“Scudriñámi Completamente, O Dios”

“Scudriñámi completamente, O Dios, i conoce mi curazón. . . . Guiámi den e camina di tempo indefinitivo.”—SALMO 139:23, 24.

NOS tur ta gusta pa hende entendido trata cu nos, hende cu ta tuma na cuenta nos circunstancia, hende cu ta yuda ora nos ta haci equibocacion, hende cu no ta exigi mas di nos cu nos por haci. Asina Jehova Dios ta trata cu sirbidor di dje. Salmo 103:14 ta bisa: “E mes ta wel conoce e formacion di nos, cordando cu nos ta stof.” I Jesucristo, cu ta refleha su Tata perfectamente, ta extende e invitacion caloroso: “Bini cerca mi, boso tur cu ta afaná i cargá, i lo mi refresca boso. Tuma mi yugo riba boso [of, “Drenta bao di mi yugo cu mi,” nota] i siña di mi, pasobra mi ta di genio suave i humilde di curazón, i boso lo haya refrescamento pa boso alma. Pasobra mi yugo ta suave i mi carga ta lihé.”—Mateo 11:28-30.

² E punto di bista di Jehova di su sirbidornan hopi bez ta diferente cu esun di hende. E ta mira asuntonan desde un otro punto di bista i ta tuma na cuenta aspecto di locual otro persona no sa nada. Ora Jesucristo a camna riba tera, “hende a desprecié i a evité.” Hende cu no a pone fe den dje como Mesiás “a consideré di ningun balor.” (Isaías 53:3; Lucas 23:18-21) Sin embargo, den e bista di Dios, e tabata “Yiu [di Dios], esun stimá,” na locual e Tata a bisa: “Mi a aprobábo.” (Lucas 3:22; 1 Pedro 2:4) Tin hende den sigidor di Jesucristo cu mundo ta despreciá pasobra nan ta pober materialmente i ta wanta hopi tribulacion. Sin embargo, den e bista di Jehova i di su Yiu, tal hende por ta ricu. (Romano 8:35-39; Revelacion 2:9) Pakico tin un diferencia den punto di bista asina?

³ Jeremías 11:20 ta contestá: “Jehova . . . ta examina riñón i curazón.” E ta mira loke nos tá padén, asta tal aspecto di nos personalidad cu ta scondí for di bista di otronan. Den su examinacion, e ta duna énfasis primario na calidad i condicionan cu ta vital pa un bon relacion cuné, esnan cu ta mas eternamente beneficioso pa nos. Ta animador pa nos sa esei; calmante també. Siendo cu Jehova Dios ta presta atencion na loke nos tá padén, ta importante pa nos examina loke nos tá padén pa nos resulta di ser e sorto di hende cu e kier den su mundo nobo. Su Palabra ta yúdanos haci tal examinacion.—Hebreo 4:12, 13.

Ki precioso ta e pensamento di Dios!

⁴ Despues di a medita riba e hanchura i profundidad dje conocimento di Dios di su sirbidornan, i també riba e capacidad extraordinario di Dios pa percura cualkier yudanza cu nan por falta, salmista David a skirbi: “P’sei, ki precioso bo pensamento tá pa mi!” (Salmo 139:17a) Tal pensamento, revelá den su Palabra skirbí, ta hopi mas halto cu cualkier pensamento di hende, apesar di ki briyante nan idea por tá. (Isaías 55:8, 9) Pensamento di Dios ta yúdanos dirigi nos atencion na cos realmente importante den bida i pa ser celoso den su sirbishi. (Filipense 1:9-11) Nan ta mústranos con pa considera cosnan manera Dios ta haci. Nan ta yúdanos keda onrado cu nos mes, pa admiti onradamente na nos mes ki sorto di hende nos berdaderamente tá den nos curazón. Bo ta dispuesto pa haci esei?

