Ehud—Un Homber di Fe i Curashi

HOPI aña a pasa desde cu e israelitanan a pone pia pa promé biaha den e Tera Primintí. Moises i su sucesor, Hosué, tabata morto pa hopi tempu. Cu e ausencia di tal hombernan di fe, aprecio pa adoracion puru a cai den otro. E israelitanan asta a cuminsá sirbi e diosnan Baal i e stacanan sagrado.a Como resultado, Jehova a entregá su pueblo den man dje sirionan pa ocho aña. E ora ei e israelitanan a sclama na Dios pa yudansa. Misericordiosamente, el a scucha. Jehova a lanta un hues, Otniel, pa libra Su pueblo.—Huesnan 3:7-11.

E sucesonan aki mester a siña e israelitanan un berdad básico—obedencia na Jehova ta trece bendicion, miéntras cu desobedencia ta resultá den maldicion. (Deuteronomio 11:26-28) Sin embargo, e pueblo di Israel no a siña e les aki. Despues di un periodo di pas di 40 aña, atrobe nan a bandoná adoracion puru.—Huesnan 3:12.

Dominá dor di Moab

E biaha aki Jehova a laga su pueblo cai den man di Rey Eglon di Moab. Bijbel ta describié como “un homber masha gordo.” Cu yudansa di Amon i Amalek, Eglon a atacá Israel i a establecé su palacio den Jérico, “e stad di palma.” Ki un ironia cu e promé stad cananeo pa ser derotá dor di Israel awor a alohá e sede di unu cu a adorá e dios falsu Kémos!b—Huesnan 3:12, 13, 17.

Eglon a oprimí e israelitanan p’e siguiente 18 añanan, evidentemente exigiendo un belasting pisá for di nan. Dor di rekerí impuesto periódico, Moab a fortalecé su mes posicion económico miéntras cu el a agotá Israel su recursonan. Ta di comprendé cu e pueblo di Dios a sclama pa alivio, i un biaha mas Jehova a scucha. El a lanta pa nan un otro salbador—e biaha aki un benjamita yamá Ehud. Pa pone fin n’e tirania di Eglon riba Israel, Ehud a planea pa tuma accion riba e dia dje siguiente pago di impuesto.—Huesnan 3:14, 15.

Pa prepará pa su maniobra intrépido, Ehud a traha un spada di dos fila di un codo largu. Si esaki tabata un codo corticu, e arma tabata rond di 38 centimeter largu. Algun hende lo haña cu esei ta un puñal. Evidentemente no tabatin e parti crusá entre e blet i e man. P’esei, Ehud por a sconde su spada chikitu den e doblánan di su bistí. Ademas, siendo cu Ehud tabata links, e por a faha su spada na su banda drechi—no e lugá usual pa un arma.—Huesnan 3:15, 16.

Ehud su strategia no tabata sin su rísiconan. Por ehempel, kico si e sirbidornan dje rey a listra Ehud pa arma? Si nan no a hacié mes, siguramente nan lo no a laga nan rey su so huntu cu un israelita! Pero si nan a laga Ehud so, haciendo posibel asina p’e mata Eglon, con Ehud lo a scapa? Con leu lo e por a core promé cu Eglon su sirbidornan a descubrí loke a tuma lugá?

Sin duda Ehud a refleccioná riba e detayenan aki, tal bes imaginando un cantidad di resultadonan desastroso. No obstante, el a sigui cu su plan, desplegando curashi i eherciendo fe den Jehova.

Ehud Ta Topa Eglon

E dia pa presentá e siguiente impuesto a yega. Ehud i su hombernan a drenta e palacio dje rey. No a tarda masha cu nan tabata pará dilanti Rey Eglon mes. Pero e ora no a yega ainda pa Ehud atacá. Despues dje presentacion dje impuesto, Ehud a manda e cargadornan di impuesto bai.—Huesnan 3:17, 18.

Pakico Ehud a tarda pa mata Eglon? El a sucumbí na temor? Di ningun manera! Pa efectuá su plan, Ehud tabatin mester di un audiencia privá cu e rey—algu cu nan no a conced’é den e encuentro inicial aki. Ademas, Ehud lo tabatin cu hui rápidamente. Huimentu lo tabata muchu mas fácil pa un homber cu pa henter e compania di cargadornan di impuesto. P’esei, Ehud a spera e tempu oportuno. E bishita breve cerca Eglon a permitié familiarisá su mes cu e areglo dje palacio i pa averiguá e grado dje rey su proteccion.

Despues di a alcansá “e minanan di piedra cu tabata na Gilgal,” Ehud a bandoná su hombernan i a biaha bai bek pa Eglon su palacio. E caná di aproximadamente dos kilometer a duna Ehud un tiki tempu pa pensa tocante su mision i pidi Jehova su bendicion.—Huesnan 3:19.

