Kico Ta Mas Importante den Bo Bida?

“Hací mi conocé e caminda den cua mi mester cana.”—SALMO 143:8.

1. Kico Rey Sálomon a concluí tocante actividadnan i logronan humano?

PROBABLEMENTE bo sa mescos cu cualkier hende cu bida ta yen di actividad i preocupacion. Ora bo pensa riba dje, bo por identificá algun di eseinan como esencial. Otro actividad i preocupacionnan ta ménos importante of asta inútil. E echo cu bo ta realisá esaki ta nificá cu bo ta di acuerdo cu un dje hombernan di mas sabí cu a yega di biba, Rey Sálomon. Despues cu el a repasá cabalmente e actividadnan di bida, el a concluí: “Teme e Dios berdadero i warda su mandamentunan. Pasobra esaki ta tur e deber di hende.” (Eclesiástes 2:4-9, 11; 12:13) Ki nificacion esaki tin pa nos awe?

2. Ki pregunta básico hende temeroso di Dios mester haci nan mes, hibando na cua preguntanan relacioná cuné?

² Si bo kier “teme e Dios berdadero i warda su mandamentunan,” haci bo mes e pregunta desafiador aki, ‘Kico ta bini na promé lugá den mi bida?’ Ta cierto cu kisas bo no ta pensa riba e pregunta ei tur dia, pero pakico no consider’é awor? En realidad, e ta implicá algun pregunta relacioná cuné, manera, ‘Mi por ta poniendo indebido énfasis riba mi trabou of profesion of riba cosnan material? Con importante mi cas, famia i sernan kerí ta den mi bida?’ Un hóben lo por puntra, ‘Te na ki grado educacion ta tuma mi tempu i atencion? Realmente, ta un hobi, deporte, of algun forma di entretenimentu of tecnologia ta mi interes principal?’ I sin importá nos edad of situacion, cu bon motibu nos tin cu puntra nos mes, ‘Ki lugá sirbishi na Dios tin den mi bida?’ Probablemente bo ta di acuerdo cu bo mester fiha prioridadnan. Pero con i unda nos por haña yudansa pa fiha nan sabiamente?

3. Kico establecé prioridadnan ta enbolbé pa cristiannan?

³ E expresion “mas importante” ta encerá algu cu ta bini promé cu tur otro cos of cu mester ser considerá promé. Sea bo ta un Testigo di Jehova of bo ta entre e miyones di studiantenan sincero dje Palabra di Dios asociá cu nan, considerá e berdad aki: “Pa tur cos tin un tempu señalá, asta un tempu pa tur asuntu bou di shelu.” (Eclesiástes 3:1) Cu bon motibu, esei ta incluí mustra interes amoroso pa cu relacionnan di famia. (Colosensenan 3:18-21) E ta enbolbé percurá di un manera onrado pa bo famia pa medio di trabou seglar. (2 Tesalonicensenan 3:10-12; 1 Timoteo 5:8) I pa un cambio di rutina, bo por saca tempu pa un hobi of entretenimentu of recreo ocasionalmente. (Compará cu Marco 6:31.) Pero ora bo pensa seriamente, bo no ta realisá cu esakinan no ta tur cos den bida? Algu otro ta mas importante.

4. Con Filipensenan 1:9, 10 ta relacioná cu nos fihamentu di prioridadnan?

⁴ Probablemente bo ta reconocé cu e principionan guiador di Bijbel ta yudansanan balioso pa fiha prioridadnan i tuma decisionnan sabí. Por ehempel, na Filipensenan 1:9, 10, Bijbel ta insta cristiannan pa “abundá mas i mas ainda cu conocimentu exacto i pleno dicernimentu.” Cu ki propósito? Apostel Pablo a agregá: “Pa boso por haci sigur dje cosnan mas importante.” Esei no ta lógico? Riba e base di conocimentu exacto, un cristian dicernidor por determiná kico mester ta di interes principal—mas importante—den bida.

Un Modelo di Loke Ta Mas Importante

5. Ora e Scritura ta describí e patronchi lagá pa cristiannan, con e ta mustra loke tabata mas importante den bida di Jesus?