⁵ Hende ta keda incliná di duna mucho énfasis na aparencia externo, pero e Scritura ta consehános: “Mas cu tur lo demás cu tin cu ser protehá, protehá bo curazón.” (Proverbio 4:23) Tanto cu su ley como cu ehempel, e Bijbel ta yúdanos haci esei. E ta bísanos cu Caín a sigi rutina di ofrece sacrificio na Dios pero den su curazón el a carga rencor, anto odio, pa cu su ruman Abel. I e Bijbel ta urgínos di no ser manera é. (Génesis 4:3-5; 1 Juan 3:11, 12) E ta contene e registro di requisito dje Ley di Moisés di obedencia. Pero també e ta enfatizá cu e requisito principal dje Ley tá cu hende cu ta adora Jehova Dios mester stimé cu tur nan curazón, mente, alma, i forza; i e ta bisa cu e sigiente mandamento den importancia tabata pa nan stima nan próhimo mescos cu nan mes.—Deuteronomio 5:32, 33; Marco 12:28-31.

⁶ Den Proverbio 3:1 nos ta ser urgí pa no simplemente warda mandamento di Dios sino keda sigur cu tal obedencia ta un expresion di loke ta berdaderamente den nos curazón. Individualmente, nos tin cu puntra nos mes: ‘Esei ta cierto di mi obedencia na requisito di Dios?’ Si nos ta realiza cu den algun asunto tin falta den nos motivacion of pensamento—i ningun di nos por bisa cu nos ta sin falta—anto nos tin cu puntra: ‘Kico mi ta haci pa mehora e situacion?’—Proverbio 20:9; 1 Juan 1:8.

⁷ Ora fariseo hudío a pretende di onra Dios mientras cu maña nan a promove costumber motivá pa interés propio, Jesús a denunciánan como hipócrita i a mustra cu nan adoracion tabata en bano. (Mateo 15:3-9) Jesús també a duna e advertencia di cu pa agrada Dios, cu ta mira e curazón, no ta basta pa hiba un bida aparentemente moral mientras cu nos també ta persisti di pensa pensamento inmoral afin di experimenta placer apasioná. Kizás nos tin cu dal paso drástico pa disipliná nos mente i curazón. (Proverbio 23:12; Mateo 5:27-29) Tal disiplina ta necesario també, si como resultado di nos trabao seglar, nos meta di educacion, of nos scogimento di diverticion, nos ta bira imitador di mundo, lagando mundo moldeános conforme cu su normanan. Láganos nunca lubida cu disípel Santiago a yama “adúltera” hende cu a pretende di pertenece na Dios pero cu a deseá di ser amigo di mundo. Pakico? Pasobra “tur e mundo ta bao di poder dje malbado.”—Santiago 4:4; 1 Juan 2:15-17; 5:19.

⁸ Pa nos probechá plenamente di pensamento di Dios riba esei i otro asuntonan, nos tin cu dedica tempo pa lézanan of scúchanan. Mas ainda, nos tin cu stúdianan, papia tocante nan, i medita riba nan. Hopi lector di Toren di Vigilancia ta asisti regularmente na reunion di congregacion di Testigo di Jehova, unda nan ta considera e Bijbel. Nan ta cumpra tempo for di otro interés pa nan haci esei. (Efesio 5:15-17) I loke nan ta recibi en buelta tin hopi mas balor cu riqueza material. Bo no ta sintíbo mescos?

⁹ Sin embargo, algun hende cu ta asisti na tal reunion ta haci progreso spiritual mas lihé cu otronan. Nan ta aplica e berdad mas cabalmente den nan bida. Kico ta responsabel pa esei? Frecuentemente, un factor principal ta nan diligencia den estudio personal. Nan ta comprende cu nos no ta biba di pan so; alimento spiritual tur dia ta tanto importante como comemento di cuminda fisical regularmente. (Mateo 4:4; Hebreo 5:14) P’sei nan ta haci esfuerzo pa dedica por lo menos algun tempo tur dia na lezamento di Bijbel of publicacion cu ta splica e Bijbel. Nan ta prepara pa reunion di congregacion, studiando les di antemano i buscando texto bíblico. Nan ta haci mas cu leza e informacion; nan ta medita riba dje. Nan costumber di studiá ta inclui pensamento serio riba efecto cu loke nan ta siña mester tene riba nan mes bida. Segun cu nan spiritualidad ta crece, nan ta yega di síntinan mescos cu e salmista cu a skirbi: “Cuanto mi ta stima bo ley! . . . Bo recordatorionan ta maraviyoso.”—Salmo 1:1-3; 119:97, 129.

