amoroso i pordonador. (Salmo 130:3, 4) I siguramente su ehempel excelente ta animá tur amante di husticia pa acudí na Jehova Dios pa bida eterno.

[Picture on page 23]

Rahab a ser declará hustu debí cu su obranan a proba cu e tabatin fe

[Picture on page 24]

Arkeólogonan a descubrí restonan di Jérico di antigua, incluyendo un seccion chikitu di un muraya bieu

[Credit Line]

Pictorial Archive (Near Eastern History) Est.