⁵ Nos ta haña un faceta precioso di conocimentu den e palabranan di apostel Pedro: “P’e curso aki boso a ser yamá, pasobra asta Cristo a sufri pa boso, lagando un modelo pa boso sigui su pasonan cu sumo cuidou i atencion.” (1 Pedro 2:21) Sí, pa haña un idea di loke ta mas importante den bida, nos por examiná loke Jesucristo a pensa tocante dje. Salmo 40:8 a bisa proféticamente di dje: “Mi goso ta di haci bo boluntad, O mi Dios, i bo ley ta den mi partinan paden.” Asina aki el a declará e mésun pensamentu: “Mi cuminda ta pa mi haci e boluntad di esun cu a mandá mi i terminá su trabou.”—Juan 4:34; Hebreonan 12:2.

6. Con nos por tin e mésun resultadonan cu Jesus tabatin den pone e boluntad di Dios na promé lugá?

⁶ Ripará e clave—haci e boluntad di Dios. E ehempel di Jesus ta enfatisá loke su disipelnan corectamente mester pone na promé lugá den nan bida, pasobra el a bisa cu “tur hende cu ta ser instruí perfectamente lo ta mescos cu su maestro.” (Lucas 6:40) I segun cu Jesus a cana den e caminda cu su Tata a determiná, el a mustra cu tabatin “alegria te na satisfaccion” den tene e boluntad di Dios na promé lugá. (Salmo 16:11; Echonan 2:28) Bo ta mira loke esaki ta implicá? Ora siguidornan di Jesus ta scoge hacimentu dje boluntad di Dios como e cos mas importante den nan bida, nan lo disfrutá di “alegria te na satisfaccion” i berdadero bida. (1 Timoteo 6:19) Pues tin mas cu un motibu pa haci e boluntad di Dios e prioridad den nos bida.

7, 8. Ki pruebanan Jesus a enfrentá, i kico nos por siña for di esaki?

⁷ Djis despues cu Jesus a simbolisá e presentacion di su mes pa haci e boluntad di Dios, e Diabel a busca moda di desvi’é. Den ki manera? Cu tentacion den tres área. Tur tres biaha Jesus a contestá cu palabranan bíblico inekibocabel. (Mateo 4:1-10) Pero mas prueba a sper’é—persecucion, bofon, traicion di parti di Hudas, acusacion falsu i despues morto riba un staca di tormento. Tog, ningun dje pruebanan aki a pone e Yu leal di Dios desviá for di su curso. Na un punto crítico, Jesus a resa: “No manera mi kier, sino manera abo kier. . . . Laga bo boluntad sosodé.” (Mateo 26:39, 42) Nos cada un no mester ta profundamente conmoví p’e aspecto aki dje patronchi cu Jesus a laga pa nos, poniendo nos “perseverá den oracion”?—Romanonan 12:12.

⁸ Sí, ora nos ta fiha nos prioridadnan den bida, guia divino ta particularmente útil, specialmente si nos ta enfrentá enemigunan di e berdad i opositornan dje boluntad di Dios. Corda fiel Rey David su súplica pa guia ora el a experenciá oposicion di enemigu. Nos lo mira esaki segun cu nos ta considerá un parti di Salmo 143. Esaki mester yuda nos dicerní con nos por fortalecé nos relacion personal cu Jehova i ser fortificá pa mantené hacimentu dje boluntad di Dios na promé lugá den nos bida.

Jehova Ta Tende i Ta Contestá Nos Oracionnan

9. (a) Aunke David tabata un pecador, kico su palabra i accionnan ta revelá? (b) Pakico nos no mester entregá den haci loke ta corecto?