¹⁰ Sea cu nos a studia e Palabra di Dios pa un aña, pa 5 aña, of pa 50 aña, e nunca ta bira simplemente un repeticion—no, si e pensamento di Dios ta precioso pa nos. No ta importa cuanto cualkier di nos a siña for dje Scritura, tin hopi mas cu nos no sa. David a bisa: “O Dios, e gran suma di nan ta yega te na cuanto! Si mi ta purba di cóntanan, nan ta mas hopi cu asta granito di santo.” E pensamento di Dios ta fuera di nos capacidad di conta. Si nos por conta e pensamento di Dios tur e dia largu i pega soño den nos contamento, ora nos ta manece, lo tin hopi mas ainda pa nos pensa. P’sei, David a skirbi: “Mi a keda lantá, i toch mi ta cu bo ainda.” (Salmo 139:17, 18) Pa tur eternidad lo tin mas pa nos siña tocante Jehova i su camina. Nos nunca por yega asina leu cu nos sa tur cos.—Romano 11:33.

Odiando loke Jehova ta odia

¹¹ Nos estudio dje Palabra di Dios no ta simplemente pa yena nos cabez cu informacion. Mientras cu nos ta laga pensamento di Dios penetra nos curazón, nos també ta cuminza sinti e sintimento di Dios. Ki importante esei tá! Si nos no ta desaroya tal sintimento, kico por ta e resultado? Aunque nos por repiti loke e Bijbel ta bisa, sin embargo, nos por considera como deseabel loke ta prohibí, of nos por kere cu requisito di Dios ta un carga pisá. Ta cierto cu aunque nos ta odia loke ta malu, nos por tin cu lucha pa motibo di imperfeccion humano. (Romano 7:15) Pero, si nos no ta haci esfuerzo sincero pa pone loke nos ta padén na armonía cu loke ta bon, nos por spera di agrada Jehova, “e examinador di curazón”?—Proverbio 17:3.

¹² Odio piadoso ta un proteccion fuerte contra malecho, mescos cu amor piadoso ta haci hacimento di loke ta bon un placer. (1 Juan 5:3) Bez tras bez e Scritura ta urgínos pa cultiva tanto amor como odio. “O boso amante di Jehova, odia loke ta malu.” (Salmo 97:10) “Odia intensamente loke ta malu, pega na loke ta bon.” (Romano 12:9) Nos ta haci esei?

¹³ Jehova a declara claramente su propósito di destrui tur hende malbado riba tera i introduci un tera nobo den cua husticia ta biba. (Salmo 37:10, 11; 2 Pedro 3:13) Amante di husticia ta anhela binimento dje dia ei. Nan ta na plena armonía cu salmista David, cu a pidi: “O cu abo, O Dios, lo mata e malbado! E ora ei asta hende culpable di sanger siguramente lo aparta foi mi, locual ta bisa cosnan tocante bo conforme cu nan idea; nan—bo enemigonan—a tuma bo nomber di manera indigno.” (Salmo 139:19, 20) David personalmente no a anhela di mata tal hende malbado. El a pidi pa vinganza bini dje man di Jehova. (Deuteronomio 32:35; Hebreo 10:30) Eseinan no tabata hende cu di algun manera simplemente a ofende David. Nan a haci mal representacion di Dios, tumando su nomber di manera indigno. (Éxodo 20:7) Desonradamente, nan a pretende cu nan tabata sirbié, pero nan a usa su nomber pa promove nan mes idea. David no tabatin amor pa hende cu a decidi di ser enemigo di Dios.

¹⁴ Tin miles di miyones di hende cu no ta conoce Jehova. Hopi di nan den ignorancia ta practica loke e Palabra di Dios ta yama malu. Si nan ta persisti den tal camina, nan lo ser hunto cu esnan cu lo perece durante e tribulacion grandi. Sin embargo, Jehova no ta hiba gusto di morto di hende malbado, nos no mag haci esei tampoco. (Ezekiel 33:11) Tan tempo cu nos por, nos ta haci esfuerzo pa yuda hende asina siña i aplica e camina di Jehova. Pero, con ta para cu hende cu ta manifesta odio intenso pa Jehova?