Ehud Ta Regresá

Aparentemente Ehud a ricibí un bon biní bek den e palacio. Tal bes e impuesto abundante cu el a presentá mas promé a pone Eglon den un bon beis. Por ta cu aunke e bishita inicial tabata breve, el a duna Ehud suficiente oportunidad pa establecé un bon relacion cu e rey. Sea cual sea e caso, Ehud tabata bek den presencia di Eglon.

“Mi tin un palabra secreto pa bo, O rey,” Ehud a bisa. E echo cu el a yega asina leu tabata un indicacion cu Jehova tabata guiand’e. Sin embargo, tabatin un problema. E “palabra secreto” cu Ehud tabatin no por a ser papiá den presencia dje sirbidornan dje rey. Si Jehova tabata di bai intervení, Ehud tabatin mester dje yudansa ei inmediatamente. “Silencio!” e rey a manda. Siendo cu Eglon no tabata kier pa otronan tende e “palabra secreto” aki, el a manda su sirbidornan bai. Imaginá bo Ehud su alivio!—Huesnan 3:19.

Eglon tabata sintá den su cuarto den dak ora Ehud a bini cerca dje i a bisa: “Un palabra di Dios mi tin pa bo.” Dor di mencioná “Dios,” Ehud tabata refiriendo na Kémos? Kisas Eglon a pensa asina. Intrigá, el a lanta su curpa pisá for di su trono i a para ansioso pa tende. Ehud a hala cerca, probablemente moviendo cuidadosamente pa no pone e rey sospechá un atake. E ora ei, cu un movementu rápido, “Ehud a hinca su man robes [den su bistí] i a coge e spada for di su bel di pia drechi i a hundié den barica di [Eglon]. I e man dje spada tambe a sigui drenta despues dje blet di manera cu e vet a cera riba e blet, pasobra e no a saca e spada for di su barica, i e materia fecal a cuminsá sali.”—Huesnan 3:20-22.

Estando den cercania, e sirbidornan dje rey no a move. Pero ainda Ehud tabata den peliger. Cualkier momento Eglon su sirbidornan por a basha bin paden i descubrí e cadaver di nan rey matá. Ehud tabatin cu bai lihé for di ei! Cerando e portanan na lok, el a hui pasando dor dje buracu di aire dje cuarto den dak.—Huesnan 3:23, 24a.

Descubrimentu i Derota

Pronto Eglon su sirbidornan a bira curioso. Sin embargo, nan no kier a risca desagradá e rey dor di interumpí su reunion privá. Despues nan a ripará cu e portanan dje cuarto den dak tabata na lok. “E ta haciendo su necesidad den e kamber frescu interior,” nan a razoná. Sin embargo, segun cu tempu tabata pasa, simpel curiosidad a cambia bira un ola di ansiedad. Eglon su sirbidornan no por a warda mas. “Cu esaki nan a coge e yabi i a habri [e portanan dje cuarto den dak], i, mira! nan señor tabata bentá abou na tera, morto!”—Huesnan 3:24b, 25.

Miéntras tantu, Ehud a hui. El a pasa e minanan di piedra na Gilgal i finalmente a alcansá Seira, un lugá den e region di ceru di Efraim. Ehud a yama e hombernan di Israel huntu i a guia nan den un atake uní riba e moabitanan. E relato ta conta cu “nan a pasa na deribá Moab, rond di dies mil homber, cada unu robusto i cada unu un homber balente; i ni sikiera un a scapa.” Cu Moab conkistá, e tera di Israel no tabatin mas disturbio pa 80 aña.—Huesnan 3:26-30.

Siñando for di Ehud Su Ehempel

Fe den Dios a motivá Ehud. Hebreonan capítulo 11 no ta mencion’é specíficamente como un “cu pa medio di fe a derotá reinonan den conflicto, . . . a bira balente den guera, a pone ehércitonan di stranhero na careda.” (Hebreonan 11:33, 34) No obstante, Jehova a apoyá Ehud segun cu el a actua den fe i a libra Israel for di Rey Eglon su poder tiránico.

Curashi tabata un di Ehud su cualidadnan. E mester tabatin curashi pa manehá un spada literal eficasmente. Como sirbidornan di Dios dje tempu actual, nos no ta hisa un spada asina. (Isaías 2:4; Mateo 26:52) Sin embargo, sí nos ta haci uso di “e spada di spiritu,” e Palabra di Dios. (Efesionan 6:17) Ehud tabata experto den uso di su arma. Nos tambe tin cu ser ábil den usa e Palabra di Dios segun cu nos ta predicá e bon nobo dje Reino. (Mateo 24:14) Studio personal di Bijbel, presencia regular na reunionnan cristian, participacion celoso den e ministerio, i confiansa den nos Tata celestial huntu cu oracion lo yuda nos imitá e cualidadnan cu Ehud, berdaderamente un homber di fe i curashi, a desplegá.

[Nota]

[Plachi na página 31]

Ehud i su hombernan a presentá impuesto na Rey Eglon

[Rekonosementu]

Reproducí for di Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s