Ken Por Pronostiká Futuro?

Nos tur ta pensa riba futuro. Nos tur ta puntra nos mes kon nos futuro i esun di nos sernan kerí lo ta: ‘Mi yunan lo biba den un mihó mundu? Un desaster natural lo destruí e tera akí? Tin algu ku mi por hasi aworakí pa mi por tin un mihó futuro?’ Ta normal ku nos ta deseá trankilidat, siguridat i stabilidat. I si nos haña sa kiko lo pasa den futuro, nos por prepará nos mes pa esei.

Pues, ta kon nos futuro lo ta? Ken por sa esei? Algun pronóstiko ku profeshonalnan a hasi tokante futuro a kumpli, pero mayoria no. Di otro banda, hende ta bisa ku Dios sí por profetisá eksaktamente loke lo sosodé den futuro. E mes a bisa den su Palabra ku e “ta deklará e fin for di prinsipio, i for di tempunan antiguo, kosnan ku no a wòrdu hasí ainda.” (Isaías 46:10) Pero loke Dios a profetisá semper a kumpli?

TUR E PROFESIANAN DI DIOS A KUMPLI?

Dikon nos mester ta interesá pa sa kuantu di e profesianan ku Dios a duna den antigwedat a kumpli? Wèl, si tur dia un meteorólogo su pronóstiko di tempu kumpli ku eksaktitut pa un periodo basta largu, kasi sigur lo bo presta atenshon na su pronóstiko di tempu pa mañan, no ta bèrdat? Meskos tambe, si bo haña sa ku loke Dios a profetisá a kumpli ku eksaktitut, siguramente lo bo ta interesá pa sa kiko e ta profetisá tokante bo futuro.

DESTRUKSHON DI UN STAT GRANDI:

Por ehèmpel, ta algu masha sobresaliente si un persona por profetisá ku eksaktitut ku un stat ku ta poderoso pa hopi siglo lo ser destruí. Esei ta eksaktamente loke Dios a profetisá mediante un di su profetanan: e destrukshon di Nínive. (Sofonías 2:13-15) Kiko historiadónan ta bisa? Den siglo 7 promé ku Kristu, probablemente un 15 aña despues ku Dios a profetisá tokante e destrukshon di Nínive, e babilonionan i e medonan a ataká Nínive i a derot’é. Ademas, Dios a profetisá di antemano ku e lo hasi “Nínive un lugá inhabitá, seku manera un desierto.” (BPK) Pero, esaki a kumpli ku eksaktitut? Sí, maske e stat ei i e áreanan habitá rònt di dje a kubri un 518 kilometer kuadrá, e hendenan ku a konkist’é no a konserbá e stat pa nan mes. Al kontrali, nan a destruyé. Akaso un analista polítiko lo por a pronostiká esei ku eksaktitut?

WESU DI HENDE LO SER KIMÁ:

Ta ken lo tin asina tantu kurashi pa anunsiá, 300 aña di antemano, nòmber di un hòmber ku lo kima wesu di hende riba un altar, ken su antepasadonan lo ta i tambe e nòmber di e stat kaminda e altar lo ta? No tin duda ku si e profesia interesante ei kumpli, e profeta ei lo bira famoso. Un bosero di Dios a anunsiá ku “un yu hòmber lo nase pa e kas di David, Yosías ta su nòmber” i ku e lo ‘kima wesu di hende’ riba un altar den e stat Bèt-èl. (1 Reinan 13:1, 2) Mas o ménos tres siglo despues, Rei Yosías—kende su nòmber no tabata komun den e tempu ei—a bini for di e liña di desendensia di David. Sí, nèt manera Yehova a profetisá, Yosías “a manda saka e wesunan for di e grafnan i a kima nan riba e altar” na Bèt-èl. (2 Reinan 23:14-16) Bo ta kere ku un hende por a profetisá detayenan asina spesífiko sin e guia di un ser superior?

FIN DI UN IMPERIO:

