Husticia Ta Elevá un Nacion

DESPUES di dianan di yobida, ta ki un placer pa lanta mainta i mira solo briya den un cielu sin nubia! E tera a ser refrescá, i awor e vegetacion por crece abundantemente. Un biaha Jehova Dios a usa un cuadro asina pa ilustrá e bendicionnan di gobernacion hustu. Na Rey David el a bisa: “Ora esun cu ta goberná riba humanidad ta hustu, gobernando den e temor di Dios, e ora ei esei ta manera e lus di mainta, ora solo ta briya, un mainta sin nubia. For dje resplandor, for di e awaceru, tin yerba procedente dje tera.”—2 Samuel 23:3, 4.

E palabranan di Dios a resultá cierto durante e gobernacion hustu di David su yu, Rey Sálomon. Bijbel ta informá: “Huda i Israel a sigui biba den siguridad, cada un bou di su mes palu di wijndruif i bou di su mes palu di figu, for di Dan te Beer-seba, tur e dianan di Sálomon.”—1 Reynan 4:25.

Israel di antigwedad tabata e nacion scogí di Dios. El a duna nan su leynan i a bisa nan cu si nan a obedecé su bos, lo el a pone nan “na haltu ariba tur otro nacion dje tera.” (Deuteronomio 28:1) No tabata Israel su propio husticia sino Jehova su husticia cu a elevá nan. E mandamentunan cu Dios a duna nan tabata hopi superior cu e leynan dje nacionnan rond di nan. Como pueblo, nan tabata mes imperfecto cu tur e nacionnan ei. P’esei, e echo cu nan a ser elevá riba e nacionnan mester ser atribuí na Jehova su Ley superior i nan pegamentu estricto na dje. Ora nan a obedecé Jehova su leynan, nan a disfrutá di su fabor i bendicion. Rey Sálomon a experenciá esaki durante su reinado. E por a bisa: “Husticia ta loke ta elevá un nacion, pero,” el a spierta, “picá ta algu bergonsoso pa gruponan nacional.”—Proverbionan 14:34.

Lamentablemente, dor di frecuente actonan di desobedencia, e nacion di Israel a cai den un condicion degradá. Nan a sufri bergwensa nacional. Esaki cu tempu a hiba na nan rechaso permanente na fabor di un nacion spiritual nobo.—Mateo 21:43.

Israel Spiritual

Na un reunion dje cuerpo gobernante cristian den Jerusalem, Santiago, nacé como hudiu, a bisa bou di inspiracion cu Dios a “dirigí su atencion n’e nacionnan pa saca for di nan un pueblo pa su nomber.” (Echonan 15:14) Apostel Pablo a yama e nacion cristian nobo aki “e Israel di Dios.” (Galationan 6:16) En cuanto e propósito di nan yamamentu, Pedro a skirbi: “Boso ta ‘un rasa scogí, un sacerdocio real, un nacion santu, un pueblo pa un posesion special, pa boso declará na tur parti e excelencianan’ di esun cu a yama boso for di scuridad na su lus maraviyoso.” (1 Pedro 2:9) Como pueblo scogí di Dios, nan mester a briya como iluminadornan den e mundu. Jehova su husticia lo a pone nan na haltu.—Filipensenan 2:15.

E seleccion dje israelitanan spiritual aki por ser compará cu mina diamanta. Ora piedra (erts) ricu na diamanta ser trecé na superficie, kisas e ta producí solamente 1 karat (200 miligram) pa cada 3 ton di tera. Un método cu nan a usa un tempu pa separá e diamanta a encerá mescla e piedra cu awa i basha e mescla riba mesanan di gris. Diamanta ta rechasá awa, i e diamantanan tabata keda pegá n’e gris miéntras e material no-deseá tabata laba bai. Den e fase aki e diamantanan tabata grof. Sin embargo, despues di ser cortá i di ‘polish,’ nan a reflehá lus den tur direccion.

Mescos cu diamanta ta rechasá awa i no ta parti dje materia rond di dje, asina Jehova su pueblo a ser separá for dje mundu. (Juan 17:16) Ora cu na principio nan a ser atraí n’e lus, kisas nan tabata falta briyo. Pero Jehova su Palabra i spiritu ta crea den nan un personalidad nobo, i nan ta briya como iluminadornan den e mundu aki. Ta debí na Jehova su husticia cu nan ta ser poné na haltu i ta reflehá e glorioso lus di berdad di Reino den tur direccion, no debí na nan mes husticia.