⁹ Aunke David tabata un hende mortal pecaminoso, e tabatin fe cu Jehova lo a duna oido na su súplica. El roga humildemente: “O Jehova, tende mi oracion; di berdad duna oido na mi súplica. Den bo fieldad contestá mi, den bo husticia. I no drenta den huicio cu bo sirbidor; pasobra dilanti bo ningun hende bibu por ta hustu.” (Salmo 143:1, 2) David tabata conciente di su imperfeccion, sin embargo su curason tabata completo pa cu Dios. Pues, e tabatin confiansa cu lo el a ricibí un contesta den husticia. Esaki no ta animá nos? Aunke nos ta faya cu e husticia di Dios, nos por tin confiansa cu e ta tende nos si nos curason ta completo pa cuné. (Eclesiástes 7:20; 1 Juan 5:14) Miéntras nos ta perseverá den oracion, nos mester ta dicididu pa “vence malu cu bon” den e tempu malu aki.—Romanonan 12:20, 21; Santiago 4:7.

10. Pakico David a pasa den periodonan di ansiedad?

¹⁰ David tabatin enemigu, mescos cu nos tambe. Sea como fugitivo di Saul, forsá pa busca refugio den lugánan solitario i inaccesibel, of como rey persiguí pa enemigu, David a pasa den periodonan di ansiedad. El a describí con esaki a afect’é: “E enemigu a sigui tras di mi alma . . . El a hací mi biba den lugánan scur . . . I mi spiritu ta desmayá den mi; den mi paden, mi curason ta mustra su mes sin heful.” (Salmo 143:3, 4) Bo a yega di tin motibu pa sinti di un manera similar?

11. Ki momentonan di ansiedad sirbidornan di Dios dje tempu actual a enfrentá?

¹¹ Presion di enemigu, pruebanan debí na dificultad económico severo, malesa serio of otro problemanan inkietante a pone algun dje pueblo di Dios sucumbí na desesperacion. Na algun ocasion nan curason tambe tabata como si fuera sin heful. Ta como si fuera nan individualmente a sclama: “Debí cu bo a lagá mi mira hopi angustia i calamidad, hací mi biba atrobe . . . Rondoná mi i consolá mi.” (Salmo 71:20, 21) Con nan a ser yudá?

Con pa Enfrentá Atakenan di Enemigu

12. Con Rey David a enfrentá peliger i prueba?

¹² Salmo 143:5 ta indicá loke David a haci ora el a haña su mes enfrentá cu peliger i pruebanan grandi: “Mi a corda dianan di hopi tempu atras; mi a meditá riba tur bo actividad; di buena gana mi a mantené mi mes intensamente interesá den e obra di bo propio mannan.” David a corda e tratonan di Dios cu Su sirbidornan i con e mes a experenciá liberacion. El a meditá riba loke Jehova a haci p’e causa di Su gran nomber. Sí, David a mantené su mes intensamente interesá den e obranan di Dios.

13. Ora nos ta enfrentá prueba, con e echo cu nos ta meditá riba ehempelnan di tempu antiguo i actual di sirbidornan fiel lo yuda nos wanta?

¹³ Nos no a recordá hopi biaha e tratonan di Dios cu su pueblo? Siguramente! Esaki ta incluí e registro cu e ‘nubia grandi di testigonan’ a traha den tempunan pre-cristian. (Hebreonan 11:32-38; 12:1) Cristiannan ungí den e promé siglo a ser animá tambe pa “sigui corda e dianan cu a pasa” i loke nan a wanta. (Hebreonan 10:32-34) Kico dje experencianan di Dios su sirbidornan den tempunan moderno, manera esnan cu ta ser relatá den e buki Los testigos de Jehová, proclamadores del Reino de Dios?a Relatonan documentá eiden i den otro publicacionnan di Watchtower ta permití nos corda con Jehova a yuda su pueblo wanta prohibicion, encarcelacion, accion di multitud desordená i camponan di concentracion i di trabou forsá. Tabatin pruebanan den paisnan asotá pa guera, manera Burundi, Liberia, Ruanda i ex-Yugoslavia. Ora oposicion a manifestá su mes, e sirbidornan di Dios a wanta debí cu nan a mantené un relacion fuerte cu Jehova. Su man a sostené esnan cu a pone e hacimentu di su boluntad na promé lugá den nan bida.

14. (a) Cua ta un ehempel dje manera cu Dios ta sostené un persona den un situacion cu por ta similar cu esun di nos? (b) Kico bo ta siña for dje ehempel ei?