¹⁵ E salmista a bisa tocante eseinan: “Mi no ta odia esnan cu ta odiábo intensamente, O Jehova, i mi no ta sinti un disgusto pa hende cu ta rebela contra bo? En berdad, mi ta ódianan cu un odio completo. Nan a bira berdadero enemigo di mi.” (Salmo 139:21, 22) Tabata pa motivo cu nan a odia Jehova intensamente cu David a contemplánan cu disgusto. Hende apóstata ta incluí hunto cu hende cu ta manifesta nan odio pa Jehova, rebelando contra dje. Realmente, apostasía ta rebelion contra Jehova. Algun hende apóstata ta bisa cu nan ta conoce Dios i ta sirbié, pero nan ta rechaza e siñanza of requisitonan cu ta para skirbí den su Palabra. Otro hende ta bisa cu nan ta kere e Bijbel, pero nan ta rechaza e organizacion di Jehova i ta purba activamente di stroba su trabao. Ora nan expresamente ta scoge tal maldad despues di a conoce loke ta husto i recto, ora maldad ta saca raíz asina profundo den nan cu e ta un parti inseparable di nan personalidad, anto hende cristian, en efecto, tin cu odia esnan cu a unínan inseparablemente cu maldad. Cristian berdadero tin e mesun sintimento cu Jehova Dios en cuanto tal hende apóstata; nan no ta curioso tocante idea apóstata. Al contrario, nan ta “sinti un disgusto” pa hende cu a haci nan mes enemigo di Dios, pero nan ta laga ehecucion di vinganza pa Jehova Dios haci.—Job 13:16; Romano 12:19; 2 Juan 9, 10.

Ora Dios ta scudriñános completamente

¹⁶ David no a deseá di ser manera hende malbado di ningun manera. Hopi hende ta purba di sconde loke nan tá padén, pero David a pidi humildemente: “Scudrinámi completamente, O Dios, i conoce mi curazón. Examinámi i conoce mi pensamento inketante, i mira si tin den mi algun camina doloroso, i guiámi den e camina di tempo indefinitivo.” (Salmo 139:23, 24) Ora David a menciona su curazón, e no kier men e curazón fisical. Di acuerdo cu e nificacion simbólico dje expresion, el a referi na loke e tabata padén, su propio yo. Nos també mester deseá pa Dios scudriña nos curazón pa mira si nos tin algun deseo, amor, emocion, propósito, pensamento, of motivo incorrecto. (Salmo 26:2) Jehova ta invitános: “Mi yiu, en berdad dunámi bo curazón, i laga wowo di bo haya gusto di mi camina.”—Proverbio 23:26.

¹⁷ Si tin scondí den nos algun pensamento doloroso i inketante debí na mal deseo of mal motivo of debí na algun mal conducta di nos parti, anto siguramente nos kier pa Jehova yúdanos rectifica e asunto. En bez di e expresion “algun camina doloroso,” Version Moderna ta bisa: “algun camina malu”; Nieuwe Vertaling ta bisa: “un camina perverso.” Kizás nos mes no ta comprende claramente nos pensamento inketante i p’sei nos no sa con pa expresa nos problema na Dios, pero e ta comprende nos situacion. (Romano 8:26, 27) No mester sorprendénos di cu tin mal inclinacion den nos curazón; toch, nos no mag minimizánan. (Génesis 8:21) Nos mester busca e yudanza di Dios pa eliminánan completamente. Si nos berdaderamente ta stima Jehova Dios i su camina, nos por pidi tal yudanza di dje cu e confianza di cu “Dios ta mas grandi cu nos curazón i sa tur cos.”—1 Juan 3:19-21.

¹⁸ Di acuerdo cu e oracion dje salmista di cu Jehova lo guié den e camina di tempo indefinitivo, Jehova en berdad ta guia sirbidor humilde i obediente di dje. E ta guíanan, no solamente den e camina cu por nifica un bida largu pasobra nan no ta muri prematuramente debí na malecho, sino ta guíanan den e camina cu ta hiba na bida eterna. E ta inculca den nos e necesidad dje balor dje sacrificio di Jesús di kita picá. Mediante su Palabra i su organizacion, e ta percura pa nos instruccion vital di manera cu nos por haci su boluntad. E ta haci destacá e importancia di responde na su yudanza di manera cu nos ta bira padén e sorto di persona cu nos ta parce pafó. (Salmo 86:11) I e ta animános cu e prospecto di un eternidad di bida, hunto cu salud perfecto, den un husto mundo nobo, pa usa den e sirbishi dje único Dios berdadero. Si nos ta sigi responde lealmente na su instruccion, en efecto, lo e bísanos mescos cu el a bisa su Yiu: “Mi a aprobábo.”—Lucas 3:22; Juan 6:27; Santiago 1:12.

