Un Palu Ku Nan A Kap Por Bolbe Sprùit?

UN PALU di oleifi—ku su tronkon tur doblá i trosí—no ta parse masha impreshonante si kompar’é ku e mahestuoso seder di Líbano. Ma palu di oleifi ta masha resistente i tin e karakterístika remarkabel di por sobrebibí tur tipo di wer. Segun kálkulo, tin di e palunan ei ta 1.000 aña bieu! E raisnan ekstenso di e palu di oleifi ta pone ku e por rebibá asta ora ku nan kaba ku e tronkon. Tanten ku e raisnan ta bibu, lo e sprùit di nobo.

Patriarka Yòb tabata konvensí ku asta si e mester muri, lo e bolbe biba. (Yòb 14:13-15) El a usa un palu—kisas un palu di oleifi—pa ilustrá su konfiansa den e kapasidat di Dios pa lant’é for di morto. Yòb a bisa: “Pa un palu tin speransa, ku ora e wòrdu gekap, e lo sprùit di nobo.” Ora áwaseru kai despues di un temporada di sekura severo, e tronkon seku di un palu di oleifi por biba bèk, ya ku for di su rais e ta “saka sprùit manera un planchi.”—Yòb 14:7-9.

Meskos ku un kunukero ta anhelá pa mira e raisnan di un palu di oleifi ku nan a kap bolbe sprùit, asina tambe Yehova Dios ta anhelá di resusitá su sirbidónan i hopi hende mas ku a fayesé. (Mat. 22:31, 32; Huan 5:28, 29; Echo. 24:15) Esta dushi lo ta pa yama e mortonan bon biní i mira nan disfrutá di un bida produktivo atrobe!