¹⁴ Sin embargo, kisas bo ta respondé cu bo no a experenciá abusunan brutal asina, i kisas bo ta pensa cu no ta probabel cu un dia lo bo pasa un cos asina. Sin embargo, e manera cu Dios ta sostené su pueblo no tabata semper loke algun hende por considerá como circunstancianan dramático. El a sostené hopi individuonan “comun” den circunstancianan “normal.” Ata aki solamente un dje hopi ehempelnan: Bo ta reconocé e potret aki riba, i e ta yudá bo corda Dios su trato cu su pueblo? El a aparecé den E Toren di Vigilancia di 1 di december, 1996. Bo a lesa e relato cu Penelope Makris a conta? Ki un ehempel espléndido di integridad cristian! Bo por corda loke el a wanta na man di su bisiñanan, con el a lucha contra enfermedadnan serio i ki esfuersonan el a haci pa permanecé den e ministerio di tempu completo? Kico di su experencia recompensador na Mytilene? E punto ta, Bo ta mira ehempelnan asina como yudansa pa nos tur den fiha prioridadnan, poniendo hacimentu dje boluntad di Dios na promé lugá den nos bida?

15. Cua ta algun di Jehova su echonan riba cua nos tin cu meditá?

¹⁵ Meditando riba Jehova su actividadnan, mescos cu David a haci, ta fortalecé nos. Den cumplimentu cu su propósito, Jehova a haci percuracion pa salbacion mediante e morto, resureccion i glorificacion di su Yu. (1 Timoteo 3:16) El a establecé su Reino celestial, a saca Satanas i su demoñonan for di shelu i a restorá adoracion berdadero aki riba tera. (Revelacion 12:7-12) El a crea un paradijs spiritual i a bendicioná su pueblo cu aumento. (Isaías 35:1-10; 60:22) Su pueblo ta dunando awor un testimonio final promé cu e tribulacion grandi dal aden. (Revelacion 14:6, 7) Sí, nos tin hopi cos pa meditá ariba.

16. Cu kico nos ta ser animá pa keda ocupá cuné, i kico esaki lo convencé nos di dje?

¹⁶ Manteniendo nos mes ocupá cu e obra di Dios su mannan en bes di bira preocupá cu empeñonan humano ta convencé nos cu e poder cu Jehova ta usa ta iresistibel. Pero, e obranan ei no ta limitá n’e maraviyoso obranan físico di creacion den shelu i aki riba tera. (Job 37:14; Salmo 19:1; 104:24) Su obranan maraviyoso ta incluí echonan di liberacion pa su pueblo for di opresornan enemigu, manera e experencianan di su pueblo scogí di antigwedad a demostrá.—Exodo 14:31; 15:6.

Conociendo e Caminda den Cua pa Cana

17. Con real Jehova tabata pa David, i con esaki por trankilisá nos?

¹⁷ David a pidi Dios yudansa pa su vogt di bida no seca den dje: “Mi a extendé mi mannan na bo; mi alma ta pa bo manera un tera agotá. O pura, contestá mi, O Jehova. Mi spiritu a yega na un fin. No sconde bo cara for di mi, of sino mi mester bira manera esnan cu ta baha den e buracu.” (Salmo 143:6, 7) David, un pecador, tabata sa cu Dios tabata conciente di su situacion. (Salmo 31:7) Tin biaha nos tambe por sinti cu nos spiritualidad a baha te abou. Pero e situacion no ta sin speransa. Jehova, kende ta tende nos oracionnan, por acelerá nos restoracion dor di refrescá nos mediante ancianonan amoroso, artículonan den E Toren di Vigilancia, of partinan di reunion cu ta parce prepará net pa nos.—Isaías 32:1, 2.

18, 19. (a) Kico mester ta nos súplica sincero na Jehova? (b) Di kico nos por ta sigur?