Lo ta algu masha asombroso pa un hende anunsiá di antemano e nòmber di un hòmber, hopi tempu promé ku e nase, ku lo plania pa konkistá un nashon poderoso i asta indiká ki strategia remarkabel e lo usa. Dios a profetisá ku un hòmber ku yama Siro lo lansa un atake kontra un nashon, ku e hòmber akí lo libra e hudiunan for di sklabitut i ku lo e apoyá e renobashon di nan tèmpel santu. Ademas, Dios a profetisá ku Siro su strategia di bataya lo enserá ku Siro lo seka e riunan i ku e portanan di e stat lo keda habrí, loke na su turno, lo hasi konkista di e stat ei mas fásil. (Isaías 44:27–45:2) Kon a bai ku tur e detayenan di e profesianan akí? Nan a kumpli ku eksaktitut? Historiadónan ta konfirmá ku Siro di bèrdat a konkistá e stat. Siro su ehérsito a desviá e awanan di Riu Eufrates di Babilonia i asina e nivel di riu a baha; p’esei, den un sentido por bisa ku e riu a seka. Ki un hazaña espektakular! Ademas, e ehérsito a drenta e stat via di e portanan ku a keda habrí. Asina Siro a libra e hudiunan i a ordená nan pa bai i renobá nan tèmpel na Herúsalèm. Esei no tabata algu normal pasobra Siro no tabata un sirbidó di e Dios di e hudiunan. (Èsdras 1:1-3) Ta Dios so por a profetisá tur detaye di e suseso históriko ei ku a tuma lugá.

Tur e tres ehèmpelnan akí ta mustra ku loke Dios a profetisá a kumpli. No ta trata simplemente di algun eksepshon. Ora e lider hudiu Hosue tabata papia ku e pueblo di Israel, el a bisa nan loke nan tabata sa bon bon. El a bisa: “Boso sa di henter boso kurason i di henter boso alma ku ni un palabra di tur e bon palabranan ku SEÑOR boso Dios a papia tokante di boso no a faya; tur a keda kumplí pa boso, ni un di nan no a faya.” (Hosue 23:1, 2, 14) E pueblo ei no por a nenga ku tur e profesianan i promesanan di Dios a kumpli. Pero ta kon Dios ta hasi esei? Tin un gran diferensia entre Dios su manera di hasi algu i e manera ku hende ta hasié. Ta importante pa sa esei, pasobra Dios a profetisá kosnan maravioso pa futuro ku sin duda lo tin efekto tambe riba bo bida.

PROFESIANAN DI DIOS VERSUS PRONÓSTIKO DI HENDE

Hopi biaha hende ta pronostiká algu basá riba investigashon sientífiko, análisis di dato- i tendensianan, i tin biaha asta riba deklarashonnan di hende ku ta bisa ku nan tin konosementu sobrenatural. Ora hende kaba di hasi un pronóstiko, por lo general nan ta sinta warda pa wak kiko lo sosodé.—Proverbionan 27:1.

Di otro banda, Dios sí sa tur kos. E konosé hende ‘door en door,’ ku tur su inklinashonnan. P’esei, ora Dios ta deseá, e por mira di antemano eksaktamente kon un hende òf henter un nashon lo reakshoná. Pero no ta esei so Dios por hasi. E por asta influensiá i kambia suseso, desishon i tendensia pa logra e resultado deseá. Dios mes a bisa: “E palabra fo’i mi boka . . . no ta bolbe serka Mi sin a logra su meta . . . i alkansá e meta ku Mi a pone p’e.” (Isaías 55:11, BPK) Pues, den un sentido, algun di Dios su profesianan ta djis anunsiá loke e ta bai hasi den futuro. I e ta sòru pa tur loke e profetisá kumpli sigur.

BO FUTURO

Tin un fuente konfiabel ku bo por akudí na dje pa haña sa kiko lo pasa ku bo i ku bo sernan kerí den futuro? Si bo haña sa di antemano ku un orkan ta na kaminda, lo bo tuma medida pa skapa bo bida, no ta bèrdat? Bo por hasi meskos den kaso di profesianan di Beibel. Dios a profetisá ku pronto kambionan grandi lo tuma lugá rònt mundu. (Mira e kuadro “Loke Dios A Revelá Tokante Futuro.”) E futuro ku Dios a primintí ta kompletamente diferente for di loke e asina yamá ekspertonan ta pronostiká.

Den Beibel tin hopi profesia ku ta bisa nos loke lo sosodé ku humanidat den futuro, i nos por haña sa esei, pasobra Dios mes a bisa: “Fo’i kuminsamentu ya Mi ta anunsiá e fin . . . T’Ami t’Esun ku ta bisa: ‘Mi desishon ta irevokabel; mi boluntat ta lei.’” (Isaías 46:10, BPK) Abo ku bo famia por tin un futuro briante. Bo ke sa mas tokante e futuro ei? Pidi Testigunan di Yehova pa mustra bo loke Beibel ta bisa tokante susesonan ku lo tuma lugá den futuro. Testigunan di Yehova no ta klarividente, nan no ta pretendé di tende stèm for di mundu di spiritu ni nan no tin don spesial pa pronostiká loke lo sosodé. Pero komo ku nan ta studia Beibel, nan por kompartí ku bo tur e bon kosnan ku Dios lo hasi den futuro.