Referensia pa Material i Tarea pa Reunion Nos Bida i Sirbishi Kristian

1-7 DI NOVÈMBER

TESORO DI E PALABRA DI DIOS | HOSUE 18-19

“Yehova A Distribuí e Tera na un Manera Sabí”

it-2-S 238 §1

Límite

Ta parse ku distribushon di tera entre e tribunan tabata basá riba dos faktor: tiramentu di lòt i e tamaño di e tribu. Probablemente, e lòt tabata determiná mas o ménos unda kada tribu lo a bai, sea nort, zùit, ost òf wèst di e tera, na sabana kant’i laman òf band’i seru. Komo ku e desishon tabata bini di Yehova, esei tabata evitá yalursheit i pleitamentu entre e tribunan. (Pro 16:33) Yehova por a kontrolá e resultado di e tiramentu di lòt. Pues, e por a hasi sigur ku e lugá kaminda kada tribu a ser asigná tabata kuadra ku e profesia ku e patriarka Yakòb a duna riba su kama di morto. Nos ta haña e profesia akí na Génesis 49:1-33.

it-1-S 1120 §2

Herensia

Tera Heredá. E yunan di Israel tabata haña nan herensia for di Yehova, kende a bisa Moises unda e frontera di kada teritorio lo tabata. (Num 34:1-12; Hos 1:4) E yu hòmbernan di Gad, e yu hòmbernan di Ruben i e mitar tribu di Manases a haña nan teritorio for di Moises. (Num 32:33; Hos 14:3) E restu di e tribunan a risibí nan herensia for di Hosue i Eleazar pa medio di tiramentu di lòt. (Hos 14:1, 2) Di akuerdo ku e profesia di Yakòb na Génesis 49:5 i 7, Simeon i Levi no a heredá un teritorio separá meskos ku nan rumannan. E teritorio ku Simeon a heredá (kual tabata inkluí algun stat) tabata den e teritorio di Huda. (Hos 19:1-9) Levi a haña 48 stat ku tabata keda den diferente parti di e teritorio di Israel. Komo ku e levitanan a risibí un asignashon spesial pa sirbi na e santuario, Yehova a bira nan herensia. Nan tabata risibí diesmo komo nan porshon òf herensia a kambio di nan sirbishi. (Num 18:20, 21; 35:6, 7) Famianan tabata haña asignashon denter di e teritorio di nan tribu. Segun ku e famianan tabata krese i e yu hòmbernan tabata haña herensia, e tera tabata ser dividí den parti mas i mas chikitu.

it-2-S 238 §2

Límite

Despues ku nan a determiná e lugá geográfiko di e tribu, a base di e tiramentu di lòt, nan mester a determiná te unda e tera di kada tribu lo tabata. Nan tabata hasi esei a base di e di dos faktor: e tamaño di e tribu. “Boso mester heredá e tera pa medio di lòt segun boso famianan; esnan mas grandi boso mester duna mas herensia i esnan mas chikitu boso mester duna ménos herensia. Kaminda lòt kai pa kada un, esei lo ta di dje. Boso mester heredá konforme e tribunan di boso tatanan.” (Num 33:54) E desishon ku a ser tumá pa medio di lòt enkuanto e lugá geográfiko di e tera no tabata kambia, pero por a hasi ahuste sí na tamaño di e tera ku nan a heredá. Pues, ora e tera ku tabata asigná na e tribu di Huda a resultá di ta muchu grandi, a asigná un parti di e tera ei na e tribu di Simeon.—Hos 19:9.

Hoya Spiritual

it-2-S 238 §5

Límite

E relato di e distribushon di e teritorio wèst di Hordan ta mustra ku a tira lòt promé pa determiná unda e teritorio di e tribu di Huda (Hos 15:1-63), Yosef (Efraim) (Hos 16:1-10) i e mitar tribu di Manases (Hos 17:1-13) lo tabata. Despues a determiná nan límite òf frontera i a numerá e statnan. Despues di esei ta parse ku nan a stòp di dividí e tera pa un tempu, pasobra e kampamentu di Israel a muda di Gilgal pa Silo. (Hos 14:6; 18:1) Beibel no ta menshoná pa kuantu tempu nan a stòp ku e distribushon di e tera, pero eventualmente Hosue a reprendé e shete tribunan ku a resta pasobra nan a tarda pa poderá di e restu di e tera. (Hos 18:2, 3) Tin hopi splikashon dikon e shete tribunan a tarda asina tantu pa konkistá e tera. Algun komentarista a menshoná dos motibu ku por a pone ku e israelitanan no tabata sinti e urgensia pa poderá di e teritorionan ku a keda: (1) E kantidat di botin ku e israelitanan a haña durante nan konkista i (2) e libertat ku nan tabatin komo ku nan no tabata kore peliger ku e kananeonan lo a bin ataká nan. Algu mas ku por a kontribuí na e aktitut di e israelitanan tabata e echo ku nan no tabata ègt dispuesto pa enfrentá e enemigunan fuerte ku a resta den e tera. (Hos 13:1-7) Ademas, kisas nan konosementu di e parti aki di e Tera Primintí no tabata mes tantu ku nan konosementu di e parti ku ya a ser distribuí.