¹⁸ Nos confiansa den Jehova ta impulsá nos pa suplik’é: “Lagá mi tende bo bondad amoroso, pasobra den bo mi a pone mi confiansa. Hací mi conocé e caminda den cua mi mester cana.” (Salmo 143:8) Jehova a desapuntá Ruman Makris, kende tabata isolá riba un isla griego? Pues lo e desapuntá bo segun cu bo ta pone e hacimentu di su boluntad na promé lugá den bo bida? E Diabel i su agentenan lo kier stroba of stop completamente nos trabou di proclamá e Reino di Dios. Sea nos ta sirbi den paisnan unda adoracion berdadero ta ser permití generalmente of nos ta sirbi den paisnan caminda e ta ser suprimí, nos oracionnan uní ta armonisá cu e peticion di David: “Librá mi for di mi enemigunan, O Jehova. Mi a busca lugá di sconde asta cerca bo.” (Salmo 143:9) Nos proteccion contra calamidad spiritual ta dependé riba biba den e lugá secreto dje Haltísimo.—Salmo 91:1.

¹⁹ Nos conviccion di loke ta mas importante tin un fundeshi sólido. (Romanonan 12:1, 2) Resistí, anto, e esfuersonan dje mundu pa imponé riba bo loke é ta kere ta importante den e sistema di cosnan humano. Sigui laga tur aspecto di bo bida reflehá loke bo sa cu ta mas importante—hacimentu dje boluntad di Dios.—Mateo 6:10; 7:21.

20. (a) Kico nos a siña tocante David na Salmo 143:1-9? (b) Con cristiannan awe ta reflehá e spiritu di David?

²⁰ E promé nuebe versículonan di Salmo 143 ta enfatisá e relacion personal íntimo cu David tabatin cu Jehova. Ora e tabata rondoná pa enemigu, el a suplicá Dios libremente pa guia. El a deshogá su curason, buscando yudansa den e caminda corecto pa cana. Ta mescos awe cu e resto di esnan ungí cu spiritu riba tera i nan compañeronan. Nan ta considerá nan relacion cu Jehova como precioso segun cu nan ta suplik’é pa guia. Pa nan, hacimentu dje boluntad di Dios ta e cos principal, apesar di presion di parti dje Diabel i e mundu.

21. Pakico ta importante pa nos pone un bon ehempel si nos kier siña otronan loke mester ta mas importante den nan bida?

²¹ Miyones di hende cu ta studiando Bijbel cu Testigonan di Jehova tin cu reconocé cu hacimentu dje boluntad di Dios ta e cos mas importante. Nos por yuda nan comprendé esaki ora nos ta trata capítulo 13 dje buki Conocimentu cu Ta Hiba na Bida Eterno, cu ta enfatisá principionan cu ta enbolbí den ser obediente n’e Palabra.b Naturalmente, nan mester mira cu nos mes ta practicá loke nos ta siña nan. Despues di un periodo di tempu relativamente corticu, nan tambe lo yega na conocé e caminda den cua nan mester cana. Segun cu e miyones di hendenan aki ta capta personalmente loke mester ta di mayor importancia den nan bida, hopi lo ser impulsá pa dal e pasonan di dedicacion i bautismo. Despues di esei, e congregacion por yuda nan sigui cana den e caminda di bida.

22. Ki preguntanan lo ser considerá den e siguiente artículo?

²² Hopi persona ta reconocé mesora cu e boluntad di Dios mester ta di sumo importancia den nan bida. Pero, con Jehova ta siña su sirbidornan progresivamente pa haci su boluntad? Ki beneficionan esaki ta trece pa nan? E preguntanan aki lo ser considerá, huntu cu un consideracion di un versículo clave, Salmo 143:10, den e siguiente artículo.

[Nota]

Con Bo Ta Contestá?

◻ Dor di aplicá Filipensenan 1:9, 10, con nos por establecé prioridadnan?

◻ Con Jesus a mustra loke tabata mas importante den su bida?

◻ Kico nos por siña for dje accionnan di David ora e tabata bou di prueba?

◻ Den ki manera Salmo 143:1-9 ta yuda nos awe?

◻ Kico mester ta mas importante den nos bida?

[Plachi na página 10]

E accionnan di David a proba su dependencia riba Jehova

[Rekonosementu]

Reproducí for dje obra Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s