Sin embargo, for dje parti final dje promé siglo E.C., apostasia a gatia drenta den e congregacionnan i a afectá hopi hende. Asina yamá cristiannan a bira integrá cu e nacionnan dje mundu i no por a ser distinguí for dje mundu rond di nan.

Awe un resto fiel di israelita spiritual a ser restorá na Jehova su fabor. Nan a separá nan mes for dje mundu i a limpia nan mes “di tur contaminacion di carni i spiritu.” (2 Corintionan 7:1) Siendo limpi i recto dilanti Jehova, nan ta sostené su husticia. Esaki a elevá nan na un posicion haltu di fabor riba e nacionnan dje mundu. Pa medio di nan predicacion celoso dje bon nobo di Reino, un multitud grandi internacional a ser atraé na Jehova i a bira parti di su pueblo.—Revelacion 7:9, 10.

E Mundu Por Mira e Diferencia

Autoridadnan di mundu sa elogiá e conducta di Dios su sirbidornan. Algun tempu pasá, e alto oficial di siguridad dje Area di Exhibicion di Pretoria, Sur Africa, a comentá riba e conducta di Testigonan di Jehova, di tur rasa, kendenan ta usa e localidadnan ei pa nan congresonan anual. Entre otro cosnan, el a skirbi: “Tur hende tabata i ta cortes, hende papiando nechi cu otro, e actitud desplegá e último par di dia—tur ta duna testimonio dje caliber dje miembronan di boso sociedad, i cu tur ta biba huntu manera un solo famia felis.”

Jehova su pueblo por contribuí n’e husticia di su nacion no solamente na reunionnan grandi asina sino tambe den nan bida privá. Por ehempel, e sucursal surafricano dje Sociedad Watch Tower a ricibí un carta for di un señora di Johannesburg, bisando: “Siman pasá mi a core bai cu mi cartera riba dak di mi auto. El a cai abou den Jan Smuts Avenue i a ser recogé huntu cu tur su contenido dor di un miembro di boso congregacion, Sr. R—, kende a yama na telefon i a debolb’é na mi. . . . Mi ta apreciá mashá e onestidad aki cu a bira un cualidad masha scars den e tempu aki i mi ta encomendá boso congregacion pa a establecé e principionan cu boso miembronan ta pega na dje.”

Sí, dor di pega na Jehova su principionan hustu, su pueblo ta resaltá como diferente for dje mundu. Pa motibu cu esakinan ta manifestá Jehova su husticia, esnan di curason onrado ta ser atraí n’e congregacion cristian. Ta natural pa ser atraí na algu limpi i puru. Por ehempel, un biaha un persona desconocí a bini na un reunion di Testigonan di Jehova na Zúrich, Suisa, i a bisa cu e kier a bira miembro dje congregacion. El a splica cu su ruman muher a ser scomulgá debí na inmoralidad i a agregá cu e kier a djoin un organisacion cu “no ta tolerá mal conducta.” Asta e New Catholic Encyclopedia ta reconocé cu Testigonan di Jehova ta conocí como “un dje gruponan cu mihó comportacion den e mundu.”

Miéntras husticia ta elevá, picá por trece bergwensa riba un persona su bon nomber, specialmente si malecho serio ta bira conocí den e comunidad. Algun biaha e congregacion cristian tin cu carga e bergwensa cu a ser montoná riba dje ora miembronan individual cometé picá grave. Comprendiblemente, e miembronan fiel dje congregacion por defendé e bon nomber dje congregacion dor di mustra cu e malechor a ser disipliná na un manera misericordioso, esta, na armonia cu principionan bíblico. Si un persona ta practicá picá i no ta repentí, lo e ser sacá for dje congregacion—scomulgá.—1 Corintionan 5:9-13.

Pakico Algun Ta Ser Scomulgá?

Aunke algun miles di persona ta ser scomulgá for dje congregacion cristian cada aña, esei ta solamente un porcentahe chikitu dje casi cincu miyon Testigonan na mundu. Pakico mester tuma un paso asina drástico contra cualkier persona den e congregacion cristian? E caracter dje malecho ta un dje factornan determinante. Pero un factor mas importante ta si e malechor ta berdaderamente repentí dje malecho serio cu el a cometé. Si e ta berdaderamente repentí di curason, si el a acudí na Jehova den oracion sincero, rogando su pordon p’e picá cometé contra Dje, i a busca e yudansa dje hombernan responsabel den e congregacion, e por ser yudá pa recobrá e fabor di Dios i keda como parti dje congregacion.—Proverbionan 28:13; Santiago 5:14, 15.