Cua Comentario Bo Tin?

◻ Pakico e punto di bista di Jehova di sirbidor di dje hopi bez ta diferente cu loke hende tin?

◻ Kico por yúdanos discerni loke Dios ta mira ora e ta examina nos curazón?

◻ Cua clase di estudio ta yúdanos siña echonan i proteha nos curazón?

◻ Pakico ta importante pa nos no solamente sa loke Dios ta bisa sino també sinti loke e ta sinti?

◻ Pakico nos mester pidi personalmente: “Scudriñámi completamente, O Dios, i conoce mi curazón”?

[Study Questions]

1. Con Jehova ta trata cu sirbidor di dje?

2. Haci contraste entre e punto di bista di Jehova i e punto di bista di hende en cuanto (a) Jesucristo, i (b) sigidor di Cristo.

3. (a) Pakico Jehova su punto di bista di hende hopi bez ta mashá diferente cu loke hende tin? (b) Pakico ta vitalmente importante pa nos examina e sorto di persona cu nos ta padén?

4. (a) Kico a motiva e salmista di declara cu e pensamento di Dios tabata precioso pe? (b) Pakico nan mester ta precioso pa nos?

5. (a) E Palabra di Dios ta urgínos pa proteha kico “mas cu tur otro cos”? (b) Con e relato bíblico tocante Caín por beneficiá nos curazón? (c) Aunque nos no ta bao di Ley di Moisés, con e Ley ta yúdanos comprende loke ta agrada Jehova?

6. Den nos aplicacion di Proverbio 3:1, cua pregunta nos mester haci nos mes?

7. (a) Con e denunciacion di Jesús di fariseo den Mateo 15:3-9 por yúdanos proteha nos curazón? (b) Cua situacion por exigi pa nos dal paso fuerte pa disipliná nos mente i curazón?

8. Pa nos saca mayor probecho for di pensamento precioso di Dios, kico nos mester haci?

9. Pakico algun hende cu ta asisti na reunion cristian ta progresá mas lihé cu otronan?

10. (a) Pa cuanto tempo ta probechoso pa studia e Palabra di Dios? (b) Con e Scritura ta mustra esei?

11. Pakico ta importante pa no solamente conoce e pensamento di Dios sino també sinti su sintimento?

12. Ki importante ta amor piadoso i odio piadoso?

13. (a) Nos ta completamente di acuerdo cu cua oracion di David tocante e destruccion di hende malbado? (b) Segun cu e oracion di David ta mustra, ken ta e malbadonan cu el a pidi Dios destrui?

14. Tin hende malbado cu por ta yudá? Si tin, di ki manera?

15. (a) Cua hende e salmista a considera como “berdadero enemigo”? (b) Con nos djawe por mustra cu nos ta odia esnan cu ta rebela contra Jehova?

16. (a) Pakico David tabata kier pa Jehova scudriñé completamente? (b) Kico tin den nos curazón cu nos mester pidi Dios yúdanos discerní?

17. (a) En bez di sconde pensamento inketante, kico nos mester haci? (b) Mester sorprendénos pa haya mal inclinacion den nos curazón, i kico nos mester haci tocante nan?

18. (a) Con Jehova ta guíanos den e camina di tempo indefinitivo? (b) Si nos ta sigi obedece instruccion di Jehova, nos por spera di recibi cua encomendacion caloroso?

[Picture on page 16]

Ora bo ta studia, haci esfuerzo pa laga e pensamento i sintimento di Dios bira bo pensamento i sintimento

[Picture on page 18]

Pensamento di Jehova ta “mas hopi cu asta granito di santo”

[Credit Line]

Pictorial Archive (Near Eastern History) Est.