8-14 DI NOVÈMBER

TESORO DI E PALABRA DI DIOS | HOSUE 20-22

“Kiko Nos Por Siña di un Malkomprondementu?”

w08-S 15/11 18 §5

“Sigui Buska Pas”

Kisas algun israelita a pensa ku tabatin sufisiente prueba pa lansa un atake kontra e tribunan na otro banda di Hordan i ku un atake di sorpresa lo a resultá den ménos morto. Sinembargo, en bes di aktua lihé, e tribunan wèst di Hordan a manda algun di nan hendenan pa bai papia tokante e asuntu ku nan rumannan. Nan a puntra nan rumannan: “Ta kiko e akto infiel aki ta ku boso a kometé kontra e Dios di Israel, ku awe boso a bira bai i a stòp di sigui [Yehova]?” En realidat, e tribunan ku a traha e altar no tabata infiel. Pero, kon nan a reakshoná riba e akusashon? Nan a zundra nan rumannan òf nan a keda sin kontestá nan? Nò, e tribunan ku a ser akusá a kontestá na un manera suave, i nan a splika ku e motibu ku nan a traha e altar tabata pa sirbi Yehova. Nan kontesta a protehá nan relashon ku Yehova i a salba bida di hende. Komo ku nan a keda kalmu, nan a resolvé e asuntu i a mantené pas.—Hos. 22:13-34.

Hoya Spiritual

it-1-S 408 §4

Kanan

Aunke ku hopi kananeo a sobrebibí e konkista i no a kai bou di dominio di e israelitanan, tòg nos por bisa ku “SEÑOR a duna Israel henter e tera ku el a hura di duna nan tatanan,” el a duna nan “sosiegu na tur banda” i “ni un di e bon promesanan ku SEÑOR a hasi na e kas di Israel no a faya; tur a keda kumplí.” (Hos 21:43-45) E nashonnan enemigu rònt di e israelitanan no tabata un menasa, pasobra nan tabatin miedu di e israelitanan. Mas promé, Dios a bisa ku lo e kore ku e kananeonan “pokopoko” pa asina e tera no bira desolá i e bestianan di mondi no bira muchu hopi. (Éks 23:2 9, 30; Deu 7:22) Apesar ku e kananeonan tabatin mihó ekipo di guera, inkluso garoshi di heru, ningun di e biahanan ku e israelitanan a pèrdè un bataya no tabata pasobra Yehova no por a kumpli ku su promesa. (Hos 17:16-18; Hue 4:13) En bes di esei, Beibel ta mustra ku e biahanan ku e israelitanan a pèrdè bataya ta pasobra nan tabata infiel.—Num 14:44, 45; Hos 7:1-12.

15-21 DI NOVÈMBER

TESORO DI E PALABRA DI DIOS | HOSUE 23-24

“E Último Konseho Ku Hosue A Duna e Nashon di Israel”

it-1-S 89

Aliansa

E situashon tabata diferente ora Israel a drenta Kanan, e Tera Primintí. Dios Soberano a duna e nashon di Israel henter e tera meskos ku el a primintí nan antepasadonan. Pues, nan lo no a drenta Tera Primintí manera estranhero, i Yehova a bisa nan ku nan no tin mag di sera aliansa ku e nashonnan pagano di e tera. (Éks 23:31-33; 34:11-16) E israelitanan lo mester tabata sumiso solamente na Dios su lei- i statutonan i no na esnan di e nashonnan ku lo a ser saká for di e tera. (Lev 18:3, 4; 20:22-24) Nan a haña spièrtamentu spesífiko pa no sera aliansa matrimonial ku e nashonnan ei. E tipo di aliansanan ei lo no a pone nan djis kasa ku muhé pagano pero nan lo a haña nan den kompania tambe ku e famianan pagano di nan esposa. Ademas, nan lo a ser eksponé na práktika i kustumber di religion falsu. Tur esei lo a hiba na apostasia i lo el a resultá di ta un trampa pa e israelitanan.—Deu 7:2-4; Éks 34:16; Hos 23:12, 13.