Ora un yu cu tin un relacion bon i saludabel cu su tata haci algu cu ta duel e tata, tur dos mester ta lihé pa restorá e relacion precioso ei. Di igual manera, ora nos dedicá nos bida na Jehova, nos ta drenta den un relacion preciosísimo cuné. P’esei, ora nos haci algu cu ta hacié tristu, nos mester actua lihé pa busca manera di restorá e relacion ei cu nos Tata Celestial.

Felismente, algun cu tabata scomulgá a tuma e ilustracion dje yu perdí na pechu. Ei Jehova ta ser compará cu un Tata amoroso cla pa ricibí bek un pecador repentí si e bira bek i busca Dios su pordon. (Lucas 15:11-24) Repentimentu berdadero i di curason i alehá for di loke ta malu tabata un manera pa bolbe bek n’e fabor di Jehova i n’e congregacion cristian. Algun malechor repentí cu a sinti nan mes aplastá bou dje carga di nan culpa a ser conmoví pa repentí i dal pasonan pa bolbe bek n’e ambiente amoroso dje congregacion cristian. Asina nan a yega na apreciá Jehova su palabranan na Isaías 57:15.

Pa stroba individuonan di bolbe na Jehova su cuido amoroso, Satanas lo kier pretendé cu no tin pordon pa picánan cu a ser cometé. Pero e sacrificio di rescate di Cristo Jesus ta adecuá pa cubri e picánan di ken cu repentí—sí, asta e picá heredá di “henter e mundu.” (1 Juan 2:1, 2) E único picá cu no ta ser cubrí p’e rescate ta picá contra Dios su spiritu santu, cu ta ekivalente na rebelion deliberá contra e obramentu di Dios su spiritu, manera e picánan grave di Hudas Iscariot i hopi escriba i fariseo.—Mateo 12:24, 31, 32; 23:13, 33; Juan 17:12.

Sosteniendo Jehova Su Husticia

Desde cu e resto di israelita spiritual a ser restorá na Jehova su fabor na 1919, nan a bira mas i mas elevá for dje mundu rond di nan. Esaki no ta debí na ningun bondad di nan parti sino debí na nan sumision boluntario na Jehova su leynan i normanan. Como resultado, miyones di “otro carné” di Cristo a ser atraí den asociacion cu Israel spiritual como compañeronan leal. (Juan 10:16) E hendenan aki ta trece gloria i onor na Jehova den un mundu cu ta hopi alehá for di Dios su normanan hustu. Ta manera e revista surafricano Personality a observá un biaha: “Testigonan di Jehova ta parce di tin bon cualidadnan na abundancia i casi no tin ningun mal cualidad.”

Pa mantené e posicion elevá aki den un mundu malbado, cada miembro individual dje congregacion cristian tin cu hiba un bida limpi i recto dilanti Jehova. Den Bijbel, Jehova su organisacion celestial ta ser representá pa cosnan limpi. E ta ser mirá como un muher bunita, bistí cu solo i teniendo luna bou di su pia. (Revelacion 12:1) E Jerusalem Nobo ta ser describí como un stad santu, bunita na aparencia. (Revelacion 21:2) E miembronan fiel dje bruid di Cristo ta ricibí “linen briyante, limpi i fini.” (Revelacion 19:8) Esnan dje multitud grandi ta ser mirá “bistí cu paña largu blancu.” (Revelacion 7:9) Hende incliná na husticia ta ser atraí na un organisacion limpi. Na contraste, Satanas su organisacion ta impuru. Su sistema religioso ta ser representá como un muher di mala bida, i esnan pafó dje stad santu ta ser describí como sushi i impuru.—Revelacion 17:1; 22:15.

Bida eterno ta ser primintí na esnan hustu. E pueblo congregá cu ta sostené Jehova su husticia tin e prospecto di sobrebibí e fin dje sistema di cosnan aki. “Esun cu ta scuchá mi . . . lo biba den siguridad i lo ta liber di disturbio debí na temor pa calamidad,” Dios ta primintí na Proverbionan 1:33.

Lo ta ki un goso ora e Sálomon Mayor, Cristo Jesus, ta goberná riba e mundu nobo ei den husticia, den e temor di Jehova! (2 Pedro 3:13) Lo ta manera e lus di mainta ora solo ta briya, un mainta sin nubia. Tur e habitantenan dje tera lo biba den siguridad, cada un sintá bou di su mes palu di wijndruif i di figu, na moda di papia. Sociedad humano hustu lo haci e tera bunita i lo ocupá su debido lugá den e universo p’e gloria eterno di nos Dios, Jehova.—Mikéas 4:3, 4; mira tambe Isaías 65:17-19, 25.

[Plachi Rekonosementu na página 26]

Garo Nalbandian