13-19 DI DESÈMBER

TESORO DI E PALABRA DI DIOS | HUESNAN 8-9

Hoya Spiritual

it-1-S 763 §6

Efot, I

Aunke Gideon a traha e efot pa kòrda e viktoria ku Yehova a duna Israel i pa duna onor na Yehova, e efot “a bira un trampa pa Gideon i su kas,” pasobra e israelitanan a kometé inmoralidat spiritual ora nan a adorá e efot. (Hue 8:27) Sinembargo, Beibel no ta bisa ku Gideon mes a adorá e efot, al kontrario, Apòstel Pablo a menshoná su nòmber spesífikamente den e ‘nubia grandi’ di sirbidó fiel di Yehova ku a biba promé ku Kristu.—Heb 11:32; 12:1.

20-26 DI DESÈMBER

TESORO DI E PALABRA DI DIOS | HUESNAN 10-12

“Yefta—Un Hòmber Spiritual”

it-2-S 25 §5

Yefta

Yefta, un hòmber di akshon, no a pèrdè tempu pa kuminsá ku su asignashon komo lider. El a manda un mensahe pa e rei di Amon, indikando ku ta Amon tabata esun ku a ataká promé ora el a kita e tera for di e israelitanan. E rei a bisa ku ta Israel a kohe e tera for di Amon. (Hue 11:12, 13) Na e okashon ei, Yefta a demostrá ku e no tabata djis un guerero ku no tabata sa nada. Al kontrario, e tabata un persona ku a studia historia i el a siña kon Dios tabata trata Su pueblo. Yefta a menshoná tres punto pa mustra ku loke Amon a bisa no tabata bèrdat. (1) Israel no a molestiá Amon, Moab ni Edòm. (Hue 11:14-18; Deu 2:9, 19, 37; 2Kr 20:10, 11) (2) E tera no tabata pertenesé na Amon ora e israelitanan a konkist’é. E tera tabata pertenesé na e amoreonan (kananeonan) i Dios a entregá Sehon, nan rei, i su tera den man di e israelitanan. (3) Amon no a kuestioná ku e tera tabata di e israelitanan durante e último 300 añanan; pues, ki motibu bálido nan tin pa hasi esei awor?—Hue 11:19-27.

it-2-S 25 §6

Yefta

Yefta a yega na rais di e problema ora el a mustra ku henter e kos tabatin di haber ku adorashon. El a bisa ku Yehova Dios a duna Israel e tera i pa e motibu ei nan lo no duna ni un pida chikitu di dje na hende ku ta adorá dios falsu. El a yama Kemos e dios di Amon. Algun hende ta pensa ku esaki ta un eror. Pero, aunke Amon su dios ta Milkom, i Kemos tabata un dios di Moab, tur e nashonnan ei tabata adorá hopi dios falsu. Sálomon a asta introdusí e adorashon di Kemos na Israel pa motibu di su esposanan estranhero. (Hue 11:24; 1Re 11:1, 7, 8, 33; 2Re 23:13) Ademas, segun algun eksperto, Kemos por asta nifiká un persona ku ta ‘dominá’ òf ‘konkistá.’ (Wak Gesenius’s Hebrew and Chaldee Lexicon, tradusí na ingles pa S. Tregelles, 1901, pág. 401.) Kisas Yefta a referí na e dios ei komo esun na ken e amonitanan a duna krédito pa ‘dominá’ òf ‘konkistá’ otro hende i tera.

Spiritual Gems

it-2-S 24

Yefta

Yefta, un yu legítimo. E mama di Yefta tabata “un prostituta,” pero esei no ke men ku Yefta tabata un yu di prostitushon òf ku e tabata un yu ilegítimo. Yefta su mama tabata un prostituta promé ku el a bira e di dos kasá di Galaad, meskos ku Rahab un tempu tambe tabata prostituta promé ku el a kasa ku Salmon. (Hue 11:1; Hos 2:1; Mat 1:5) Tin vários prueba ku ta mustra ku Yefta no tabata un yu ilegítimo. Por ehèmpel, su rumannan parti tata, di e promé kasá di Galaad, a kore kuné pa asina nan no mester a kompartí nan herensia kuné. (Hue 11:2) Mas despues, Yefta a bira lider di e hòmbernan di Galaad, entre kua e rumannan parti tata di Yefta tabata esnan mas prominente. (Hue 11:11) Ademas, el a asta ofresé sakrifisio na Dios na e tabernakel. (Hue 11:30, 31) Ningun di e kosnan ei lo no tabata posibel si Yefta tabata un yu ilegítimo, pasobra lei ta bisa spesífikamente: “Ningun hende ku ta yu djafó [òf, yu ilegítimo] no mag drenta e asamblea di SEÑOR; ningun di su desendientenan, ni te na e di dies generashon, no mag drenta e asamblea di SEÑOR.”—Deu 23:2.